Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
English English
ភាសាខ្មែរ ភាសាខ្មែរ
Login
Createx Logo
  • Jul 13, 2019 |
  • 6 years ago |
  • 3.4K views

អ្នកគិតពីសុខភាពត្រូវម៉ាច់ហ្មង!

តើអ្នកណាមិនចង់បានសុខភាពល្អ? ចម្លើយគឺគ្មានទេ។ មានតែអ្នកចង់បានសុខភាពល្អព្រោះវាជាកត្តាចម្បងមួយដែលនាំគ្រប់គ្នាទៅកាន់សុខសុភមង្គលក្នុងគ្រួសារទាំងមូល។ ប៉ុន្តែ តើមានមនុស្សប៉ុន្មានអ្នកដឹងថាតើដើម្បីទទួលបានសុខភាពល្អ ត្រូវធ្វើអ្វីខ្លះ? ឬដឹងត្រឹមថាផឹកស្អាត ហូបស្អាត និងរស់នៅស្អាតគឺគ្រប់គ្រាន់ហើយ? តែតើផឹកយ៉ាងម៉េចទើបគេហៅថាផឹកស្អាត? ហូបបែបណាទើបគេហៅថាហូបស្អាត? ហើយរស់នៅដូចម្តេចទើបគេហៅថារស់នៅស្អាតនោះ?  ចង់ដឹងចម្លើយទាំងនេះណាស់មែនទេ? តោះៗ! ទៅ CKCC នៅថ្ងៃទី២១ ខែកក្កដាឆ្នាំ២០១៩នេះ ហេលស៍ថាមនឹងស្រាយចម្ងល់ទាំងនេះជូនអ្នកទាំងអស់គ្នាពេញមួយថ្ងៃតែម្តងចាប់ពីម៉ោង៨ព្រឹករហូតដល់ម៉ោង៥រសៀល ក្នុងទិវាលើកកម្ពស់សុខភាព Healthtime Festival។ តែឥលូវមកយល់ត្រួសៗថាទិវានេះគេធ្វើអីខ្លះសិនណា... ទិវាលើកកម្ពស់សុខភាព Healthtime Festival របស់ក្រុមហ៊ុន Healthtime Corporation ត្រូវបានរៀបចំធ្វើឡើងក្នុងគោលបំណងបណ្តុះនូវធាតុផ្សំចម្បងនៃជីវិតប្រកបដោយភាពរីករាយ និងសុខភាពល្អ តាមរយៈការរស់នៅប្រកបដោយសុខភាពល្អ ការវិនិច្ឆ័យរោគបានក្នុងដំណាក់កាលដំបូងៗនិងការទទួលបាននូវចំណេះដឹងត្រឹមត្រូវស្តីពីសុខភាពជូនដល់សាធារណជនជាពិសេសអ្នកដែលមានអាយុចន្លោះពី ២០ ទៅ៣៥ឆ្នាំដែលសុទ្ធសឹងតែជាយុវជនពេញកម្លាំងក្នុងការអភិវឌ្ឍសង្គម។  ចូលរួមក្នុងទិវាលើកកម្ពស់សុខភាព Healthtime Festival លោកអ្នកនឹងរីករាយជាមួយនឹងសកម្មភាពសប្បាយជាច្រើនដែលរៀបចំឡើងដោយក្រុមការងាររបស់យើងរួមជាមួយនឹងការទទួលបាននូវអត្ថប្រយោជន៍ជាច្រើនថែមទៀតទៅលើសុខភាពរបស់លោកអ្នក ដូចជា៖ • ការហាត់យោគៈជាមួយគ្រូជំនាញល្បីឈ្មោះពី Angkor Yoga • ការពិគ្រោះ និងពិនិត្យសុខភាពជាមួយគ្លីនិកកំពូលៗនៅកម្ពុជា ដូចជាគ្លីនិកឯកទេសអេគីប គ្លីនិកស្បែកប៊ីស៊ីជាដើម • តេស្តឧបនិស្ស័យ និងអត្តចរិតរបស់អ្នកជាមួយ Brain Scan Test • កម្មវិធីពង្រឹងសុខភាពផ្លូវចិត្ត ដោយលោក នឹម ឈុន្នី សហស្ថាបនិក ក្រុមហ៊ុនបណ្តុះបណ្តាល VIPASSA • ការចែករំលែកពីការថែទាំសុខភាព និងអាហារូបត្ថម្ភ ដោយវាគ្មិនល្បីឈ្មោះ • សិក្ខាសាលាពីជំងឺកាចសាហាវនៅកម្ពុជា និងការពិភាក្សាជាក្រុមជាមួយវេជ្ជបណ្ឌិតល្បីៗក្នុងប្រទេស។ ចាប់អារម្មណ៍ជាមួយសកម្មភាពដែលបានរៀបរាប់មកទេ? ម៉ោះ! ទូរស័ព្ទមកកាន់លេខ ០៧៧ ៨៨៨ ០៧៥ ដើម្បីធ្វើការកក់សំបុត្ររបស់លោកអ្នកជាមុនដើម្បីទទួលបានតម្លៃពិសេស ឬបើមិនទាន់ប្រាកដចិត្ត អាចសួរព័ត៌មានសិនក៏បាន។ អូ! ភ្លេច! ឆាតមកផេក Healthogo by Healthtime ក៏បានដែរណា! ជួបគ្នាថ្ងៃទី២១ កក្កដា ឆ្នាំ២០១៩ នៅCKCC ណា អ្នកស្រលាញ់សុខភាពទាំងអស់គ្នា! ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

News & Events
Share
  • Jul 13, 2019 |
  • 6 years ago |
  • 3.7K views

ទម្លាប់នៃការញ៉ាំអាហារចាប់ផ្តើមប្រែប្រួលតើត្រូវដោះស្រាយបែបណា?

ការឡើងទម្ងន់ ឬស្រកទម្ងន់ខ្លាំងពេកបានក្លាយជាកង្វល់របស់បុគ្គលភាគច្រើន ដោយសារតែការមិនអាចបង្ហាញដងខ្លួនដែលស្អាត ស៊ិចស៊ីដល់មនុស្សជុំវិញខ្លួនបាន។ មិនត្រឹមតែប៉ុណ្ណោះ ការចំអកឡកឡាយពីគ្រួសារ មិត្តភក្តិ ក្លាយជាសម្ពាធមួយ ដែលធ្វើឲ្យពួកគេស្វែងរកដំណោះស្រាយ ហើយមូលហេតុនៃបញ្ហាទម្ងន់ដែលគ្រប់គ្នា នឹងគិតដល់មុនគេនោះគឺអាហារ។ ហេតុដូច្នេះហើយ របបអាហារក៏ត្រូវចាប់ផ្តើមប្រែប្រួល ដោយបុគ្គលខ្លះធ្វើការតមអាហារយ៉ាងគំហុកដើម្បីសម្រកទម្ងន់ ឯអ្នកខ្លះទៀត ក៏ចាប់ផ្តើមបង្កើនបរិមាណនៃការញ៉ាំឲ្យបានច្រើនដើម្បីឲ្យទម្ងន់កើនឡើង។ សកម្មភាពនេះមើលទៅដូចជាមិនមានអ្វីប្លែកទេ ប៉ុន្តែបើអ្នកសង្កេតឲ្យបានម៉ត់ចត់ជាងនេះវាអាចជាសម្ពាធមួយដែលធ្វើឲ្យមនុស្សទាំងនោះទទួលរងនូវជំងឺផ្លូវចិត្តម្យ៉ាងដែលគេឲ្យឈ្មោះថា Eating Disorder។ តើធ្វើយ៉ាងម៉េចទើបអាចដឹងថាខ្លួនអ្នកមានជំងឺ Eating Disorder? ចម្លើយនេះ អ្នកដែលបានតាមដានទស្សនាវដ្តីហេលស៍ថាមលេខ ៧៧ ដែលចេញផ្សាយក្នុងខែមីនា ឆ្នាំ២០១៩ ប្រាកដជាបានដឹងនិងបានធ្វើតេស្តខ្លះៗហើយមែនទេ? តែសម្រាប់អ្នកដែលមិនទាន់បានអានវិញ អាចចូលអានអត្ថបទនេះតាមតំណនេះ៖ អ្នកអាចកំពុងមានជំងឺផ្លូវចិត្តទាក់ទង Eating Disorders សិនណាសឹមយើងទៅស្វែងយល់ជាមួយគ្នាបន្តពីដំណោះស្រាយនៃបញ្ហានេះ។ តើ Eating Disorder អាចព្យាបាលបែបណា? តោះ! បើបានដឹងថាខ្លួនមានបញ្ហានេះហើយ មកតាមដានទាំងអស់គ្នាពីការដោះស្រាយម្តង... - ការពិនិត្យសុខភាពទូទៅ៖ កង្វល់ធ្ងន់ធ្ងរជាងគេក្នុងការព្យាបាលជំងឺ Eating Disorder គឺការរកមើលថាតើមានបញ្ហាសុខភាពណាមួយទេ ដែលបណ្តាលមកពីការប្រែប្រួលទម្លាប់បរិភោគអាហារនេះ។ - ការបំពេញអាហារូបត្ថម្ភ៖ អ្នកជំងឺនឹងត្រូវបានណែនាំឲ្យបរិភោគតាមធម្មតាវិញហើយគ្រូពេទ្យនឹងរៀបចំគម្រោងអាហារផ្ទាល់ខ្លួនសម្រាប់អ្នកជំងឺម្នាក់ៗដើម្បីឲ្យទម្ងន់ត្រឡប់មកធម្មតាវិញ និងរក្សាទម្ងន់ដែលសមស្រប។ - ការព្យាបាលផ្នែកផ្លូវចិត្ត៖ ការព្យាបាលផ្នែកផ្លូវចិត្តរបស់អ្នកជំងឺ អាចមានទម្រង់ផ្សេងៗគ្នា ដោយមានការចូលរួមពីបុគ្គលខ្លួនឯងផ្ទាល់ ក្រុមគ្រួសារ ឬមនុស្សនៅជុំវិញខ្លួន អាស្រ័យទៅតាមមូលហេតុនៃ Eating Disorder របស់អ្នកជំងឺនីមួយៗ។ ការព្យាបាលនេះ គឺជាផ្នែកមួយសំខាន់ក្នុងការធ្វើឲ្យអ្នកជំងឺមានឱកាសជាសះស្បើយឡើងវិញ និងព្យាបាលការប៉ះទង្គិចផ្លូវអារម្មណ៍របស់ពួកគាត់ហើយក៏អាចស្វែងរកគុណភាពជីវិតរបស់ខ្លួនឯងមកវិញផងដែរ។ - ការព្យាបាលដោយឱសថ៖ ឱសថមួយចំនួនអាចមានប្រសិទ្ធភាពក្នុងការដោះស្រាយបញ្ហាអារម្មណ៍តានតឹងដែលអាចកើតឡើងរួមគ្នាជាមួយនឹងការប្រែប្រួលទម្លាប់នៃការញ៉ាំ។ បើទោះបីជាអ្នកបានដឹងពីវិធីសាស្រ្តក្នុងការព្យាបាលជំងឺ Eating Disorder នេះហើយក៏ដោយតែអ្នកមិនត្រូវភ្លេចធ្វើការតាមដានស្ថានភាពរបស់ខ្លួនជាមួយនឹងគ្រូពេទ្យជំនាញនោះឡើយ ព្រោះការព្យាបាលជំងឺនេះ គឺត្រូវការចំណាយពេលវេលាយូររួមជាមួយនឹងការខិតខំប្រឹងប្រែងរបស់អ្នកផ្ទាល់ ព្រមទាំងការគាំទ្រពីក្រុមគ្រួសារ មិត្តភក្តិនិងមនុស្សជុំវិញខ្លួនផងដែរ។ អត្ថបទ៖​ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨០ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Mental Health​ & Entertainment Mental Health​ & Entertainment Mental Health​ & Entertainment
Share
  • Jul 12, 2019 |
  • 6 years ago |
  • 3.4K views

សេចក្តីជូនព័ត៌មានរបស់ក្រសួងសុខាភិបាលស្តីពីស្ថានភាពជំងឺគ្រុនឈាម

បច្ចុប្បន្នជំងឺគ្រុនឈាមបាននឹងកើនឡើងគួរឲ្យកត់សម្គាល់នៅក្នុងប្រទេសកម្ពុជា ប៉ុន្តែរហូតមកដល់ពេលនេះជំងឺគ្រុនឈាមហាក់ដូចជាមានការថយចុះនៅតាមបណ្តាលខេត្តចំនួន១១ រួមមាន៖ ខេត្តពោធិ៍សាត់ ខេត្តតាកែវ ខេត្តស្ទឹងត្រែង ខេត្តស្វាយរៀង ខេត្តរតនគីរី ខេត្តប៉ៃលិន ខេត្តកោះកុង ខេត្តកំពង់ធំ ខេត្តបាត់ដំបង ខេត្តព្រះសីហនុ ខេត្តមណ្ឌលគីរី ហើយខេត្តក្រចេះ ខេត្តកំពត ខេត្តព្រៃវែង និងខេត្តកែបដែលមានស្ថានភាពនៅមិនទាន់កើនឡើងករណីឈឺនេះឡើយ។ ដោយឡែក ក្រសួងសុខាភិបាលបានរកឃើញថា ជំងឺគ្រុនឈាមនៅប្រទេសកម្ពុជាបានចាប់ផ្តើមកើនឡើងពីដើមខែឧសភារហូតដល់បច្ចុប្បន្នដោយរាយប៉ាយដុំៗតាមភូមិសាស្រ្តនៃរាជធានី ខេត្តនីមួយៗចំនួនករណីសរុប ១៥០០០នាក់ និងស្លាប់ចំនួន២៥នាក់ គិតមកដល់ដើមខែកក្តដាឆ្នាំ២០១៩នេះ នេះបើយោងតាមសេចក្តីជូនព័ត៌មានរបស់ក្រសួងសុខាភិបាលស្តីពីស្ថានភាពជំងឺគ្រុនឈាម ចុះថ្ងៃទី១០ ខែកក្តដា ឆ្នាំ២០១៩នេះ។ ជាមួយគ្នានេះផងដែរ ក្រសូងសុខាភិបាល សូមអំពាវនាវសារជាថ្មីដល់បងប្អូនប្រជាពលរដ្ឋទាំងអស់ និងអាជ្ងាធរគ្រប់លំដាប់ថ្នាក់សូមចូលរួមយ៉ាងសកម្មអនុវត្តវិធានការការពារជំងឺគ្រុនឈាមតាមរយៈការអនុវត្តវិធានការចំនួន ៤ចំណុចរួមមាន៖  • វិធានការទី១៖ ត្រូវកំចាត់ដង្កូវទឹកនៅតាមទីកន្លែងដែលមានទឹកដូចជា ពាង អាងទឹក ថូផ្កា ចានទ្រជើងតុទូ ក្រឡ ធុង ខាប់ជាដើម។ ដោយការផ្លាស់ប្តូរទឹក និងលាងសម្អាតប្រចាំឲ្យបានយ៉ាងតិចមួយដងក្នុងមួយសប្តាហ៍ ឬត្រូវគ្របគំរបឲ្យបានជិតល្អ និងត្រូវសហការជាមួយបណ្តាញសុខាភិបាលដើម្បីដាក់ថ្នាំសម្លាប់ដង្កូវទឹក ឬចិញ្ចឹមកូនត្រីប្រាំពីរពណ៌នៅកន្លែងដែលអាចចិញ្ចឹមបាន។ ចំពោះសម្ភារៈដក់ទឹកផ្សេងៗទៀតដែលមិនប្រើប្រាស់ទុកចោលដូចជាសំបកកង់ សំបកដប កំប៉ុង ត្រឡោកដូង និងវត្ថុដក់ទឹកផ្សេងត្រូវកប់ ឬដុតកំទេចចោល ឬដាក់ឲ្យមានរបៀបចៀសវាងការដក់ទឹក។ • វិធានការទី២៖ សំបកកង់ពិសេសំបកកង់ឡាន និងសំបកកង់ម៉ូតូទាំងអស់«សូមធ្វើការគ្រប់គ្រងសំបកកង់ទាំងនោះឲ្យមានសុវត្ថិភាពចៀសផុតពីការដក់ទឹក»។ ចំពោះ វិធីសាស្រ្តគ្រប់គ្រងសំបកកង់ ដោយសុវត្ថិភាពគ្មានសត្វមូសកកើតគឺត្រូវ៖ ដាក់គរត្រួតលើគ្នាគ្របដោយបន្ទះក្តារជិត ឬស្បៃមុង ចាក់ប្រេងម៉ាស៊ីនដែលខូចឈប់ប្រើប្រាស់ចូល ឬចាក់ដីបំពេញ ជាពិសេសដាក់ក្រោមដំបូលដើម្បីការពារកុំឲ្យមានដក់ទឹក ដែលបង្កទៅជាប្រភពកកើតនិងជម្រកមូលខ្លា។ • វិធានការទី៣៖ ត្រូវសម្អាតការដា្ឋនសំណង់កុំឲ្យមានកន្លែងទឹកដក់ ដែលជាជម្រកមូសខ្លា និងរក្សាអនាម័យល្អជានិច្ច។ • វិធានការទី៤៖ ករណីមានរោគសញ្ញាក្តៅខ្លួនខ្លាំងភ្លាមៗត្រូវប្រញាប់នាំអ្នកជំងឺទៅរកសេវាថែទាំសុខភាពរដ្ឋ ឬសេវាសាធារណៈដែលនៅជិតបំផុតជាបន្ទាន់ (មិនឲ្យយឺតជាង ៧២ម៉ោង បន្ទាប់ពីក្តៅខ្លួន)។ សូមកុំសាកល្បងព្យាបាលអ្នកជំងឺគ្រុនក្តៅខ្លាំងភ្លាមៗនេះ ដោយខ្លួនឯង ឬពន្យារពេលតាមដានព្យាបាលជំងឺក្នុងសេវាឯកជនដែលគ្មានសមត្ថភាពផ្នែកជំងឺគ្រុនឈាមឲ្យសោះ។ ជំងឺគ្រុនឈាមអាចនឹងសម្លាប់អ្នកជំងឺបានគ្រប់ពេលប្រសិនបើមិនទៅទទួលព្យាបាលនៅសេវារដ្ឋឲ្យបានទាន់ពេលវេលា ឬព្យាបាលមិនមានជំនាញវិជ្ជាជីវៈ ឬបើមានប្រើប្រាស់ប្រភេទថ្នាំអាស្ពីរីន។ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

News & Events
Share
  • Jul 12, 2019 |
  • 6 years ago |
  • 5.7K views

កាន់តែច្បាស់ពីបញ្ហាមុននៅលើស្បែក

មុនត្រូវបានគេកត់សម្គាល់ឃើញជាញឹកញាប់នៅលើផ្ទៃមុខ ខ្នង ទ្រូង ជុំវិញបបូរមាត់និងគូទជាដើម។ តើបញ្ហាស្បែកមុខមានមុនកើតឡើងដោយសារអ្វី? តើយើងអាចទប់ស្កាត់ការលេចចេញឡើងនូវបញ្ហាមុនបានទេ? បើកើតហើយតើអាចធ្វើការព្យាបាលឲ្យបាត់វិញបានទេ? មុនមានច្រើនប្រភេទដែលក្នុងនោះផងដែរ យើងចែកចេញជា ២ក្រុមគឺមុនអត់រលាក (Retentional Acne) និងមុនរលាក ( Inflammatory Acne)៖ • មុនអត់រលាក (Retentional Acne) រួមមាន៖ មុនក្បាលខ្មៅ (Blackhead) និងមុនកប់ (Whitehead) • មុនរលាក (Inflammatory Acne) មាន៖ មុនសាច់ (Papule) មុនខ្ទុះ (Pustules) និងមុនគ្រាប់ (Kystes)។ អ្វីជាមូលហេតុពីក្រោយការកើតមុននៅលើស្បែក? ជាក់ស្តែង មូលហេតុដែលបង្កឲ្យកើតមុននៅលើស្បែកបណ្តាលមកពីវិបត្តិនៃក្រពេញ Sebaceous ដែលកើតឡើងដោយសារធាតុកខ្វក់ ឬមេរោគ ការកើនឡើងនៃអ័រម៉ូនអឺស្រ្តូហ្សែន បញ្ហាស្ត្រេស ភាពតានតឹង និងកោសិកាស្បែកចាស់ៗសុទ្ធសឹងតែជាកត្តាបង្កឲ្យស្ទះរន្ធញើស និងគល់រោមដែលបណ្តាលឲ្យសែ្បកពិសេសផ្ទៃមុខរបស់អ្នកលេចឡើងនូវបញ្ហាមុន។ ក្រៅពីមូលហេតុខាងលើបញ្ហាមុនអាចមានកត្តាប្រឈមផ្សេងទៀតដូចជា៖ • អ្នកដែលមានស្បែកមានជាតិខ្លាញ់ ឬសម្បូរប្រេង • ការគេងមិនបានគ្រប់គ្រាន់ • ការញ៉ាំទឹក • ការមិនបានហាត់ប្រាណដើម្បីឲ្យក្រពេញញើសដំណើរការបានល្អ • ការមិនទម្លាប់សម្អាតស្បែកឲ្យបានទៀងទាត់។ ស្បែកមានមុនផ្តល់ផលវិបាកដូចម្តេច? ស្បែកដែលមានបញ្ហាមុន ឬផលវិបាកដែលបន្សល់ទុកក្រោយពេលកើតមុនគឺ៖ • ធ្វើឲ្យស្បែកមានលក្ខណៈខុសធម្មតា • បន្សល់ទុកស្នាម និងផ្លែសាច់ • ស្បែកក្រហមខុសធម្មតា • ងាយអាល្លែកហ្ស៊ីជាមួយប្រតិកម្មខាងក្រៅ • ឆាប់ចាស់ជ្រីវជ្រួញជាងវ័យ។ល។ ការធ្វើរោគវិនិច្ឆ័យ និងការព្យាបាល ការធ្វើរោគវិនិច្ឆ័យទៅលើអ្នកដែលមានបញ្ហាស្បែកមានមុនគឺត្រូវធ្វើឡើងអាស្រ័យលើសញ្ញាគ្លីនិកមួយចំនួន។ គ្រប់លក្ខខណ្ឌនៃបញ្ហាមុន គួរតែទទួលការព្យាបាលស្របទៅតាមសភាពធ្ងន់ធ្ងរ ឬស្រាលរបស់មុន។ ប្រសិនបើមិនទាន់មានបញ្ហាខ្លាំងនោះទេ អ្នកត្រូវបានណែនាំឲ្យទទួលទានទឹកឲ្យបានច្រើន ពិសេសហាត់ប្រាណឲ្យបានទៀងទាត់។ ករណីបញ្ហាមុនមានលក្ខណៈច្រើនអ្នកត្រូវធ្វើការព្យាបាលដោយការប្រើប្រាស់ថ្នាំលាប ថ្នាំលេប ឬរហូតដល់ថ្នាំចាក់ទៅតាមកម្រិតរបស់អ្នកជំងឺដែលការព្យាបាលនេះធ្វើឡើងជាមួយអ្នកជំនាញឬគ្រូពេទ្យឯកទេសសើស្បែកឲ្យបានលឿនបំផុតតាមដែលអាចធ្វើបាន។ វិធីសាស្រ្តការពារខ្លួនពីបញ្ហាមុន • ត្រូវញ៉ាំទឹកឲ្យបានច្រើន • ហាត់ប្រាណឲ្យបានទៀងទាត់ • ចៀសវាងការសម្អាតជាមួយសាប៊ូ  ឬសារធាតុកាត់ច្រើនហួសហេតុ • លាងសម្អាត និងរក្សាអនាម័យផ្នែកដែលកើតមុនឲ្យបានល្អ • ចៀសវាងការប្រើប្រាស់ផលិតផលណាដែលនាំឲ្យស្បែករលាក (Cosmetics) • ការពារស្បែកពីពន្លឺព្រះអាទិត្យ • ចៀសវាងការប៉ះពាល់ ឬប្រើក្រចកកេះលើផ្នែកដែលមានមុន ព្រោះវាបណ្តាលឲ្យមានស្នាម។ មិនថាអ្នកមានបញ្ហាមុន ឬអ្នកជំងឺស្បែកទូទៅនោះទេឲ្យតែពាក់ព័ន្ធនឹងស្បែកចាំបាច់គួរព្យាយាមថែរក្សាស្បែកឲ្យបានល្អ ហើយចៀសវាងការប្រើប្រាស់ផលិតផលមិនត្រូវនឹងស្បែកមុខ និងគ្មានប្រភពច្បាស់លាស់ព្រោះវាអាចមានលាយសារធាតុដែលធ្វើឲ្យប៉ះពាល់ទៅដល់សុខភាពស្បែកនៅថ្ងៃក្រោយ។ ចំពោះអ្នកដែលមានបញ្ហាស្បែកដូចជា កើតមុន ជាំមុខ ឬបញ្ហាផ្សេងៗទៀត គួរតែពិនិត្យ និងពិគ្រោះជាមួយគ្រូពេទ្យជំនាញសើស្បែកដើម្បីទទួលបានការព្យាបាលត្រឹមត្រូវទៅតាមប្រភេទស្បែកនិងទាន់ពេលវេលា។ បកស្រាយដោយ៖ វេជ្ជបណ្ឌិត អៀវ មករា ប្រធានបន្ទប់ពិគ្រោះ និងព្យាបាលជំងឺMedical Derma (MD) អត្ថបទ៖​ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨១ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Skin, STD & Beauty Skin, STD & Beauty
Share
  • Jul 11, 2019 |
  • 6 years ago |
  • 3.2K views

គន្លឹះនៃការណែនាំទៅកាន់អ្នកជំងឺឈឺជើង

អាការៈឈឺជើង ឬធ្ងន់ជើង ជាបញ្ហាគួរគិតដល់ជាចាំបាច់ទៅលើជំងឺរលាកសរសៃឈាមអាទែរ ពីព្រោះការធ្វេសប្រហែសក្នុងប្រការណាមួយអាចជំរុញឲ្យមានការកាត់ជើងប្រសិនការព្យាបាលត្រូវធ្វើឡើងយឺតពេល។ អ្វីគួរដឹង? សំណួរជាចម្បងដែលត្រូវសួរទៅអ្នកជំងឺនោះ ថាតើការឈឺចាប់កើតមានឡើងអំឡុងពេលដើរ ឬយ៉ាងណា? • ប្រសិនការដើរធ្វើឲ្យមានការឈឺចាប់ នោះការប្រឈមទៅនឹងជំងឺរលាកសរសៃឈាមអាទែរមានកម្រិតខ្ពស់ ដែលអាចជាការស្ទះសរសៃឈាមអាទែរនៅអវយវៈជើង • លក្ខណៈនៃការឈឺចាប់អាចបង្ហាញចេញជាការរមួលនៅនឹងកំភួនជើងបន្ទាប់ពីការដើរក្នុងចម្ងាយណាមួយ ដែលបង្ខំឲ្យអ្នកជំងឺបញ្ឈប់ការដើរជាបណ្ដោះអាសន្ន • វាអាចជាករណីកម្រដែលការឈឺចាប់នៅពេលដើរមិនជាប់ពាក់ព័ន្ធនឹងប្រព័ន្ធសរសៃឈាម។ ប៉ុន្តែអាការៈឈឺបែបនេះអាចបណ្ដាលមកពីការរំខានដល់ប្រព័ន្ធសរសៃប្រសាទនៅខួរឆ្អឹងខ្នងទៅវិញ • ប្រសិនការឈឺចាប់កើតមានឡើងពេលដើរ និងបាត់នៅពេលសម្រាក (ជាពិសេសពេលយប់) វាអាចបង្កមកពីការទិច ឬការរលាកណាមួយ។ ចំណែកការឈឺចាប់ដែលបង្កជាអាការៈរំញោចមិនធម្មតា នោះអាចសង្ស័យទៅលើជំងឺរលាកបណ្ដុំសរសៃប្រសាទជាយ (Polynévrite) ដែលអាចជាផលវិបាកបន្ទាប់ពីការប្រើប្រាស់សារធាតុអាល់កុល ជំងឺទឹកនោមផ្អែម ការប្រើប្រាស់ឱសថដូចជា ពពួក Alcaloïde, Cisplatine (Cis-platyl) ឬ L’almitrine (Vectarion)។ អ្វីគួរធ្វើ? ប្រសិនអ្នកសង្ស័យពីជំងឺរលាកសរសៃឈាមអាទែរ ឬមានចម្ងល់ផ្សេងទៀតអ្នកគួរបន្តការធ្វើរោគវិនិច្ឆ័យដោយរួមមាន៖ • ស្ទាប និងស្ដាប់សរសៃឈាមអាទែរ • អាចបន្ថែមការពិនិត្យតាមការឆ្លុះ ដែលអាចវាស់ពីលំហូររបស់ឈាម (Examen Doppler) • សាកសួរពីកត្តាដែលធ្វើឲ្យមានការស្ទះសរសៃឈាម រួមមាន សម្ពាធឈាមឡើងខ្ពស់ កម្រិតកូឡេស្តេរ៉ុលខ្ពស់ក្នុងឈាម ជំងឺទឹកនោមផ្អែមជាពិសេសការប្រើប្រាស់សារធាតុញៀន • ជាទូទៅ វិធីសាស្រ្តព្យាបាលភាគច្រើនត្រូវធ្វើការវះកាត់។ ក្នុងករណីអ្នកជំងឺមានសម្ពាធនៅខួរឆ្អឹងខ្នង ឬជាជំងឺរលាកបណ្ដុំសរសៃប្រសាទជាយ (Polynévrite) នោះការណែនាំត្រូវ៖ • ឲ្យអ្នកជំងឺជួបពិគ្រោះជាមួយវេជ្ជបណ្ឌិតឯកទេសផ្នែកប្រព័ន្ធសរសៃប្រសាទ • ក្នុងអំឡុងការរង់ចាំជួបពិគ្រោះ អ្នកជំងឺអាចប្រើប្រាស់ វីតាមីន B1 ដែលមានឈ្មោះ Bénerva (Roche) ក្នុងកម្រិត ២គ្រាប់ក្នុងមួយថ្ងៃ។ ប្រភពយោង៖ Le Vademecum de la Médication officinale អត្ថបទ៖​ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨០ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

For Health Practitioners For Health Practitioners
Share
  • Jul 10, 2019 |
  • 6 years ago |
  • 3K views

សេចក្តីប្រកាសការរកឃើញឱសថក្លែងបន្លំម៉ាក Ketosteril® Tablets

សេចក្តីជូនដំណឹងថ្ងៃទី០៥ ខែកក្កដា ឆ្នាំ២០១៩ ពីក្រសួងសុខាភិបាលនៃព្រះរាជាណាចក្រកម្ពុជា បានបញ្ជាក់ថាក្រសួងសុខាភិបាលបានរកឃើញឱសថឈ្មោះ Ketosteril® tablets គ្មានលេខបញ្ជិកា និងគ្មានច្បាប់អនុញ្ញាតពីក្រសូងសុខាភិបាល ហើយដាក់លក់នៅលើទីផ្សារក្នុងព្រះរាជាណាចក្រកម្ពុជាក្នុងរូបភាពស្រដៀងនឹងឱសថពិតឈ្មោះ Ketosteril® tablets ដែលនាំចូលដោយគ្រឹះស្ថានអាហរ័ណ នីហរ័ណឱសថ មេហ្គា ឡាយសាយអិនស៍ ភីធីវ៉ាយ លីមីធីត មានលេខបញ្ជិកា CAM N0477IP-16 ពីក្រសួងសុខាភិបាល។ ក្រសួងក៏បានបង្ហាញនូវរូបភាពឱសថ Ketosteril® tablets ពិត និងឱសថ Ketosteril® tablets ក្លែងក្លាយដើម្បីឲ្យប្រជាពលរដ្ឋអាចធ្វើការបែងចែក និងចំណាំឱសថពិតបាន។ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

News & Events
Share
  • Jul 10, 2019 |
  • 6 years ago |
  • 3.1K views

ក្រុមហ៊ុនឈ្មោះ P.V.B PHARMA ត្រូវបានហាមឃាត់ដោយសារចែកចាយឱសថគ្មានច្បាប់អនុញ្ញាត

យោងតាមសេចក្តីប្រកាសព័ត៌មានរបស់ក្រសួងសុខាភិបាល ដែលបានចេញផ្សាយក្នុងថ្ងៃទី០៩ ខែកក្កដា ឆ្នាំ២០១៩នេះ បានបញ្ជាក់ថា ក្រសួងសុខាភិបាលបានស្រាវជ្រាវ និងពិនិត្យឃើញមានក្រុមហ៊ុនឈ្មោះ P.V.B PHARMA គ្មានច្បាប់អនុញ្ញាតពីក្រសួង ហើយកំពុងចែកចាយឱសថចំនួន ៣មុខមានបិទលតាបត្រក្លែងក្លាយដោយគ្មានលេខបញ្ជិកាត្រឹមត្រូវពីក្រសួងសុខាភិបាលឡើយគឺ៖ ១.Cadinutrivit  ២.Vitamin B1,B6,B12-HV  ៣.HV CALCI-D។ ក្រសួងសុខាភិបាលក៏បានអំពាវនាវដល់ប្រជាពលរដ្ឋ ប្រសិនបើបានជួប ឬប្រទះឃើញជនណាកំពុងចែកចាយ ទិញ និងតាំងលក់ឱសថខុសច្បាប់ទាំង ៣មុខខាងលើសូមផ្តល់ព័ត៌មានមកកាន់នាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង តាមរយៈលេខទូរស័ព្ទ៖ ០១១ ៥៧៤ ៧៨៧, ០១២ ៩៨៣ ៣៣៤, ០១២ ៨៩២  ០២២, ០១៧ ៦០៦ ៦៧០, ០១៧ ៨៦៦ ៧៦០។ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

News & Events News & Events
Share
  • Jul 10, 2019 |
  • 6 years ago |
  • 4.5K views

ខ្ញុំអាចមានបញ្ហាប្រព័ន្ធសរសៃប្រសាទទេបើឧស្សាហ៍ឈឺក្បាលយ៉ាងនេះ?

ឈឺក្បាល គឺជាអាការៈរោគដែលកើតញឹកញាប់លើបុគ្គលគ្រប់រូបពិសេសអ្នកដែលមានការងារមមាញឹក។ ប៉ុន្តែរោគសញ្ញាឈឺក្បាលនេះក៏អាចជាប់ពាក់ព័ន្ធទៅនឹងជំងឺមួយចំនួនផងដែរដូចជាបញ្ហាប្រព័ន្ធប្រសាទជាដើម។ ប៉ុន្តែប្រសិនការឈឺចាប់កើតឡើងនៅផ្នែកខាងក្រោយនៃក្បាលដែលសង្ស័យថាប៉ះពាល់ទៅនឹងប្រព័ន្ធប្រសាទ ករណីរបស់អ្នកប្រហែលជាអាចដូចទៅនឹងករណីខាងក្រោម៖ សំណួរ៖ ខ្ញុំបាទអាយុ ៣២ឆ្នាំ កម្ពស់ ១ម៉ែត្រ៧៦ ទម្ងន់ ៦៥ គីឡូក្រាម ជាវិស្វករអគ្គិសនី។ ខ្ញុំមានបញ្ហាឈឺក្បាលមួយចំហៀងផ្នែកខាងក្រោយដែលកើតឡើងយូរៗម្តងតែមិនងាយបាត់។ ពេលខ្លះអាចឈឺពេញមួយសប្តាហ៍ ហើយការឈឺនេះបានធូរស្រាលខ្លះនៅពេលគេង។ ខ្ញុំបានប្រើប្រាស់ថ្នាំបំបាត់ការឈឺចាប់ដែលមានផ្សំ Paracetamol និង Ibuprofene ៣ដងក្នុងមួយថ្ងៃជារៀងរាល់ថ្ងៃដោយខ្លួនឯងនៅពេលមានអាការៈនេះ។ តើអាការៈនេះប៉ះពាល់ប្រព័ន្ធសរសៃប្រសាទឬយ៉ាងណា? តើខ្ញុំគួរធ្វើដូចម្តេច? ចម្លើយ៖ ចំពោះការឈឺក្បាលមួយចំហៀងផ្នែកខាងក្រោយ និងពេញមួយសប្តាហ៍ តែយើងមិនដឹងថាការឈឺនេះប៉ុន្មានថ្ងៃក្នុងមួយសប្តាហ៍ និងឈឺម្តងប៉ុន្មានម៉ោង។ ចំពោះការប្រើប្រាស់ថ្នាំបំបាត់ការឈឺចាប់គ្រាន់តែជួយបន្ធូរការឈឺចាប់បណ្តោះអាសន្នប៉ុណ្ណោះ ម្យ៉ាងទៀតថ្នាំបំបាត់ការឈឺចាប់មានកម្រិតផ្សេងៗគ្នា និងមិនដឹងថាអ្នកជំងឺញ៉ាំ ៣ដងក្នុងមួយថ្ងៃក្នុងកម្រិតណាដែលមិនបាត់នោះទេ។ បើតាមការរៀបរាប់ខាងលើអាចទាក់ទងនឹងជំងឺប្រកាំងប៉ុន្តែលោកគួរតែជួបពិភាក្សាជាមួយគ្រូពេទ្យឯកទេសប្រព័ន្ធសរសៃប្រសាទខួរក្បាលដើម្បីធ្វើរោគវិនិច្ឆ័យឲ្យបានត្រឹមត្រូវហើយបើមិនមានអ្វីពាក់ព័ន្ធនឹងផ្នែកខួរក្បាលទេលោកគ្រាន់តែទទួលការព្យាបាលឲ្យបានត្រឹមត្រូវនិងដោយទៀងទាត់ក្នុងរយៈពេល៣ខែនោះអាការៈលោកនឹងអាចមានភាពប្រសើរឡើង។ បកស្រាយដោយ៖ សាស្រ្តាចារ្យមហាបរិញ្ញា ជុំ ណាវុធ ឯកទេសប្រព័ន្ធសរសៃប្រសាទសរសៃឈាមខួរក្បាល និងជានាយផ្នែកសរសៃប្រសាទខួរក្បាលនៃមន្ទីរពេទ្យមិត្តភាពខ្មែរ-សូវៀត អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៧៩ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Neurology Neurology Neurology
Share
  • Jul 09, 2019 |
  • 6 years ago |
  • 3.5K views

គន្លឹះថែរក្សារាងសម្រាប់អ្នកធ្វើការការិយាល័យ

អ្នកនឹងមិនចម្លែកទេនៅពេលមានការណែនាំជាច្រើនពីលំហាត់ប្រាណក៏ដូចជារបអាហារដើម្បីសម្រកទម្ងន់ ក៏ប៉ុន្តែអ្នកប្រហែលមិននឹកស្មានទេថា អ្នកក៏អាចស្រកគីឡូ និងថែរក្សារាងបានផងដែរ បើទោះបីកិច្ចការប្រចាំថ្ងៃរបស់អ្នកត្រូវអង្គុយនៅក្នុងការិយាល័យជាប់ជានិច្ច។ គន្លឹះខាងក្រោម អាចជាជំនួយមួយផ្នែកដើម្បីរក្សានូវរូបរាងដែលចង់បានសម្រាប់អ្នកដែលប្រើពេលសឹងតែមួយថ្ងៃពេញនៅពីមុខកុំព្យូទ័រ៖ - ញ៉ាំទឹកឲ្យបានច្រើន ការញ៉ាំទឹកឲ្យបានគ្រប់គ្រាន់យ៉ាងហោចណាស់ ២លីត្រក្នុងមួយថ្ងៃ ជាពិសេសក្នុងរដូវក្ដៅអាចជួយបញ្ចេញជាតិពុលពីក្នុងខ្លួន និងរក្សាតុល្យភាពរាងកាយ។ ក្រៅពីការញ៉ាំទឹកធម្មតា អ្នកក៏អាចជ្រើសរើសប្រភេទភេសជ្ជៈដែលចម្រាញ់ចេញភ្លាមៗពីផ្លែឈើស្រស់  ឬបន្លែ ដែលជាប្រភេទអាហារសម្បូរទៅដោយជាតិ ប៉ូតាស្យូម មានប្រសិទ្ធភាពជួយឲ្យអ្នកស្រកទម្ងន់និងអាចដុតបំផ្លាញជាតិខ្លាញ់នៅក្បាលពោះបានយ៉ាងប្រសើរ។ - រៀបចំអាហារសម្រន់ទុក អាហារសម្រន់ដែលល្អ ជាប្រភេទអាហារដែលសម្បូរទៅដោយជាតិសរសៃ ប្រូតេអីុន និងមានកាល់ឡូរីតិច ដែលជួយឲ្យអ្នកឆ្អែតបានយូរ និងកាត់បន្ថយការញ៉ាំអាហារលើសកម្រិត។ អ្នកអាចរៀបចំអាហារសម្រន់សម្រាប់ខ្លួនឯងផ្ទាល់នៅក្នុងការិយាល័យដែលរួមមាន តំណាប់ផ្លែឈើស្ងួត គ្រាប់ធញ្ញជាតិ (គ្រាប់អាល់ម៉ុន) ប័រសណ្ដែក ទឹកដោះគោ ឬយ៉ាអួរមិនមានសារធាតុធ្វើឲ្យធាត់ និងអាចជ្រើសរើសប្រភេទបន្លែ ឬផ្លែឈើដូចជា ប៉ោម ការ៉ុត និងត្រសក់ជាដើម។ - ញុំាស្ករកៅស៊ូ យោងតាមការសិក្សាមួយនៅឆ្នាំ ២០០៩ នៃ Published in Physiology &Behavior បានបង្ហាញថាការញុំាស្ករកៅស៊ូអាចជួយជំរុញដល់ការមិនឃ្លានអាហារធ្វើឲ្យអារម្មណ៍ស្រស់ស្រាយ កាត់បន្ថយភាពតានតឹង ពិសេសជួយកាត់បន្ថយការបញ្ចេញអ័រម៉ូនស្រេ្តស Cortisol ដែលជាហេតុបង្កើនកោសិកាខ្លាញ់ និងស្ដុកជាតិទឹកច្រើន ពិសេសនៅតំបន់ក្បាលពោះ។ ដូច្នោះ ការញុំាស្ករកៅស៊ូអំឡុងពេលធ្វើការងារអាចជួយអ្នកមួយផ្នែកក្នុងការកាត់បន្ថយទម្ងន់។ - ឆ្លៀតពេលធ្វើចលនា បើទោះបីជាមានកិច្ចការងាររវល់យ៉ាងណាក៏ដោយអ្នកមិនត្រូវអង្គុយជាប់ជានិច្ចពេញមួយថ្ងៃនោះទេ។ ដោយឡែក អ្នកគួរព្យាយាមឆ្លៀតពេលសម្រាកដើម្បីអាចពត់ដៃ ពត់ខ្លួន ឬធ្វើចលនាខ្លះ ដើម្បីសម្រួលដល់ដំណើរឈាមរត់របស់សរសៃឈាមនៅក្នុងរាងកាយ។ មួយវិញទៀត ចលនានោះអាចជួយដុតបំផ្លាញសារជាតិខ្លាញ់នៅក្នុងរាងកាយដែលមិនអាចធ្វើឲ្យអ្នកធាត់ដោយកន្លែង ជាពិសេសត្រង់ជើង ភ្លៅ ក្បាលពោះ និងដើមដៃជាដើម។ វិធីហាត់ប្រាណងាយៗដែលអ្នកអាចធ្វើបានគឺគ្រាន់តែ អង្គុយដាក់ខ្នងឲ្យត្រង់ លើកជើងឲ្យត្រង់ស្មើនឹងកៅអីអង្គុយរបស់អ្នកប្រហែលជា ៣ ទៅ៥ វិនាទី បន្ទាប់មកដាក់ជើងចុះវិញ ដោយអនុវត្ត ៥ដង ហើយសឹមត្រឡប់ទៅបំពេញកិច្ចការរបស់អ្នកវិញ។ - ដកដង្ហើមឲ្យវែងៗ ការធ្វើលំហាត់ប្រាណបែបដកដង្ហើមជ្រៅ ឬវែងគឺជាវិធីសាស្រ្តមួយដ៏ល្អដើម្បីជួយអ្នកក្នុងការបន្ធូរអារម្មណ៍តានតឹងនៅពេលបំពេញការងារ ជាពិសេសវាត្រូវបានបង្ហាញថាអាចជួយអ្នកក្នុងការសម្រកទម្ងន់បានផងដែរ ដោយសារ លំហាត់ប្រាណបែបនេះអាចជួយរឹតបន្តឹងសាច់ដុំនៅត្រង់ក្បាលពោះ ថែមទាំងអាចកាត់បន្ថយអត្រាការកើតជំងឺបេះដូង។ អ្នកគ្រាន់តែដកដង្ហើមចូលឲ្យបានយូរ  បន្ទាប់មកដកដង្ហើមចេញជាការស្រេច។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៧៩ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Weight Management Weight Management
Share
  • Jul 08, 2019 |
  • 6 years ago |
  • 3.5K views

ទម្លាប់មិនល្អជំរុញឲ្យមានក្រួសក្នុងតម្រងនោម

ក្រួសក្នុងតម្រងនោម កើតឡើងនៅពេលដែលដុំរឹងតូចៗធម្មតាដែលមានក្នុងទឹកនោមមិនត្រូវបានបញ្ចេញចោល និងចាប់ផ្តើមប្រមូលផ្តុំបង្កើតបានជាដុំរឹងកាន់តែធំឡើងៗនិងអាចបង្កគ្រោះថ្នាក់ដល់ជីវិត ប្រសិនបើមិនបានការព្យាបាលត្រឹមត្រូវ។ ជាក់ស្តែងមូលហេតុដែលជំរុញឲ្យកើតជាក្រួសតម្រងនោមមានច្រើន ដោយរួមបញ្ចូលទាំងកត្តាតំណពូជ និងសកម្មភាពប្រចាំថ្ងៃមិនល្អជាច្រើនរួមមាន៖ - ពិសាទឹកមិនគ្រប់គ្រាន់ បុគ្គលដែលមិនសូវចូលចិត្តញ៉ាំទឹក មានភាពប្រឈមខ្ពស់ក្នុងការកកើតក្រួសតម្រងនោម ដោយហេតុថាបរិមាណទឹកកាន់តែច្រើនការភ្ជាប់គ្នានៃដុំរឹងតូចត្រូវបានកាត់បន្ថយ ព្រមទាំងត្រូវបានបញ្ចេញជាញឹកញាប់។ ជាមធ្យមអ្នកគួរទទួលទានទឹកយ៉ាងតិច ២លីត្រក្នុង ១ថ្ងៃ តែទោះជាយ៉ាងណាតម្រូវការទឹកប្រចាំថ្ងៃអាចប្រែប្រួល អាស្រ័យទៅតាមតំបន់រស់នៅ (ក្តៅ ឬត្រជាក់) សកម្មភាពប្រចាំថ្ងៃជាដើម។  - ប្រភេទអាហារសម្បូរអុកសាឡាត (Oxalate) ក្រួសក្នុងតម្រងនោមមានច្រើនប្រភេទដែលភាគច្រើននៃប្រភេទក្រួសទាំងនោះកើតឡើងនៅពេលកាល់ស្យូម និងអុកសាឡាតចាប់ភ្ជាប់គ្នាអំឡុងពេលដែលតម្រងនោមកំពុងផលិតទឹកនោម។ អុកសាឡាត ជាសារធាតុគីមីម៉្យាងដែលសម្បូរនៅក្នុងអាហារសុខភាពដូចជាប្រភេទស្ពៃខ្មៅ សណ្តែកដី សូកូឡា តែ ដំឡូងលឿងជាដើម។ ហេតុនេះអ្នកប្រហែលគួរតែបន្ថយការបរិភោគអាហារប្រភេទនេះ ប្រសិនបើអ្នកធ្លាប់មានប្រវត្តិកើតក្រួសនេះពីមុនមក។ - អាហារប្រៃខ្លាំង  របបអាហារដែលមានផ្ទុកអំបិលច្រើនពេកអាចបង្កើននូវបរិមាណកាល់ស្យូមនៅក្នុងតម្រងនោម ហើយអាចបង្កើនហានិភ័យនៃការកកើតក្រួសតម្រងនោមផងដែរ។ អាហារទាំងនោះមានដូចជា ប្រភេទអាហារកំប៉ុង មី កញ្ចប់ អាហារផ្អាប់ សាច់ប្រឡាក់ជាដើម។ អ្នកអាចទទួលទានអំបិលជាមធ្យមប្រមាណ ២០០០មិល្លីក្រាម (២ ក្រាម) ក្នុង ១ ថ្ងៃ។ - សាច់ កត្តាមួយទៀតដែលអាចបង្កឲ្យមានហានិភ័យនៃជំងឺនេះគឺ ទឹកនោមមានលក្ខណៈអាស៊ីតខ្លាំងពេក ដែលជាទូទៅបណ្តាលមកពីការបរិភោគសាច់ក្រហម (សាច់គោ សាច់ជ្រូក...) លៀស គ្រំ ខ្យង ខ្ចៅក្នុងបរិមាណច្រើន។ ម៉្យាងវិញទៀត ប្រូតេអីុនទាំងនេះអាចបង្កើនកម្រិតកាល់ស្យូម និងបន្ថយកម្រិតស៊ីត្រាត (Citrate) ក្នុងទឹកនោមដែលជាមូលហេតុចម្បងជំរុញឲ្យដុំក្រួសកើតឡើង។ - ការប្រើប្រាស់ឱសថ ជាក់ស្តែង ជំងឺក្រួសក្នុងតម្រងនោមក៏អាចបង្កមកពីការប្រើប្រាស់ឱសថមួយចំនួនលើសកម្រិត និងរយៈពេលយូរផងដែរ ដែលឱសថទាំងនោះមានដូចជា Magnesium Trisilicate Ciprofloxacin Sulfa medications Triamterene Indinavir និងEphedrine ដែលត្រូវបានប្រើតែឯង ឬរួមបញ្ចូលគ្នាជាមួយ Guaifenesin។ សូមចងចាំថា រាល់ពេលប្រើប្រាស់ថ្នាំ ត្រូវប្រឹក្សាជាមួយវេជ្ជបណ្ឌិត ឬឱសថការីជាមុនសិន។ កាត់បន្ថយសកម្មភាពទាំងនេះ ដើម្បីរក្សាសុខភាពតម្រងនោមរបស់អ្នក។ ម៉្យាងគួរចងចាំថារាល់ពេលកើតមានអាការៈមិនប្រក្រតីណាមួយទាក់ទងនឹងតម្រងនោម សូមអញ្ជើញរួសរាន់ទៅពិគ្រោះជាមួយគ្រូពេទ្យជំនាញ។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៧៩ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Other Diseases Other Diseases
Share
  • Jul 06, 2019 |
  • 6 years ago |
  • 4.4K views

លេង Facebook យូរទៅធ្វើឲ្យបាក់ទឹកចិត្ត?

ធ្លាប់មានអារម្មណ៍ថា ច្រណែនមិត្តក្នុង Facebook មែនទេ? ធ្លាប់គិតថា ហេតុអ្វីខ្ញុំចំណាយពេលឥតប្រយោជន៍ច្រើនជាមួយ Facebookបែបនេះ? ហេតុអ្វី?.....តាមពិតមានហេតុផល ២យ៉ាងរវាងទំនាក់ទំនងនៃការបាក់ទឹកចិត្ត និងការប្រើប្រាស់ Facebook ដែលត្រូវបានបកស្រាយដូចខាងក្រោម៖ ១. ចំណាយពេលច្រើនពេក ការប្រើប្រាស់ហ្វេសប៊ុកដោយមានពេលវេលាត្រឹមត្រូវនិងក្នុងគោលបំណងប្រើប្រាស់ជាប្រយោជន៍ណាមួយច្បាស់លាស់ពិតជាមិនបានផ្តល់ជាបញ្ហាចោទនោះទេ។ ប៉ុន្តែភាគច្រើននៃអ្នកប្រើប្រាស់ដែលទទួលអារម្មណ៍អវិជ្ជមាន ពិសេសអាចបណ្តាលឲ្យបាក់ទឹកចិត្តនោះ គឺប្រើច្រើនលើសកម្រិត អូសចុះ អូសឡើង ជាពិសេសមិនបានបែងចែកពេលវេលាសម្រាប់ការប្រកបការងារ ឬរៀនសូត្រឲ្យមានប្រសិទ្ធភាពឡើយ ជាហេតុធ្វើឲ្យពួកគាត់តែងមានអារម្មណ៍ខុសឆ្គងចំពោះខ្លួនឯង ដែលមិនអាចប្រើប្រាស់ពេលវេលាឲ្យមានតម្លៃ បង្កើនចំណូល ឬបង្កើនចំណេះដូចអ្នកដទៃឬដូចដែលបានគ្រោងទុក។ ២. ចូលចិត្តប្រៀបធៀប ការសិក្សាមួយដែលត្រូវបានបោះពុម្ពផ្សាយក្នុងខែមិថុនា ឆ្នាំ២០១៦ នៃ Current Opinion in Psychology បានរកឃើញថាភាពច្រណែនមិត្តភក្តិក្នុង Facebook អាចបណ្តាលឲ្យកើតជាជំងឺបាក់ទឹកចិត្ត។ តាមរយៈ ការអូសចុះឡើង New Feeds ដែលសុទ្ធតែជារូបភាពពោរពេញដោយសុភមង្គលភាពជោគជ័យនានា ដំណើរកម្សាន្តក្រៅប្រទេស គូស្នេហ៍ដ៏ផ្អែមល្អែម ឡើងតំណែងការងារ ជាប់អាហារូបករណ៍ទៅសិក្សាក្រៅប្រទេស រាងកាយដ៏ស្រលូន ស៊ិចស៊ីចំពោះនារី ឬរាងកាយសម្បូរទៅដោយសាច់ដុំចំពោះបុរស។ល។ សុទ្ធតែអាចបណ្តាលឲ្យអ្នកទទួលអារម្មណ៍ច្រណែន ប្រៀបធៀបជីវិតអ្នកជាមួយគេព្រមទាំងប្រាថ្នាឲ្យបានដូចគេទៀតផង។ ពេលខ្លះ អ្នកតែងគិតថាហេតុអ្វីពិភពលោកនេះលម្អៀងចំពោះអ្នកម្ល៉េះ? ហេតុអ្វីអ្នកមិនអាចទទួលបានភាពរីករាយដូចគេ? ក្នុងករណីអ្នកកំពុងមានអារម្មណ៍អវិជ្ជមានបែបនេះសូមព្យាយាមអនុវត្តការគិតនិងដាក់ផែនការចំពោះខ្លួនឯងដូចខាងក្រោមដើម្បីទទួលបានអារម្មណ៍ប្រសើរឡើងវិញ៖ - ព្យាយាមកាត់បន្ថយការប្រើប្រាស់ Facebook បែបអកម្ម (Passive User) ដែលគ្រាន់តែអូសចុះឡើងដើម្បីមើលថាមានអ្វីខ្លះដែលបានកើតឡើងចំពោះមិត្តភក្តិអ្នក - កំណត់ពេលវេលាប្រើប្រាស់ឲ្យបានច្បាស់លាស់ និងប្រើក្នុងពេលកំណត់មួយ (ក្នុងករណីជា Passive User) - ត្រូវសប្បាយរីករាយ និងត្រេកអរជាមួយការទទួលបានរបស់មិត្តភក្តិអ្នក តែមិនមែនច្រណែននោះទេ - ត្រូវគិតថា ការបង្ហាញចេញរបស់មិត្តភក្តិអ្នកក្នុងបណ្តាញសង្គម គ្រាន់ជាផ្នែកមួយនៃជីវិតរបស់ពួកគេប៉ុណ្ណោះ។ គ្មាននរណាម្នាក់នឹងបង្ហាញភាពឥតខ្ចោះនៃគ្រួសារ ឬជីវិតផ្ទាល់ខ្លួនទៅឲ្យអ្នកដទៃដឹងឡើយ! ជីវិតពោរពេញទៅដោយភាពផ្អែមល្អែម ល្វីង ជូរចត់ដូចគ្នា។ ម៉្យាងអ្នកត្រូវចាំថា ជីវិតរបស់បុគ្គលម្នាក់ៗលើលោកយើងនេះមានវាសនាមិនដូចគ្នាទេ ចំណែកការកំណត់និយមន័យជោគជ័យ និងសុភមង្គលកាន់តែផ្សេងគ្នាទៀត ប៉ុន្តែសំខាន់អ្នកត្រូវចេះប្រើប្រាស់ពេលវេលាប្រចាំថ្ងៃអ្នកឲ្យអស់លទ្ធភាព ព្រមទាំងរីករាយនូវអ្វដែលអ្នកកំពុងមាន និងព្យាយាមសម្រេចនូវអ្វីដែលអ្នកប្រាថ្នានាពេលអនាគត។ Facebook មិនមែនជាកត្តាបង្កហេតុទេ ប៉ុន្តែការប្រើប្រាស់មិនត្រឹមត្រូវទៅវិញទេដែលជាបញ្ហាប្រឈមសំខាន់បណ្តាលឲ្យបាក់ទឹកចិត្តដោយមិនដឹងខ្លួន។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៧៩ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

Mental Health​ & Entertainment Mental Health​ & Entertainment
Share
  • Jul 05, 2019 |
  • 6 years ago |
  • 6K views

សញ្ញាជំងឺមហារីកលំពែងដែលអ្នកមិនចាប់អារម្មណ៍

លំពែង ជាសរីរាង្គមួយក្នុងចំណោមសរីរាង្គជាច្រើនដែលគ្រប់គ្នាស្ទើរតែមិននឹងនាដល់។ ជាទូទៅ មុខងារចម្បងរបស់វាគឺជួយដល់ការរំលាយអាហារ និងគ្រប់គ្រងកម្រិតជាតិស្ករក្នុងឈាម។ ប្រជាជនប្រមាណក្រោម ២% នឹងត្រូវបានរកឃើញថាមានជំងឺមហារីកលំពែងក្នុងជីវិតរស់នៅរបស់ពួកគេ។ កត្តាហានិភ័យនៃមហារីកលំពែង • ការរលាកលំពែងរ៉ាំរ៉ៃ • ប្រវត្តិគ្រួសារធ្លាប់មានជំងឺមហារីកលំពែង និងហ្សែនដែលអាចបង្កើនហានិភ័យនៃមហារីក (ដូចជា Lynch syndrome ជាដើម) • មានជំងឺទឹកនោមផ្អែមលើសពី ៥ឆ្នាំ • ទទួលទានអាហារប្រភេទសាច់ពណ៌ក្រហម ឬសាច់កែច្នៃច្រើន • ជក់បារី • លើសទម្ងន់ • ភេទ (កើតលើបុរសច្រើនជាងស្ត្រី) • អាយុ (ភាគច្រើនកើតលើមនុស្សចាស់លើសពី៦០ឆ្នាំ តែក៏មានករណីកើតលើអ្នកដែលមានអាយុ២០-៣០ឆ្នាំដែរ) • ជាតិសាសន៍ (បុគ្គលដែលស្ថិតក្នុងជាតិសាសន៍អាហ្វ្រិច-អាមេរិកមានហានិភ័យខ្ពស់ជាងគេក្នុងការវិវឌ្ឍទៅជាមហារីកលំពែង)។ ការព្យាករមហារីកលំពែង ជាទូទៅស្ទើរតែមិនអាចធ្វើបាន ហើយវាក៏ស្ថិតក្នុងអត្រាការស្លាប់ខ្ពស់បំផុតក្នុងចំណោមមហារីកផ្សេងទៀតផងដែរ។ ជាក់ស្តែងត្រឹម ៨%ប៉ុណ្ណោះនៃអ្នកជំងឺមហារីកលំពែងរស់នៅបាន ៥ឆ្នាំបន្ទាប់ពីធ្វើរោគវិនិច្ឆ័យដោយហេតុថាមហារីកលំពែងពិបាកកំណត់រកនៅដំណាក់កាលដំបូង។ ម៉្យាងលំពែងស្ថិតនៅជ្រៅក្នុងរាងកាយដែលដុំសាច់ដំបូងមិនអាចត្រូវបានមើលឃើញ ឬមានអារម្មណ៍ដឹង និងមិនសូម្បីអាចសម្គាល់បាន រហូតមហារីកបានរាលដាលទៅសរីរាង្គផ្សេងទៀត។ ដូច្នេះ វាពិតជាសំខាន់ណាស់ក្នុងការស្វែងយល់អំពីសញ្ញានៃមហារីកលំពែង។ សញ្ញាទូទៅនៃមហារីកលំពែងដែលអ្នកត្រូវដឹង ១. ភ្នែក និងស្បែកឡើងលឿង៖ មហារីកលំពែងចាប់ផ្តើមនៅផ្នែកក្បាលលំពែងដែលនៅជិតបំពង់ទឹកប្រមាត់។ ដុំសាច់សង្កត់ និងបិតទៅលើបំពង់ទឹកប្រមាត់ដែលនាំទឹកប្រមាត់ពីថ្លើម និងថង់ទឹកប្រមាត់កាត់តាមលំពែងទៅកាត់ពោះវៀនតូច។ តួនាទីរបស់ទឹកប្រមាត់គឺដើម្បីបំផ្លាញប៊ីលីរុយប៊ីន (Bilirubin) ដែលជាកាកសំណល់នៃកោសិកាឈាមក្រហម ដូច្នេះនៅពេលដំណើរការនេះមិនអាចធ្វើបានប៊ីលីរុយប៊ីនលើសបង្កជាសញ្ញាលឿងលើស្បែក និងភ្នែក។ ២. ហើមពោះ៖ នេះគឺជាសញ្ញាដំបូងមួយដែលគ្រប់គ្នាតែងកត់សម្គាល់ឃើញ ប៉ុន្តែវាបែរជាត្រូវបានយល់ថាជាសញ្ញាតូចតាចមិនគួរឲ្យបារម្ភ និងពុំចាំបាច់ទៅជួបគ្រូពេទ្យ។ ៣. បាត់បង់ចំណង់អាហារ និងចង្អោរ៖ មហារីកលំពែងលូតលាស់ក្នុងពោះដែលវាអាចផ្តល់សម្ពាធដល់សរីរាង្គជុំវិញរួមទាំងក្រពះផងដែរ។ ជាលទ្ធផលអ្នកជំងឺមានអាម្មណ៍ចង្អោរ ឬមានអារម្មណ៍ថាឆ្អែតសូម្បីតែមិនបានញ៉ាំអ្វីសោះជាច្រើនម៉ោង។ លើសពីនេះអ្នកជំងឺក៏អាចមានអារម្មណ៍ថាឈឺសូម្បីតែពេលញ៉ាំ។ ៤. ស្រកទម្ងន់៖ ការបាត់បង់ចំណង់នៃការទទួលទានអាហារ អាចងាយនឹងធ្វើឲ្យមានការស្រកចុះនូវទម្ងន់ខ្លួនលឿន ដែលជាធម្មតាកំណត់ដោយការថយចុះលើសពី៥%នៃទម្ងន់ខ្លួន ក្នុងចន្លោះពី៦ខែ ដល់១ឆ្នាំ។ ៥. ឈឺខ្នងចង្កេះ៖ នៅពេលមហារីកលំពែងលូតលាស់ វាសង្កត់ ឬផ្តល់សម្ពាធដល់ឆ្អឹងកងខ្នងផ្នែកខាងក្រោម និងសាច់ដុំខ្នង បង្កឲ្យមានការឈឺចាប់ថេរ។ បើការឈឺចាប់នេះនៅតែបន្តជាដរាប អ្នកត្រូវស្វែងរកការត្រួតពិនិត្យភ្លាម។ ៦. ទឹកនោមពណ៌ស្រអាប់៖ ពណ៌ស្រអាប់នៃទឹកនោមជាញឹកញាប់ត្រូវបានសម្គាល់ថាជាសញ្ញាណដំបូងនៃមហារីកលំពែងដែរ។ ដោយសារតែដុំសាច់បង្កឲ្យទឹកប្រមាត់ចេញតិច និងកម្រិតប៊ីលីរុយប៊ីនក្នុងឈាមកើនឡើង ទឹកនោមក្លាយជាពណ៌ត្នោត។ ប្រសិនអ្នកព្យាយាមបង្កើនការញ៉ាំទឹក ប៉ុន្តែទឹកនោមនៅមិនប្រែពណ៌មកធម្មតាវិញ វាដល់ពេលដែលអ្នកត្រូវត្រួតពិនិត្យរកសញ្ញាដំបូងនៃមហារីកលំពែងហើយ។ ៧. រមាស់ជាប្រចាំ៖ គ្រប់ការរមាស់ស្បែកទាំងអស់គឺជាសញ្ញាព្រមានដំបូងនៃជំងឺមហារីកលំពែង។ ដោយសារប៊ីលីរុយប៊ីនកើនឡើងក្នុងស្បែក ជាមូលហេតុធ្វើឲ្យរមាស់មុនលេចចេញសញ្ញាលឿងស្បែក។ ដូច្នេះបើអ្នកមិនអាចរកឃើញនូវសញ្ញានៃការរមាស់របស់អ្នកដូចជា សត្វខាំ ឬប្រតិកម្មអាល្លែកហ្ស៊ី និងមិនជាបន្ទាប់ពីលាបថ្នាំទេនោះអ្នកត្រូវជួបគ្រូពេទ្យដើម្បីត្រួតពិនិត្យជាបន្ទាន់។ ៨. លាមកពណ៌ស្លេក និងមានក្លិនស្អុយ៖ លាមកពណ៌ប្រផេះ ឬស្លេកជាងធម្មតា និងមានខ្លាញ់ គឺជាសញ្ញាមិនល្អនោះទេ។ វាកើតឡើងដោយសារតែការប្រែប្រួលនៃដំណើរការប៊ីលីរុយប៊ីន ដែលជាធម្មតាវាត្រូវបានបញ្ចេញចោលតាមរយៈពោះវៀនជាលាមក និងមានពណ៌ត្នោតចាស់ ប៉ុន្តែនៅពេលទឹកប្រមាត់មិនមានគ្រប់គ្រាន់ព្រោះដុំសាច់បានទៅរារាំង ទើបធ្វើឲ្យប៊ីលីរុយប៊ីនមិនអាចបញ្ចេញចោលបាន និងបែរជាប្រមូលផ្ដុំនៅក្នុងប្រព័ន្ធរាងកាយទៅវិញ ដែលជាហេតុធ្វើឲ្យពណ៌ និងរូបរាងលាមកមានសភាពប្រែប្រួល។ នេះអាចបញ្ជាក់បានថាជាមូលហេតុនៃមហារីកលំពែង។ ៩. ឈឺពោះ៖ ការឈឺចាប់ដែលមិនមានភាពច្បាស់លាស់អាចជាសញ្ញាដំបូងនៃជំងឺមហារីកលំពែង ដោយសារតែទីតាំងលំពែងនៅក្រោយ ផ្នែកខាងក្រោមពោះ ក្រោយក្រពះ ដុំសាច់នោះអាចធ្វើឲ្យអ្នកឈឺក្រពះផ្នែកខាងក្រោម ដោយមិនគិតលើអ្វីដែលអ្នកបានញ៉ាំ។ ចងចាំថាវាតែងតែល្អបំផុតក្នុងការត្រួតពិនិត្យនូវសញ្ញាសង្ស័យនិងបញ្ជាក់ថាពុំមានបញ្ហា ជាជាងបាត់បង់អ្វីមួយដែលសំខាន់! បកស្រាយដោយ៖ វេជ្ជបណ្ឌិត Turobova Tatiana ឯកទេសមហារីកចំពោះកុមារ និងមហារីកទូទៅ ព្រមទាំងជាប្រធានផ្នែកជំងឺមហារីកនៅមន្ទីរពេទ្យសាកលវិទ្យាល័យអន្តរជាតិសែនសុខ អត្ថបទ៖​ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨០ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

Cancer & Blood Disease Cancer & Blood Disease Cancer & Blood Disease
Share
Top