Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout

រាងកាយ ជាចាំបាច់ត្រូវការវីតាមីនជាច្រើនប្រភេទសម្រាប់ការទ្រទ្រង់ និងលូតលាស់។ ជាក់ស្ដែងវីតាមីនទាំងនោះមួយផ្នែកមានសមត្ថភាពផលិតដោយខ្លួនឯងនៅក្នុងរាងកាយ ចំណែកមួយផ្នែកទៀតទាមទារយកពីខាងក្រៅតាមរយៈចំណីអាហារ។ តួយ៉ាង វីតាមីន C គឺជាប្រភេទវីតាមីនម៉្យាងដែលសម្បូរនៅក្នុងប្រភេទអាហារដូចជាផ្លែក្រូច ប៊ឺរី ដំឡូង ប៉េងប៉ោះ បន្លែ ឬស្ពៃស្រស់ៗជាច្រើន ដែលគួរទទួលទានឲ្យបានជាប្រចាំ។ បន្ថែមពីវត្តមាននៅក្នុងរបបអាហារខាងលើ វីតាមីនប្រភេទនេះ ក៏ត្រូវបានផលិតឡើងជាឱសថបំប៉ន ក្រោមទម្រង់ជាថ្នាំគ្រាប់ ឬទំពារ ដើម្បីបំពេញភាពខ្វះខាតណាមួយទៅតាមបុគ្គលម្នាក់ៗផងដែរ។ លក្ខណៈឱសថ វីតាមីន C ឬអាស៊ីតអាស្កូប៊ិច ជាសារធាតុបំប៉នដែលមានសុវត្ថិភាព និងប្រសិទ្ធភាពមួយ ដែលមិនត្រឹមតែប្រើប្រាស់សម្រាប់ជាជំនួយនៅពេលមានជំងឺផ្ដាសាយប៉ុណ្ណោះទេ វាក៏ជាវីតាមីនម៉្យាងដែលចាំបាច់សម្រាប់ការលូតលាស់ និងមុខងាររបស់សារពាង្គកាយ ក៏ដូចជាថែរក្សាដំណើរការរបស់ប្រព័ន្ធភាពស៊ាំក្នុងរាងកាយទៀតផង។ បន្ថែមពីនោះ វាក៏ត្រូវបានសង្កេតឃើញឲ្យប្រើប្រាស់ក្នុងករណីជំងឺមួយចំនួនដូចជា៖ • ជំងឺសរសៃឈាមបេះដូង • បញ្ហាសុខភាពអំឡុងពេលពពោះ • សុខភាពភ្នែក • ភាពជ្រីវជ្រួញនៃស្បែក ជាដើម។ ដោយឡែក ក្នុងករណីកង្វះវីតាមីន C ក្នុងរាងកាយអាចធ្វើឲ្យប្រឈមទៅនឹងបញ្ហាសុខភាពធ្ងន់ធ្ងរឈ្មោះថា Scurvy ដែលបង្ហាញចេញជារោគសញ្ញាដូចជាចុះខ្សោយ ស្លេកស្លាំង ស្នាមជាំលើស្បែក ឬការហូរឈាមនៅនឹងអញ្ចាញជាដើម។ របៀប និងកម្រិតប្រើប្រាស់ គួរប្រើប្រាស់ឱសថតាមការណែនាំពីសំណាក់វេជ្ជបណ្ឌិតជំនាញ ដោយកម្រិតជាទូទៅសម្រាប់មនុស្សពេញវ័យគឺបុរស ៩០មិល្លីក្រាម និងស្រ្តី ៧៥ មិល្លីក្រាមក្នុងមួយថ្ងៃ។ ដោយឡែក ចំពោះស្រ្តីមានផ្ទៃពោះត្រូវទទួលទានវីតាមីន C ក្នុងកម្រិត ១២០មិល្លីក្រាម និង១៣០មិល្លីក្រាមសម្រាប់ស្រ្តីកំពុងបំបៅដោះកូន។ ផលរំខានឱសថ ផលរំខានរបស់វីតាមីន C អាចកើតមាន ឬប្រែប្រួលទៅតាមកម្រិតនៃការប្រើប្រាស់ថ្នាំ។ ក្នុងករណីនេះដែរក៏អាចបណ្តាលឲ្យអ្នកជំងឺមួយចំនួនមានអាការៈធីងធោង ងងុយគេង រាក ក្អួតចង្អោរ ឈឺក្បាល និងចង្វាក់បេះដូងលោតមិនទៀងទាត់ ឬញាប់។ល។ ប៉ុន្តែប្រសិនអាការៈខាងលើនៅតែបន្តស្តែងចេញ និងមានលេចចេញនូវរោគសញ្ញាដទៃទៀត អ្នកត្រូវប្រឹក្សាជាមួយអ្នកជំនាញជាបន្ទាន់។ លើសពីនេះប្រសិនបើអ្នកជំងឺប្រើប្រាស់ឱសថនេះច្រើនលើសពី ២០០០មិល្លីក្រាមក្នុងមួយថ្ងៃនោះវាអាចបណ្តាលឲ្យមានការប្រឈមនឹងបញ្ហាក្រួសក្នុងតម្រងនោម និងជំងឺតម្រងនោមផ្សេងៗទៀត។ អន្តរកម្មឱសថ ការប្រើប្រាស់ឱសថច្រើនក្នុងពេលតែមួយ អាចបង្កើនឬបន្ថយប្រសិទ្ធភាពឱសថ និងបង្កើនហានិភ័យនៃផលរំខានរបស់ឱសថណាមួយ។ ជាក់ស្តែងវីតាមីន C ត្រូវបានណែនាំឲ្យប្រើប្រាស់ដាច់ដោយឡែកពីឱសថមួយចំនួនដូចជា៖ • អាលុយមីញ៉ូម • ការព្យាបាលដោយប្រើគីមី • ឱសថពពួកអឺស្រ្តូហ្សែន (Estrogen) • ឱសថក្នុងក្រុម Protease inhibitors • ឱសថ Statins និង Niacin • ឱសថក្នុងក្រុម Warfarin ៖ដូចជាឱសថ Coumadin និង Jantoven។ ដើម្បីចៀសវាងហានិភ័យ និងផលរំខានដែលកើតមានពីអន្តរកម្មឱសថ អ្នកគួរពិគ្រោះយោបល់ ឬប្រាប់ទៅកាន់វេជ្ជបណ្ឌិតក្នុងករណីអ្នកកំពុងប្រើប្រាស់ឱសថផ្សេងទៀត មុននឹងសម្រេចចិត្តប្រើប្រាស់ឱសថនេះ។ បម្រុងប្រយ័ត្ន ការប្រើប្រាស់វីតាមីន C ក៏ទាមទារនូវការប្រុងប្រយ័ត្នផងដែរក្នុងករណី៖ • ចំពោះស្រ្តីមានផ្ទៃពោះ និងស្រ្តីបំបៅដោះ អាចប្រើប្រាស់តែក្នុងករណីចាំបាច់ និងស្ថិតក្នុងកម្រិតមួយច្បាស់លាស់មិនឲ្យលើសពី ២០០០ មិល្លីក្រាម ក្នុងមួយថ្ងៃ ពិសេសត្រូវស្ថិតក្រោមការអនុញ្ញាតពីគ្រូពេទ្យជាមុនសិន • អ្នកជំងឺទឹកនោមផ្អែម  ជំងឺភ្លេចភ្លាំង ជំងឺមហារីក បញ្ហាបេះដូង (គាំងបេះដូង ចុកទ្រូង ឬខ្សោយបេះដូង) សម្ពាធឈាមឡើងខ្ពស់ និងបញ្ហាតម្រងនោមសុទ្ធតែទាមទារការពិគ្រោះយោបល់ជាមួយវេជ្ជបណ្ឌិតជំនាញ ឬឱសថការីមុនសម្រេចចិត្តប្រើប្រាស់ឱសថនេះ • វីតាមីន C អាចបាត់បង់ប្រសិទ្ធភាពក្នុងករណីប្រើប្រាស់សារធាតុអាល់កុល និងសារធាតុញៀនស្របពេលជាមួយគ្នា។ គួរបញ្ជាក់ផងដែរសម្រាប់ វីតាមីន C ដែលកំពុងពេញនិយម និងត្រូវបានណែនាំឲ្យប្រើប្រាស់យ៉ាងច្រើន នោះមានឈ្មោះដូចជា៖ Laroscorbine effervescent, Vitascorbol effervescent និង Nat C ជាដើម។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨៤ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក

Pseudoephedrine គឺជាប្រភេទឱសថបំបាត់អាការៈតឹងច្រមុះ (Decongestant) ដែលមានមុខងារទៅលើសរសៃឈាមច្រមុះផ្ទាល់។ វាជាសារធាតុសកម្មមួយដែលភាគច្រើនត្រូវបានផលិតឡើងរួមបញ្ចូលជាមួយសារធាតុសកម្មឱសថបំបាត់ផ្ដាសាយផ្សេងទៀត និងក្រោមទម្រង់ជាច្រើនរួមមាន ឱសថគ្រាប់ សូលុយស្យុង និងម្សៅជាដើម។ សកម្មភាពឱសថ Pseudoephedrine មានសកម្មភាពទៅលើ Alpha-adrenergic receptors នៃភ្នាសប្រព័ន្ធផ្លូវដង្ហើមដែលធ្វើឲ្យមានការបង្រួមសរសៃឈាមនៅនឹងច្រមុះផ្ទាល់។ សកម្មភាពនេះបានទៅជួយកាត់បន្ថយការហើម បំបាត់តឹងច្រមុះ និងបង្កើនផ្លូវដង្ហើមឲ្យបានល្អឡើងវិញ នៅពេលមានជំងឺដូចជា ផ្ដាសាយ ជំងឺនៅប្រព័ន្ធផ្លូវដង្ហើម អាល្លែកហ្ស៊ី និងជំងឺរលាកទងសួត។ល។ Pseudoephedrine ត្រូវបានសង្កេតឃើញមានប្រសិទ្ធភាពរហូតទៅដល់ ១២ ម៉ោង ដោយកំហាប់ឱសថអាចកើនឡើងខ្ពស់បំផុតក្នុងចន្លោះ៣០ ទៅ ៦០នាទីបន្ទាប់ពីការលេប និងប្រែប្រួលទៅតាមប្រភេទទម្រង់ឱសថ។ ឱសថនេះត្រូវបានធ្វើមេតាបូលីសមួយផ្នែកនៅក្នុងថ្លើម និងត្រូវបានបញ្ចេញចោលតាមរយៈទឹកនោម។ កម្រិតប្រើប្រាស់ គួរប្រើប្រាស់ឱសថតាមការណែនាំពីសំណាក់វេជ្ជបណ្ឌិតជំនាញ ដោយកម្រិតជាទូទៅសម្រាប់មនុស្សពេញវ័យគឺមិនឲ្យលើសពី ២៤០ មិល្លីក្រាមក្នុងមួយថ្ងៃ។ ផលរំខានឱសថ Pseudoephedrine អាចបណ្តាលឲ្យអ្នកជំងឺមួយចំនួនមានអាការៈធីងធោង ខ្សោយ ក្អួតចង្អោរបាត់បង់ចំណង់អាហារ ឈឺក្បាល និងងងុយគេងចំណែកផលរំខានផ្សេងទៀតក៏អាចកើតមានឡើងផងដែរដោយតម្រូវឲ្យអ្នកជំងឺទៅជួបគ្រូពេទ្យរួមមាន៖ • ភ័យ • វិលមុខ • គេងមិនលក់ • ឈឺពោះ • ពិបាកក្នុងការដកដង្ហើម • ចង្វាក់បេះដូងលោតមិនទៀងទាត់ ឬញាប់។ល។ អន្តរកម្មឱសថ ការប្រើប្រាស់ឱសថច្រើនក្នុងពេលតែមួយ អាចបង្កើនឬបន្ថយប្រសិទ្ធភាពឱសថ និងបង្កើនហានិភ័យនៃផលរំខានរបស់ឱសថណាមួយ។ ជាក់ស្តែង Pseudoephedrine ត្រូវបានណែនាំឲ្យប្រើប្រាស់ដាច់ដោយឡែកពីឱសថមួយចំនួនដូចជា៖ • ឱសថក្នុងក្រុម MAO inhibitors៖ Isocarboxazid, Linezolid, Methylene blue និង Phenelzine • ឱសថពពួក Stimulants៖ Caffeine, Dextroamphetamine, Ephedra និង Tebutaline • ឱសថព្យាបាលលើសសម្ពាធឈាម៖ ពពួក Beta-blockers ពពួក Calcium Channel blockers, Guanethidine និង Methyldopa ជាដើម។ ដើម្បីចៀសវាងហានិភ័យ និងផលរំខានដែលកើតមានពីអន្តរកម្មឱសថ អ្នកគួរពិគ្រោះយោបល់ ឬប្រាប់ទៅកាន់វេជ្ជបណ្ឌិតក្នុងករណីអ្នកកំពុងប្រើប្រាស់ឱសថផ្សេងទៀត មុននឹងសម្រេចចិត្តប្រើប្រាស់ឱសថ Pseudoephedrine។ បម្រុងប្រយ័ត្ន ការប្រើប្រាស់ឱសថ Pseudoephedrine ក៏ទាមទារនូវការប្រុងប្រយ័ត្នផងដែរក្នុងករណី៖ • អាល្លែកហ្ស៊ីជាមួយសារធាតុសកម្មនៅក្នុងឱសថឬធ្លាប់មានប្រតិកម្មជាមួយឱសថ Ephedrine និង Phenylephrineជាដើម • អ្នកដែលមានជំងឺទឹកនោមផ្អែម ជំងឺទឹកដក់ក្នុងភ្នែក ជំងឺថ្លើម បញ្ហាបេះដូង (គាំងបេះដូង ចុកទ្រូង ឬខ្សោយបេះដូង) សម្ពាធឈាមឡើងខ្ពស់ ពិបាកបត់ជើងតូច (បញ្ហាក្រពេញប្រូស្តាតរីកធំ) និងបញ្ហាតម្រងនោម សុទ្ធតែទាមទារការពិគ្រោះយោបល់ជាមួយវេជ្ជបណ្ឌិតជំនាញ ឬឱសថការីមុនសម្រេចចិត្តប្រើប្រាស់ឱសថនេះ • ឱសថ Pseudoephedrine  អាចធ្វើឲ្យអ្នកមានបញ្ហាវិលមុខខ្លាំងក្នុងករណីប្រើប្រាស់សារធាតុអាល់កុល និងសារធាតុញៀនស្របពេលជាមួយគ្នា • ការប្រើប្រាស់ចំពោះស្រ្តីមានផ្ទៃពោះ ត្រូវធ្វើឡើងក្នុងករណីដែលចាំបាច់បំផុត និងស្ថិតក្រោមការអនុញ្ញាតរបស់វេជ្ជបណ្ឌិតតែប៉ុណ្ណោះ។ គួរបញ្ជាក់ផងដែរ សារធាតុសកម្ម Pseudoephedrine អាចមានរួមបញ្ចូលនៅក្នុងឱសថមួយចំនួននៅលើទីផ្សារដូចជា៖ Procold Flu, Zyrtec-D និង Panadol Cold+Flu ជាដើម។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ​ លេខ ៨៣ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក

វេជ្ជសាស្រ្តនាពេលបច្ចុប្បន្ន នៅមិនទាន់អាចព្យាបាលជំងឺសន្លាក់ឲ្យជាសះស្បើយនៅឡើយទេ ដោយការព្យាបាលអាចមានប្រសិទ្ធភាពត្រឹមគ្រប់គ្រងនិងសម្រួលនូវរោគសញ្ញាតែប៉ុណ្ណោះតាមរយៈការប្រើប្រាស់ឱសថរួមផ្សំគ្នាមួយចំនួន។ ជាក់ស្ដែង Allopurinol ជាសារធាតុសកម្មឱសថដ៏ចម្បងមួយ ដែលមិនអាចខ្វះបានសម្រាប់ការព្យាបាលសព្វថ្ងៃនេះ។ លក្ខណៈរបស់ឱសថ Allopurinol គឺជាឱសថស្ថិតនៅក្នុងប្រភេទ Xanthine oxidase inhibitor ដែលមានសមត្ថភាពចម្បងទៅបន្ថយកម្រិតជាតិអាស៊ីតអ៊ុយរិចនៅក្នុងឈាម។ ជាមួយសមត្ថភាពកាត់បន្ថយជាតិអាស៊ីតនេះហើយ ទើបAllopurinol ត្រូវបានប្រើប្រាស់សម្រាប់ស្ថានភាពជំងឺដូចជា៖ • ជំងឺសន្លាក់ • ក្រួសក្នុងតម្រងនោម • ការប្រមូលផ្ដុំអាស៊ីតអ៊ុយរិចក្នុងរាងកាយបណ្តាលមកពីការទទួលទានភេសជ្ជៈ សាច់ ឬគ្រឿងស្រវឹងច្រើនហួសប្រមាណជាដើម។ សកម្មភាពឱសថ ជាមួយចំណាត់ថ្នាក់នៅក្នុងប្រភេទ Xanthine oxidase inhibitor នោះមានន័យថាឱសថមានសមត្ថភាពទៅបញ្ឈប់មុខងាររបស់អង់សុីម Xanthine oxidase។ ជាទូទៅ អង់ស៊ីម Xanthine oxidase មានតួនាទីរ៉ាប់រងក្នុងការបំប្លែងអង់ស៊ីមពីរទៀតគឺ Hypoxanthine និងXanthineឲ្យក្លាយទៅជាអាស៊ីតអ៊ុយរិច។ នៅពេលរាងកាយត្រូវបានប្រមូលផ្ដុំដោយសារធាតុអាស៊ីតអ៊ុយរិចជាច្រើនជាពិសេសនៅតាមសន្លាក់ នោះវានឹងបង្កឲ្យមានការឈឺចាប់ទើបឱសថAllopurinol ត្រូវបានតម្រូវឲ្យប្រើប្រាស់ក្នុងគោលបំណងកាត់បន្ថយការកកផ្ដុំនៃអាស៊ីតអ៊ុយរិចទាំងនោះ។ របៀប និងកម្រិតប្រើប្រាស់ • ឱសថតម្រូវឲ្យប្រើប្រាស់មួយថ្ងៃម្តង ឬអាចប្រែប្រួលទៅតាមវេជ្ជបញ្ជារបស់គ្រូពេទ្យ។ គួរលេបបន្ទាប់ពីញ៉ាំអាហាររួច ដើម្បីកាត់បន្ថយការប៉ះពាល់លើក្រពះនិងត្រូវញ៉ាំទឹកឲ្យបានច្រើន • ការផ្លាស់ប្ដូរកម្រិតដូសរបស់ឱសថ អាចធ្វើឡើងទៅតាមលទ្ធផលបានមកពីប្រសិទ្ធភាពនៃការព្យាបាល ដូចនេះអ្នកត្រូវប្រើប្រាស់ឲ្យបានទៀងពេលនិងជាប្រចាំ • ជាក់ស្ដែងការព្យាបាលជំងឺសន្លាក់៖ ឱសថអាចចាប់ផ្តើមបង្ហាញពីប្រសិទ្ធភាពក្នុងអំឡុងពេល ២ ទៅ ៣អាទិត្យឡើងទៅ។ ក្រៅពីការប្រើប្រាស់ Allopurinol អ្នកជំងឺក៏តម្រូវឲ្យប្រើប្រាស់ឱសថផ្សេងទៀតផងដែរ សម្រាប់បំបាត់ការឈឺចុកចាប់ដូចជា Colchicine, Ibuprofen ឬIndomethacin ជាដើម។ ផលរំខានឱសថ Allopurinol អាចបណ្តាលឲ្យអ្នកជំងឺមួយចំនួនមានអាការៈធីងធោង និងងងុយ ចំណែកផលរំខានផ្សេងទៀតក៏អាចកើតមានឡើងផងដែររួមមាន៖ • ស្បែកឡើងក្រហម • រាក • ចង្អោរ ក្អួត • ឈឺពោះ • ស្រកទម្ងន់។ល។ អន្តរកម្មឱសថ ការប្រើប្រាស់ឱសថច្រើនក្នុងពេលតែមួយ អាចបង្កើន ឬបន្ថយប្រសិទ្ធភាពរបស់ឱសថណាមួយ។ ជាក់ស្ដែងAllopurinol អាចនឹងមានអន្តរកម្មជាមួយឱសថពង្រាវឈាម Warfarin ឱសថ Chlorpropamide និងឱសថ Didanosine ជាដើម។ ដូច្នេះ ដើម្បីចៀសផុតពីហានិភ័យបណ្តាលមកពីអន្តរកម្មឱសថនានា អ្នកគួររក្សាទុកកំណត់ត្រាឱសថដែលកំពុងប្រើប្រាស់ ដើម្បីធ្វើការពិភាក្សា និងទទួលបានការអនុញ្ញាតពីវេជ្ជបណ្ឌិតជាមុនសិន។ បម្រុងប្រយ័ត្ន គួរចៀសវាង ឬត្រូវមានការប្រុងប្រយ័ត្នខ្ពស់ក្នុងការប្រើប្រាស់ឱសថប្រសិនអ្នក៖ • អាល្លែកហ្ស៊ីជាមួយសារធាតុសកម្មនៅក្នុងឱសថ • មានប្រវត្តិជំងឺ ថ្លើម តម្រងនោម ទឹកនោមផ្អែមឬសម្ពាធឈាមឡើងខ្ពស់ • ជាស្រ្តីកំពុងមានផ្ទៃពោះ ឬអំឡុងបំបៅដោះកូន។ សម្រាប់ឱសថ Allopurinol ដែលសង្កេតឃើញមាននៅក្នុងទីផ្សារបច្ចុប្បន្នរួមមានឈ្មោះ Allopurinol Sandoz®, Zyloprim® និងZyloric។ល។ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក

ដោយហេតុថាកម្រិតនៃការឈឺចាប់មានភាពខុសគ្នាទៅតាមជំងឺនីមួយៗទើបការផលិតឱសថបំបាត់ការឈឺចាប់ក៏មានប្រភេទផ្សេងៗគ្នាទៅតាមនោះដែរ។ ជាក់ស្ដែងនៅលើទីផ្សារ ឱសថបំបាត់ការឈឺចាប់ឃើញមានច្រើនប្រភេទចាប់ពីកម្រិតស្រាល មធ្យម និងធ្ងន់ធ្ងរ ដោយនៅក្នុងនោះ Diclofenac គឺជាប្រភេទឱសថម៉្យាងដែលត្រូវបានប្រើប្រាស់សម្រាប់ព្យាបាលការឈឺចាប់ចំពោះស្ថានភាពជំងឺរ៉ាំរ៉ៃមួយចំនួន។ លក្ខណៈឱសថ Diclofenac គឺជាឱសថស្ថិតនៅក្នុងក្រុម Nonsteroidal anti-inflammatory drug (NSAID) មានលក្ខណៈប្រឆាំងការឈឺចាប់ បំបាត់រលាកនិងបន្ថយកម្ដៅ ហើយត្រូវបានផលិតឡើងក្នុងទម្រង់ជាច្រើនរួមមានឱសថគ្រាប់ សូលុយស្យុង ម្សៅ និងជែលសម្រាប់លាបជាដើម។ល។ វាជាឱសថមានសមត្ថភាពអាចកាត់បន្ថយអង់ស៊ីមនៅក្នុងរាងកាយដែលបង្កឲ្យឈឺចាប់ និងរលាក។ សកម្មភាពឱសថ Diclofenac ត្រូវបានបង្ហាញពីប្រសិទ្ធភាពក្នុងការព្យាបាលស្ថានភាពឈឺចាប់និងរលាកស្រួចស្រាវ និងរ៉ាំរ៉ៃផងដែរ តាមរយៈសកម្មភាពទៅបន្ថយការសំយោគ Prostaglandin ដោយបិទទៅលើអង់ស៊ីម Cyclooxygenase-1 (COX-1) និង Cyclooxygenase-2 (COX-2) ក្នុងឥទ្ធិពលស្មើគ្នា។ ជាមួយសកម្មភាពបែបនេះ វាត្រូវបានប្រើប្រាស់សម្រាប់ព្យាបាល និងសម្រាលអាការៈជាប់គាំងសន្លាក់បណ្តាលមកពី៖ • ជំងឺរលាកសន្លាក់ឆ្អឹង (នៅជង្គង់ កជើង ម្រាមជើង កែងដៃ កដៃ និងដៃជាដើម) • ជំងឺរលាកសន្លាក់ធ្ងន់ធ្ងរ និងរ៉ាំរ៉ៃ • ជំងឺស្បែកស្ងួតខ្លាំងបណ្តាលមកពីកម្ដៅព្រះអាទិត្យ (Actinic keratosis) ដែលត្រូវបានព្យាបាលតាមឱសថទម្រង់ជែលសម្រាប់លាបផ្ទាល់ទៅលើស្បែក • ជំងឺផ្សេងទៀតទៅតាមការណែនាំរបស់គ្រូពេទ្យ។ កម្រិត និងការប្រើប្រាស់ឱសថ ការប្រើប្រាស់ឱសថនៅកម្រិតណាមួយគឺអាស្រ័យទៅតាមស្ថានភាព និងការណែនាំរបស់គ្រូពេទ្យ ដែលជាទូទៅ៖ • ឱសថគ្រាប់៖ អាចប្រើបាន ២ ទៅ៣ដងក្នុងមួយថ្ងៃ ដែលចំនួនដូសមិនឲ្យលើសពី ១៥០មិល្លីក្រាម • ឱសថជែល៖ អាចលាបនៅទីតាំងដែលឈឺ ៤ដងក្នុងមួយថ្ងៃ ឬអាចប្រែប្រួលទៅតាមការអនុញ្ញាតរបស់គ្រូពេទ្យ។ ចៀសវាងងូតទឹក ឬគ្របស្បែកភ្លាមៗបន្ទាប់ពីលាបឱសថរួច។ ផលរំខាន ផលរំខានជាទូទៅនៃឱសថ Diclofenac អាចមានដូចជា៖ • ឈឺក្រពះ ឬខ្យល់ក្នុងពោះ • ចង្អោរ ក្អួត • ឈឺក្បាល ឬធីងធោង • រមាស់លើស្បែក • បែកញើស • សម្ពាធឈាមកើនឡើង • ហើមដៃ ឬជើង។ អន្តរកម្មឱសថ ការប្រើប្រាស់ឱសថច្រើនក្នុងពេលតែមួយ អាចធ្វើឲ្យថយចុះប្រសិទ្ធភាព ឬបង្កើនហានិភ័យនៃផលរំខានរបស់ឱសថណាមួយ។ ជាក់ស្ដែង Diclofenac ត្រូវបានណែនាំឲ្យប្រើប្រាស់ដាច់ដោយឡែកពីឱសថមួយចំនួនដូចជា៖ • ឱសថព្យាបាលលើសសម្ពាធឈាម៖ Captopril, Lisinopril, Losartan និង Valsartan • ឱសថក្នុងក្រុម Corticosteroids៖ Dexamethasone និង Prednisone • ឱសថពង្រាវឈាម៖ Dabigatran, Enoxaparin និងWarfarin ជាដើម។ ដើម្បីចៀសវាងហានិភ័យដែលកើតមានពីអន្តរកម្មឱសថ អ្នកគួរប្រាប់ទៅកាន់វេជ្ជបណ្ឌិតក្នុងករណីអ្នកកំពុងប្រើប្រាស់ឱសថផ្សេងទៀតមុនពេលសម្រេចចិត្តប្រើប្រាស់ឱសថ Diclofenac។ បម្រុងប្រយ័ត្ន ការប្រើប្រាស់ឱសថ Diclofenac ក៏ទាមទារនូវការប្រុងប្រយ័ត្នផងដែរក្នុងករណី៖ • អ្នកមានប្រតិកម្មនឹងសារធាតុសកម្មក្នុងឱសថ ឬធ្លាប់មានប្រតិកម្មជាមួយឱសថ Aspirin និងឱសថក្នុងក្រុម NSAIDs ដទៃទៀតដូចជា Ibuprofen, Naproxen ឬ Celecoxib ជាដើម • អ្នកដែលមានជំងឺហឺត ជំងឺថ្លើម បញ្ហាក្រពះពោះវៀន (ហូរឈាម ឬរលាក) ជំងឺបេះដូងសម្ពាធឈាមឡើងខ្ពស់ ជំងឺឈាម និងបញ្ហាតម្រងនោមសុទ្ធសឹងតែទាមទារការពិគ្រោះយោបល់មុនពេលប្រើប្រាស់ឱសថ • ឱសថ Diclofenac អាចធ្វើឲ្យប្រឈមនឹងបញ្ហាហូរឈាមក្នុងក្រពះកាន់តែខ្ពស់ ក្នុងករណីប្រើប្រាស់សារធាតុអាល់កុល និងសារធាតុញៀនស្របពេលជាមួយគ្នា • ចៀសវាងនៅក្រោមពន្លឺថ្ងៃច្រើន ដោយហេតុថាឱសថអាចបង្កជាផលរំខាននានានៅពេលប៉ះជាមួយពន្លឺព្រះអាទិត្យ។ អ្នកអាចលាបឡេការពារកម្ដៅថ្ងៃនិងស្លៀកសម្លៀកបំពាក់ជិតៗនៅពេលចេញទៅខាងក្រៅ • ការប្រើប្រាស់ចំពោះស្រ្តីមានផ្ទៃពោះ ត្រូវធ្វើឡើងតែក្នុងករណីចាំបាច់បំផុតនិងក្រោមការអនុញ្ញាតរបស់គ្រូពេទ្យតែប៉ុណ្ណោះ។ សម្រាប់ឱសថ Diclofenac ដែលអាចរកបាននៅលើទីផ្សារមានដូចជា៖ Diclofenac Sandoz® , Voltaren® , ឬ Diclofenac Sodium Topical Gel ជាដើម 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក

កាល់ស្យូម ជាតម្រូវការដ៏ចម្បងមួយសម្រាប់ភាពរឹងមាំ និងហាប់ណែននៃឆ្អឹងចាប់តាំងពីអ្នកនៅក្មេង និងបន្តរហូតដល់ពេញមួយជីវិតនៅពេលអាយុចាប់ផ្ដើមកើនឡើង។ ដោយឡែក វីតាមីន D ក៏ជាសារធាតុដែលត្រូវប្រើជាចាំបាច់សម្រាប់សម្របសម្រួលមុខងាររបស់កាល់ស្យូម ដែលជាហេតុធ្វើឲ្យសារធាតុទាំង២ប្រភេទនេះមាននៅក្នុងគ្រាប់តែមួយ ដើម្បីទទួលបានប្រសិទ្ធភាពល្អ និងកាន់តែមានភាពងាយស្រួលក្នុងការប្រើប្រាស់។ លក្ខណៈឱសថ កាល់ស្យូម ជាសារធាតុរ៉ែមួយប្រភេទដែលភាគច្រើនឃើញមានក្នុងកម្រិតដល់ទៅ ៩៩% នៅក្នុងឆ្អឹង និងធ្មេញ។ បន្ថែមពីមុខងារសម្រាប់ការរក្សាស្ថានភាពរបស់ឆ្អឹង វាក៏មានតួនាទីធ្វើឲ្យសាច់ដុំកន្រ្តាក់ និងរ៉ាប់រងចលនាចង្វាក់បេះដូងផងដែរ។ ជារៀងរាល់ថ្ងៃអ្នកអាចនឹងប្រឈមការបាត់បង់កាល់ស្យូមតាមរយៈស្បែក ក្រចក សក់ ញើស ទឹកនោម និងលាមកហើយសម្រាប់ការនាំចូលសារធាតុត្រលប់មកវិញគឺធ្វើឡើងតាមការបរិភោគអាហារពីខាងក្រៅដោយហេតុថា កាល់ស្យូមមិនអាចផលិតដោយឯកឯងនៅក្នុងរាងកាយនោះទេ។ ជាក់ស្ដែង អាហារដែលសម្បូរនូវកាល់ស្យូមមានដូចជាទឹកដោះគោ ត្រី គ្រាប់អាល់ម៉ុន បន្លែស្លឹកពណ៌បៃតង និងអាហារសុខភាពផ្សេងទៀត។ វីតាមីន D ត្រូវបានគេហៅថាវីតាមីនព្រះអាទិត្យ ដោយសារតែវីតាមីនប្រភេទនេះនឹងធ្វើការផលិតនៅពេលរាងកាយបានប៉ះជាមួយពន្លឺព្រះអាទិត្យយ៉ាងណាមិញវាក៏មានវត្តមាននៅក្នុងអាហារ ឬឱសថបំប៉នផ្សេងទៀតផងដែរ។ វីតាមីននេះមានលក្ខណៈជួយការពារឆ្អឹងកុំឲ្យងាយពុកផុយនៅពេលអាយុកាន់តែច្រើនតាមរយៈការជួយបឺតស្រូបយកកាល់ស្យូមចូលទៅក្នុងរាងកាយ។ ក្រៅពីនោះ វីតាមីន D ក៏មានអត្ថប្រយោជន៍ជាច្រើនទៀតរួមមាន៖     • គាំទ្រប្រព័ន្ធភាពស៊ាំរាងកាយ ខួរក្បាល និងប្រព័ន្ធសរសៃប្រសាទ     • សម្រួលមុខងាររបស់សួត និងសរសៃឈាមបេះដូង     • ជួយរក្សាតុល្យភាពរបស់អាំងស៊ុយលីន និងគ្រប់គ្រងស្ថានភាពជំងឺទឹកនោមផ្អែម។ល។ សកម្មភាពឱសថ កាល់ស្យូម មានតួនាទីមិនអាចខ្វះបាន សម្រាប់ធានាមុខងាររបស់សរសៃប្រសាទ កោសិកាសាច់ដុំ និងឆ្អឹង ឯវីតាមីន D មានសមត្ថភាពជួយសម្រួលក្នុងការស្រូបយកកាល់ស្យូមចូលទៅក្នុងរាងកាយ។ ការប្រើប្រាស់កាល់ស្យូមនិងវីតាមីន D ក្នុងបរិមាណសមស្របអាចធ្វើឲ្យឆ្អឹងរបស់អ្នកបន្តនូវភាពរឹងមាំ។ ជាក់ស្ដែងការរួមផ្សំកាល់ស្យូម និងវីតាមីន D ក្នុងឱសថតែមួយ មានគុណសម្បត្តិសម្រាប់ការពារ ឬព្យាបាលបញ្ហាដូចជា៖     • កង្វះកាល់ស្យូមក្នុងឈាម     • ជំងឺពុកឆ្អឹង     • ឆ្អឹងចុះខ្សោយ     • ស្រ្តីមានផ្ទៃពោះដែលត្រូវការកាល់ស្យូមបន្ថែម     • ស្រ្តីក្រោយអស់រដូវ។ល។ កម្រិត និងការប្រើប្រាស់ ចំនួនដងនៃការប្រើប្រាស់អាច ១ ទៅ២គ្រាប់ជាប្រចាំថ្ងៃ ចំណែកកម្រិតគឺមានការប្រែប្រួលទៅតាមបុគ្គលដែលជាទូទៅមនុស្សពេញវ័យអាចប្រើបានក្នុងកម្រិត ៦០០ មិល្លីក្រាម ហើយអាចកើនឡើងដល់ ១០០០មិល្លីក្រាមទៅតាមតម្រូវការផ្សេងៗគ្នា។ ជាទូទៅកាល់ស្យូម និងវីតាមីន D គួរលេបនៅពេលអាហារ ឬបន្ទាប់ពីញ៉ាំអាហារនីមួយៗ ដែលអាចបង្កើនការស្រូបឱសថឲ្យកាន់តែមានប្រសិទ្ធភាព។ ផលរំខាន វីតាមីនប្រភេទនេះអាចនឹងបង្កផលរំខាននានាដោយអ្នកអាចសង្កេតឃើញរួមមាន៖     • ទល់លាមក ឬបញ្ហាក្រពះ     • ចង្អោរ ក្អួត     • បាត់បង់ការចង់ញ៉ាំអាហារ     • ឈឺក្បាល ឬឈឺចាប់តាមសាច់ដុំ     • អស់កម្លាំង ឬល្ហិតល្ហៃ     • ប្រតិកម្មអាល្លែកហ្ស៊ី ស្ដែងចេញជាកន្ទួលរមាស់នៅលើមុខ អណ្តាត និងបំពង់ក     • ធីងធោង ឬពិបាកដកដង្ហើមជាដើម។ ប្រសិនផលរំខានខាងលើបន្តកើតឡើងជាប្រចាំ និងកាន់តែធ្ងន់ធ្ងរ អ្នកគួរប្រាប់ដំណឹង ឬជួបពិគ្រោះជាបន្ទាន់ជាមួយវេជ្ជបណ្ឌិតជំនាញ។ បម្រុងប្រយ័ត្ន មុនពេលប្រើប្រាស់ឱសថ អ្នកត្រូវប្រាប់ទៅកាន់វេជ្ជបណ្ឌិត ឬឱសថការីក្នុងករណី៖ - អ្នកមានជំងឺបេះដូង សរសៃឈាម វិបត្តិតម្រងនោម ជំងឺថ្លើម ជំងឺប្រព័ន្ធរំលាយអាហារ ឬមានភាពមិនប្រក្រតីនៃប្រព័ន្ធភាពស៊ាំការពាររាងកាយ - ចំពោះស្រ្តីពពោះ៖ ដោយហេតុថាការប្រើប្រាស់ឱសថណាមួយត្រូវធ្វើក្នុងករណីជាចាំបាច់តែប៉ុណ្ណោះ - ឱសថប្រភេទនេះអាចជ្រាបក្នុងទឹកដោះម្តាយនោះការប្រើប្រាស់អំឡុងពេលបំបៅដោះក៏ទាមទារការពិភាក្សាជាមុន។ លោកអ្នកអាចស្វែងរក កាល់ស្យូម និងវីតាមីន D នៅលើទីផ្សារបាន ដោយមានឈ្មោះដូចជា Sunlife Calcium+ Vitamin D3, Osteocare, Calcivita, One Q Gummy Calcium & Vitamin D។ អត្ថបទ៖​ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨០ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក

ផ្សិតថ្មសមុទ្រ ឬ ឈ្មោះវិទ្យាសាស្ត្រ “Pleuractis gravis Nemenzo” គឺជាផ្កាថ្មសមុទ្រដែលស្ថិតក្នុងគ្រួសារ Fungiidae ដែលត្រូវបានគេនិយមប្រើប្រាស់ជាឱសថព្យាបាលជំងឺដែលពាក់ព័ន្ធនឹងការរលាក និងជំងឺមហារីក។ មិនតែប៉ុណ្ណោះវាក៏ត្រូវបានយកមកប្រើប្រាស់ជាឱសថជំនួយឆ្អឹង និងជំនួយប្រព័ន្ធប្រសាទផងដែរ។ ការស្រាវជ្រាវនេះត្រូវបានធ្វើឡើងក្នុងគោលបំណងដើម្បីធ្វើតេស្តរកឲ្យឃើញនូវសមាសធាតុឱសថ និងកំណត់ឲ្យឃើញនូវចំនួនឱសថដែលមាននៅក្នុងសារពាង្គកាយទាំងមូលនៃផ្សិតថ្មសមុទ្រដែលមានប្រភពនៅក្នុងប្រទេសកម្ពុជា។ សារពាង្គកាយទាំងមូលនៃផ្កាថ្មសមុទ្រស្ងួតត្រូវបានយកមកពីកោះរ៉ុង (GPS: 10°44'25.3"N 103°17'24.8"E) ក្រុងព្រះសីហនុ ខេត្តព្រះសីហនុ ប្រទេសកម្ពុជា ក្នុងអំឡុង ខែធ្នូ ឆ្នាំ២០១៨។ សារពាង្គកាយទាំងមូលរបស់ផ្សិតថ្មសមុទ្រនេះ ត្រូវបានយកមកផ្ទៀងផ្ទាត់ជាមួយនឹងសំណាកផ្កាសមុទ្រ (កូដៈ UPFOPMP-180001) ដែលតម្កល់ទុកនៅក្នុង “តិណាល័យសាកលវិទ្យាល័យពុទ្ធិសាស្ត្រ” (UP-Herbarium)។ សារពាង្គកាយទាំងមូលរបស់ផ្សិតថ្មសមុទ្រស្ងួតត្រូវបានយកមកធ្វើការចម្រាញ់ដោយអង្គធាតុរំលាយអេតាណុល តាមរយៈវិធីសាស្ត្រចម្រាញ់ត្រាំ “Maceration Extraction”។ រូបធាតុចម្រាញ់ដែលទទួលបានត្រូវបានត្រៀមទុកសម្រាប់ធ្វើតេស្តគីមីឱសថ និងធ្វើតេស្តក្រូម៉ាតូក្រាបភីស្រទាប់ស្តើង។ ដំណើរការនៃការពិសោធទាំងអស់ត្រូវបានធ្វើឡើងនៅក្នុងមន្ទីរពិសោធន៍រូបធាតុឱសថនៃមហាវិទ្យាល័យឱសថសាស្ត្រ សកលវិទ្យាល័យពុទ្ធិសាស្ត្រ។ លទ្ធផលនៃការធ្វើតេស្តគីមីឱសថត្រូវបានរកឃើញថា សារពាង្គកាយទាំងមូលនៃផ្សិតថ្មសមុទ្រស្ងួតមានសមាសធាតុឱសថ Alkaloids, Flavonoids, Terpenoids និង Essential Oils។ ចំណែកឯការវិភាគលើក្រូម៉ាតូក្រាបភីស្រទាប់ស្តើងនៃសារពាង្គកាយទាំងមូលរបស់ផ្សិតថ្មសមុទ្រស្ងួត នៅជំហ៊ានរលកចន្លោះពី 254-366 nm និង 10%-H2SO4 នៅក្នុង “Mobile Phase” Toluene-Methanol (9:1) យើងបានញែកឱសថសរុបទាំងអស់ចំនួន 15 អង្គធាតុឱសថ ដែលមានតំលៃ Rf នៅទីតាំងដូចតទៅៈ 0.04, 0.11, 0.15, 0.22, 0.26, 0.31, 0.35, 0.44, 0.64, 0.68, 0.77, 0.82, 0.88, 0.95 និង 0.99។ វត្តមាននៃសមាសធាតុឱសថ និងព័ត៌មាននៃការញែកចំនួនឱសថដោយ TLC នៃផ្សិតថ្មសមុទ្រនេះ គឺជាទិន្នន័យឱសថដ៏សំខាន់ និងមានប្រយោជន៍សម្រាប់អ្នកស្រាវជ្រាវបន្ទាប់ទៀតក្នុងការធ្វើការសិក្សាស្រាវជ្រាវបន្តអំពីការញែកម៉ូលេគុលថ្នាំសំខាន់ៗ ចេញពីផ្សិតថ្មសមុទ្ររបស់កម្ពុជា។ ប្រភពអត្ថបទដោយ អ្នកនិពន្ធដែលជានិស្សិត និងសាស្ត្រាចារ្យនៃមហាវិទ្យាល័យឱសថសាស្ត្រ សាកលវិទ្យាល័យពុទ្ធិសាស្ត្រ៖ កែវ សំអែល ឈិន លក្ខិណា ហៃ ស៊ីដាណេ ហៃ ស៊ីដានិច សេង សុផាន់ណែត លី មល្លិកា នី ច័ន្ទសីហា ជា ស៊ីន អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៧៩ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

ចែករំលែក

ជាតិដែក ជាសារធាតុចម្បងក្នុងការបង្កើតអេម៉ូក្លូប៊ីន ដែលជាប្រភេទគ្រាប់ឈាមក្រហមសម្រាប់ទ្រទ្រង់ការរស់រានមានជីវិតរបស់បុគ្គលម្នាក់ៗហើយវាត្រូវបានយកចូលក្នុងរាងកាយតាមរយៈរបបអាហារជាប្រចាំថ្ងៃ។ ដោយឡែកក្នុងលក្ខខណ្ឌ តម្រូវការជាតិដែកមានការកើនឡើងនោះទាមទារឲ្យមានការប្រើប្រាស់បន្ថែមនូវជាតិដែកក្រោមទម្រង់ជាឱសថបំប៉ន។ សកម្មភាពឱសថ ជាតិដែក ជាសារធាតុរ៉ែចាំបាច់ម៉្យាងសម្រាប់ធ្វើការផលិតកោសិកាឈាមក្រហមក្នុងរាងកាយ។ នៅពេលរាងកាយមិនអាចទទួលបានជាតិដែកគ្រប់ចំនួននោះការផលិតកោសិកាឈាមក្រហមក៏មិនអាចប្រព្រឹត្តិទៅបានពេញលេញ ដែលលក្ខខណ្ឌនេះហៅថាកង្វះជាតិដែក ឬកង្វះឈាម។ ជាក់ស្ដែងការប្រើប្រាស់បន្ថែមនូវថ្នាំគ្រាប់ជាតិដែកគឺសម្រាប់ស្ថានភាពបុគ្គលដែល៖ • មានបញ្ហាហូរឈាម • អ្នកជំងឺលាងឈាម • ជំងឺក្រពះ ពោះវៀន • អ្នកជំងឺខ្វះឈាម • ស្រ្តីមានផ្ទៃពោះ ឬទារកដែលត្រូវការជាតិដែកបន្ថែម។ ក្រៅពីនេះ គ្រាប់ថ្នាំជាតិដែកក៏អាចណែនាំឲ្យប្រើប្រាស់ក្នុងលក្ខខណ្ឌផ្សេងទៀតទៅតាមស្ថានភាពជំងឺ និងការអនុញ្ញាតពីសំណាក់អ្នកជំនាញ។ កម្រិត និងការប្រើប្រាស់ ជាទូទៅ គ្រាប់ថ្នាំជាតិដែកត្រូវបានឲ្យប្រើប្រាស់មួយថ្ងៃម្ដង ឬពីរដង អាស្រ័យទៅតាមតម្រូវការនីមួយៗរបស់បុគ្គលពេញវ័យ។ វាត្រូវបានស្រូបចូលបានយ៉ាងល្អនៅក្នុងក្រពះ ដែលអ្នកអាចប្រើប្រាស់បាន ១ម៉ោងមុន ឬ ២ម៉ោងក្រោយនៃការញ៉ាំអាហារនីមួយៗ និងត្រូវញ៉ាំទឹកឲ្យបានច្រើននៅពេលលេបហើយចៀសវាងលេបជាមួយសារធាតុផ្សេងដូចជា តែ ឬកាហ្វេដែលអាចធ្វើឲ្យថយចុះប្រសិទ្ធភាពរបស់ឱសថ។ ដោយឡែកសម្រាប់ការប្រើប្រាស់ចំពោះទារក ឬកុមារ អ្នកអាចលាយឱសថជាមួយទឹកដោះគោ ឬទឹកផ្លែឈើដើម្បីបង្កការងាយស្រួលក្នុងការលេប។ ចំណែកការប្រើប្រាស់ឱសថក្នុងទម្រង់ផ្សេងអាចនឹងមានការប្រែប្រួលតួយ៉ាង៖ • ទម្រង់គ្រាប់ទំពារ៖ ត្រូវទំពារឲ្យបានម៉ត់មុនពេលលេប • ទម្រង់ឱសថទឹក៖ ត្រូវធ្វើការក្រឡុកឲ្យបានសព្វ និងត្រូវវាស់តាមរយៈរង្វាល់ឲ្យបានត្រឹមត្រូវ។ ផលរំខាន ការប្រើប្រាស់គ្រាប់ថ្នាំជាតិដែកលើកដំបូងអាចបង្កជាផលរំខាននានាតែមិនចោទជាបញ្ហាធ្ងន់ធ្ងរនោះទេរួមមាន៖ • ទល់លាមក • រាក • ឈឺចាប់ក្នុងក្រពះ • ចង្អោរ • ប្រែប្រួលសភាពពណ៌នៃធ្មេញជាដើម។ ក្រៅពីផលរំខានមួយចំនួន ឱសថបំប៉ននេះក៏បណ្តាលឲ្យមានប្រតិកម្មអាល្លែកហ្ស៊ីធ្ងន់ធ្ងរផងដែរដែលអ្នកអាចសង្កេតឃើញមានមានរោគសញ្ញាដូចជា កន្ទួល រមាស់ ហើម (ពិសេសនៅមុខ អណ្ដាត បំពង់ក) អាការៈធីងធោងធ្ងន់ធ្ងរ ឬពិបាកដកដង្ហើម។ បម្រុងប្រយ័ត្ន មុនប្រើប្រាស់គ្រាប់ថ្នាំជាតិដែក អ្នកក៏គួរមានការប្រុងប្រយ័ត្នក្នុងករណី៖ • មានប្រតិកម្ម ឬអាល្លែកហ្ស៊ីជាមួយសារធាតុសកម្មជាតិដែក • ប្រាប់ទៅកាន់វេជ្ជបណ្ឌិតប្រសិនអ្នកកំពុងតែប្រើប្រាស់ឱសថផ្សេងទៀតជាប្រចាំថ្ងៃ ឬអ្នកមានជំងឺប្រចាំកាយដូចជាបញ្ហាថ្លើម ឬវិបត្តិក្រពះពោះវៀនជាដើម។ សម្រាប់ឱសថជាតិដែក ដែលអ្នកអាចរកបាននៅលើទីផ្សារមានឈ្មោះដូចជា Haemovit®Plus, Feroglobin ឬ Ferrovit ជាដើម។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៧៩ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

ចែករំលែក

តម្រូវការឱសថបំប៉នពពួកវីតាមីន និងជាតិរ៉ែ ហាក់មានការកើនឡើងចំពោះស្រ្តីដែលកំពុងពពោះ ដែលក្នុងនោះប្រភេទឱសថបំប៉នដែលរួមបញ្ចូលដោយFolic Acid និងDHA ត្រូវបានប្រើប្រាស់ជាចម្បងក្នុងពេលបច្ចុប្បន្នសម្រាប់ការលូតលាស់ជាពិសេសរបស់ទារក។ លក្ខណៈឱសថបំប៉ន សារធាតុសកម្ម Folic Acid ជាទម្រង់មួយដែលសំយោគចេញពីវីតាមីន បេ មានលក្ខណៈរលាយក្នុងទឹក ជាមួយមុខងារសំខាន់ក្នុងការផលិតកោសិកាគ្រាប់ឈាមក្រហមរបស់ទារកសម្រាប់ចាប់ផ្តើមអភិវឌ្ឍផ្នែកប្រព័ន្ធសរសៃប្រសាទ។ ជាក់ស្តែង ពពួកវីតាមីន បេនេះអាចមានវត្តមាននៅក្នុងអាហារប្រចាំថ្ងៃ ដូចជា បន្លែពណ៌បៃតងចាស់ ផ្លែឈើដែលមានរសជាតិជូរ និងប្រភេទផលិតផលធញ្ញជាតិជាដើម។ ចំណែកសារធាតុសកម្មមួយទៀតដែលមានឈ្មោះ Docosahexaenoic Acid (DHA) គឺជាប្រភេទខ្លាញ់អូមេហ្គា ៣ ដែលសម្បូរទៅដោយអត្ថប្រយោជន៍មិនសម្រាប់តែការប្រើប្រាស់ទូទៅ តែក៏ត្រូវបានទទួលស្គាល់ជាជំនួយដល់ការពពោះចាប់តាំងពីខែដំបូងផងដែរ។ ក្រៅពីសារធាតុចាំបាច់ខាងលើ ឱសថបំប៉នប្រភេទនេះក៏មាននូវការរួមផ្សំនូវវីតាមីន និងសារធាតុរ៉ែផ្សេងទៀត ដែលខុសគ្នាទៅតាមផលិតផលនីមួយៗដើម្បីជាការបំពេញតម្រូវការបន្ថែមក្នុងអំឡុងពេលមានផ្ទៃពោះ។ សកម្មភាពឱសថបំប៉ន ឱសថបំប៉នប្រភេទនេះមានប្រសិទ្ធភាពអាស្រ័យទៅនឹងសកម្មភាពរបស់សារធាតុសកម្មនីមួយៗរួមមាន៖ - Folic Acid មានតួនាទីជាចម្បងសម្រាប់គាំទ្រការលូតលាស់ខួរក្បាលរបស់ទារក និងការចងភ្ជាប់នៃសរសៃប្រសាទបង្កើតឲ្យបានជាឆ្អឹងខ្នងដែលជាផ្នែកដំបូងបង្អស់នៃប្រព័ន្ធសរសៃប្រសាទកណ្តាល។ ជាក់ស្តែង ការលូតលាស់ឆ្អឹងខ្នងរបស់ទារកចាប់ផ្តើមនៅចន្លោះ ១៤ និង ២៨ថ្ងៃនៃការពពោះ - DHA មានមុខងារមួយចំនួនក្នុងការធានាឲ្យការពពោះមានសុខភាពល្អ។ ជាក់ស្តែង ការកើនឡើងកម្រិត DHA អាចធ្វើឲ្យការពពោះដំណើរការបានល្អ សម្របសម្រួលទម្ងន់របស់ទារក និងកាត់បន្ថយហានិភ័យនៃការសម្រាលកូនមុនខែ។ DHA ត្រូវបានទទួលស្គាល់មិនត្រឹមតែអាចសម្រួលទៅដល់ការលូតលាស់ខួរក្បាលទារកនោះទេ វាក៏រួមចំណែកជាជំនួយនៃសមត្ថភាពនៃការគិត គំហើញ និងការធ្វើចលនារបស់ទារកផងដែរ។ កម្រិត និងរបៀបប្រើប្រាស់ ការប្រើប្រាស់ជាទូទៅគឺអាចម្តង ១ ទៅ ២គ្រាប់ក្នុងមួយថ្ងៃដែលប្រែប្រួលអាស្រ័យទៅតាមការណែនាំរបស់គ្រូពេទ្យជំនាញ ចំណែកឱសថក្នុងទម្រង់ជាគ្រាប់ទំពារ ការប្រើប្រាស់គឺត្រូវទំពារឲ្យម៉ត់ល្អមុនពេលលេប។ ដើម្បីទទួលបានប្រសិទ្ធភាពពីឱសថ អ្នកត្រូវប្រើប្រាស់ឲ្យបានទៀងទាត់ និងចៀសវាងលេបហួសកម្រិតពីការណែនាំ។ ជាទូទៅ ការប្រើប្រាស់ឱសថបំប៉នខាងលើអាចចាប់ផ្តើមតាំងពីការពពោះនៅខែដំបូង ពីព្រោះវាជារយៈពេលលូតលាស់នៃឆ្អឹងខ្នងរបស់ទារក ចំណែកការប្រើប្រាស់បន្តអាចប្រែប្រួលទៅតាមការណែនាំរបស់វេជ្ជបណ្ឌិតជំនាញ។ ផលរំខាន រោគសញ្ញាជាផលរំខាននៃឱសថបំប៉ននេះអាចមានដូចជា ទល់លាមក រាក ឬវិបត្តិក្រពះផ្សេងៗ ដែលអាចកើតមានជាបណ្តោះអាសន្ន និងបាត់ទៅវិញនៅពេលរាងកាយអាចទទួលយកសារធាតុនៅក្នុងឱសថ។ យ៉ាងណាមិញ ក្នុងករណីអាការៈខាងលើបន្តមានជាប់លាប់ នោះត្រូវទាមទាររាយការណ៍ទៅកាន់គ្រូពេទ្យ ឬឱសថការី។ ចំណែកប្រតិកម្មអាល្លែកហ្ស៊ីបណ្តាលមកពីឱសថ អាចមានភាពកម្រ តែអ្នកត្រូវសង្កេតមើលផងដែរប្រសិនមានរោគសញ្ញាដូចជា កន្ទួលរមាស់ ហើម (នៅមុខ អណ្តាត ឬបំពង់ក)អាការៈធីងធោងធ្ងន់ធ្ងរ និងពិបាកដកដង្ហើមជាដើម។ បម្រុងប្រយ័ត្ន ដោយហេតុថាការប្រើប្រាស់ឱសថបំប៉ននេះអាចនៅមានកម្រិត និងទាមទារឲ្យមានការប្រុងប្រយ័ត្នក្នុងលក្ខខណ្ឌណាមួយតួយ៉ាង៖ - ហាមប្រើប្រាស់ក្នុងករណីអ្នកមានប្រតិកម្មជាមួយសារធាតុសកម្មនៅក្នុងឱសថ - ប្រាប់ទៅកាន់គ្រូពេទ្យ ឬឱសថការី ប្រសិនអ្នកកំពុងប្រើប្រាស់ឱសថផ្សេងទៀត ឬកំពុងទទួលការព្យាបាលជំងឺដូចជាជំងឺពាក់ព័ន្ធនឹងវិបត្តិឈាម បញ្ហាតម្រងនោម ថ្លើម ឬក្រពះ ពោះវៀនជាដើម។ អន្តរកម្មឱសថ អន្តរកម្មរវាងឱសថអាចនឹងកើតមានឡើង ដែលធ្វើឲ្យផលរំខានកាន់តែមានឥទ្ធិពលខ្លាំង ដូច្នេះអ្នកគួរ៖ - ប្រាប់ទៅកាន់វេជ្ជបណ្ឌិត ប្រសិនអ្នកកំពុងប្រើប្រាស់ឱសថសម្រាប់ព្យាបាលជំងឺផ្សេង - ចៀសវាងប្រើប្រាស់វីតាមីន ឬឱសថបំប៉នដទៃទៀតក្នុងពេលតែមួយដោយមិនបានទទួលការណែនាំពីគ្រូពេទ្យ - ស្តាប់ការណែនាំពីវេជ្ជបណ្ឌិត សម្រាប់រយៈពេលនិងកម្រិតក្នុងការប្រើប្រាស់ - ចៀសវាងប្រើប្រាស់ក្នុងពេលតែមួយជាមួយ ឱសថប្រឆាំងការប្រកាច់ដូចជា Phenytoin ជាដើម។ គួរបញ្ជាក់ផងដែរ ឱសថបំប៉នប្រភេទនេះអាចរកបាននៅលើទីផ្សារមានឈ្មោះ Nature’s Bounty Prenatal, Nature Made និងPregnacare®។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៧៨ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

ចែករំលែក

នៅពេលវ័យកាន់តែចាស់ ស្រទាប់ស្បែករបស់អ្នកក៏ប្រែប្រួល ដែលនេះបណ្តាលមកពីការបាត់បង់នូវប្រូតេអុីនកូឡាជែនធម្មជាតិនៅក្នុងស្បែកធ្វើឲ្យស្បែកបាត់បង់ភាពតឹងណែន ដែលជាហេតុនាំឲ្យផលិតផលបំប៉នកូឡាជែនត្រូវបានគេនិយមប្រើប្រាស់ដើម្បីស្តារស្ថានភាពស្បែកឲ្យមានភាពប្រសើរឡើងវិញ។ អ្វីជាកូឡាជែន? កូឡាជែន ជាប្រភេទប្រូតេអុីនម៉្យាងដែលជាសរសៃរឹង មិនរលាយក្នុងទឹក និងរ៉ាប់រងក្នុងកម្រិត ១ភាគ៣នៃចំនួនប្រូតេអុីននៅក្នុងរាងកាយទាំងអស់។ ភាគច្រើន កូឡាជែន ជាម៉ូលេគុលដែលភ្ជាប់គ្នាបង្កើតបានជាសរសៃស្តើង និងវែង សម្រាប់បំពេញតួនាទីជាជាលិកាគាំទ្រ ដែលលក្ខខណ្ឌនេះធ្វើឲ្យស្បែកមានភាពតឹងណែន និងភ្លឺរលោង។ កូឡាជែន ត្រូវបានសង្កេតឃើញមាន ១៦ប្រភេទខុសៗគ្នា ដែលក្នុងនោះ ចំនួន ៨០ទៅ៩០ ភាគរយជាកូឡាជែន ប្រភេទ ១ ២ និង៣។ ជាមួយប្រភេទខុសៗគ្នានៃកូឡាជែន នោះការបំពេញមុខងារក៏ខុសប្លែកគ្នាទៅតាមកោសិការបស់រាងកាយតួយ៉ាងចំពោះកូឡាជែនប្រភេទ ១ និង៣មានប្រសិទ្ធភាពទៅលើស្បែក សាច់ដុំ ឆ្អឹង និងការលូតលាស់នៃសក់ និងក្រចក ចំណែក កូឡាជែនប្រភេទ ២ ដែលជាការរួមផ្សំដោយជាតិទឹកមានមុខងារសម្រាប់ការភ្ជាប់គ្នានៃសន្លាក់។ ដោយសារក្នុងលក្ខខណ្ឌបែបនេះ ទើបឱសថបំប៉នកូឡាជែន ត្រូវបានផលិតឡើងទៅតាមប្រភេទ និងតម្រូវការនីមួយៗ។ ការប្រើប្រាស់កូឡាជែន នៅក្នុងស្រទាប់កណ្តាលនៃស្បែក កូឡាជែនមានមុខងារក្នុងការជំនួស និងជួសជុលកោសិកាចាស់ៗឡើងវិញ ដែលអាចបំបាត់ចោលនូវភាពជ្រីវជ្រួញ និងសង្កេតឃើញមានការប្រើប្រាស់ផងដែរទៅលើស្រ្តីអស់រដូវ ដែលវាអាចជួយសម្រួលដល់ការចុះខ្សោយនៃសន្លាក់។ បន្ថែមពីនោះ កូឡាជែនក៏ត្រូវបានទទួលស្គាល់ពីប្រសិទ្ធភាពទៅលើ៖ • សុខភាពភ្នែក • ការការពារពីបញ្ហាបេះដូងនានា • បន្ថែមថាមពលសម្រាប់ធ្វើលំហាត់ប្រាណ • ធ្វើឲ្យឆ្អឹងរឹងមាំជាដើម។ ចំណែកការប្រើប្រាស់ប្រូតេអុីនកូឡាជែនគឺអាចម្តងជារៀងរាល់ថ្ងៃ ដែលកម្រិតក្នុងមួយថ្ងៃមិនឲ្យលើសពី ៥ក្រាម។ សកម្មភាពឱសថ ការសិក្សាជាច្រើនបានបង្ហាញថា ការប្រើប្រាស់កូឡាជែនក្នុងទម្រង់តាមការលេប មានប្រសិទ្ធភាពជាងការលាបក្រោមទម្រង់ជាក្រែមទៅលើស្បែក ដោយសារឱសថបំប៉នកូឡាជែននឹងអាចស្រូបចូលតាមរយៈប្រព័ន្ធរំលាយអាហារដូចទៅនឹងការបរិភោគអាហារជាប្រចាំថ្ងៃ។ ជាក់ស្តែង ប្រូតេអុីនកូឡាជែនមានសមត្ថភាពទៅភ្ញោចកោសិកា Fibroblast នៅក្នុងរាងកាយ ដែលជាកោសិការ៉ាប់រងក្នុងការបញ្ចេញកូឡាជែនធម្មជាតិ ដែលជាសារធាតុចាំបាច់សម្រាប់ស្បែក និងជាលិកាភ្ជាប់។ ផលរំខាន រោគសញ្ញានៃផលរំខាននានាអាចនឹងកើតមានឡើងតែមានភាពកម្រអំឡុងពេលប្រើប្រាស់យ៉ាងណាមិញអ្នកគួរសង្កេតមើលប្រសិនរោគសញ្ញាទាំងនោះនៅបន្តអូសបន្លាយរយៈពេលយូរដែលមានដូចជា៖ • ចង្អោរ • ច្រាលទឹកអាស៊ីតក្រពះ • រាក ឬទល់លាមក • ប្រតិកម្មស្បែក • ឈឺក្បាល ឬធីងធោង។ បម្រុងប្រយ័ត្ន មុនពេលប្រើប្រាស់ឱសថបំប៉នកូឡាជែន ​ត្រូវរាយការណ៍ដល់វេជ្ជបណ្ឌិតពីឱសថផ្សេងៗ (វីតាមីន ផលិតផលបំប៉ន) ដែលអ្នកកំពុងប្រើប្រាស់ ឬមានជំងឺប្រចាំកាយ ពីព្រោះក្នុងលក្ខខណ្ឌមួយចំនួនអាចឲ្យអ្នកប្រឈមកាន់តែខ្លាំងពីផលរំខានរបស់ឱសថកូឡាជែន។ ម៉្យាងទៀត ក៏មានការលើកឡើងពីការប្រុងប្រយ័ត្នផងដែរចំពោះ ស្រ្តីមានផ្ទៃពោះ កំពុងត្រៀមមានផ្ទៃពោះ និងស្រ្តីកំពុងបំបៅដោះកូន។ គួរបញ្ជាក់ផងដែរ  ឱសថបំប៉នកូឡាជែនដែលអាចរកបាននៅលើទីផ្សារមានឈ្មោះដូចជា Colla-plus 3, Nature’s Way, Nature Bounty Collagen ជាដើម។ ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

ចែករំលែក

រមៀត ឬឈ្មោះវិទ្យាសាស្ត្រ “Curcuma longa L.” ដែលស្ថិតនៅក្នុងអម្បូរ Zingiberaceae ត្រូវបានគេប្រើប្រាស់យ៉ាងទូលំទូលាយនៅក្នុងវិស័យអាហារផលិតផលសម្អាងធម្មជាតិ និងឱសថបុរាណ។ Curcumin គឺជាសារធាតុគីមីសំខាន់នៅក្នុងរមៀតដែលវាមានសមត្ថភាពព្យាបាលជំងឺដូចជា ប្រឆាំងនឹងដុំសាច់ ប្រឆាំងនឹងការរលាក អង់ទីអុកស៊ីដង់ និងប្រឆាំងនឹងការកកើតសរសៃឈាមថ្មី។ ការសិក្សាស្រាវជ្រាវនេះត្រូវបានធ្វើឡើងក្នុងគោលបំណងកំណត់នូវអត្តសញ្ញាណ និងបរិមាណ Curcumin ក្នុងរមៀតខ្មែរ។ ម្សៅមើមរមៀតដែលយកមកធ្វើការសិក្សាត្រូវបានទទួលមកពីហាងលក់ឱសថបុរាណក្នុងស្រុកហើយត្រូវបានផ្ទៀងផ្ទាត់ជាមួយសំណាករុក្ខជាតិរមៀត (កូដ: UPFPH-210019) ដែលតម្កល់ទុកនៅក្នុង “តិណាល័យសាកលវិទ្យាល័យពុទ្ធិសាស្ត្រ” (UP-Herbarium)។ ម្សៅមើមរមៀតចំនួន 50g ត្រូវបានចម្រាញ់ដោយប្រើអេតាណុលចំនួន 400mL តាមរយៈវិធីសាស្ត្រ Soxhlet ក្រោមសីតុណ្ហភាព 50អង្សាសេដោយប្រើរយៈពេល ៤ ម៉ោង។ សារធាតុចម្រាញ់ត្រូវបានសម្ងួតដោយប្រើម៉ាស៊ីន Rotatory Evaporator ក្នុងសីតុណ្ហភាព 50អង្សាសេ ក្រោមសម្ពាធ 175mbar បន្ទាប់មក យកទៅវិភាគដោយ C18 Reverse-phase High–Performance Liquid Chromatography ដោយប្រើ Mobile Phase រួមផ្សំពីទឹក អាស៊ីតស៊ីទ្រិច និងអាសេតូនីទ្រីល តាម Isocratic Elution Mode ក្នុងល្បឿនលំហូរ 1.0mL/min និងកំណត់ការវិភាគដោយប្រើកាំរស្មី UV ក្នុងជំហ៊ានរលក 425nm។ លទ្ធផលដែលចម្រាញ់បានគឺ 4.04% ស្មើនឹង 2.02g។ សមាមាត្ររបស់ Mobile phase ដែលល្អជាងគេក្នុងការវិភាគគឺ 45/55 vol% (សារធាតុរំលាយ A /សារធាតុរំលាយ B; សារធាតុរំលាយ A:ទឹក/អាស៊ីត អាសេទិច = 99.9/0.1 v/v; សារធាតុរំលាយ B: អាសេតូនីទ្រីល/អាស៊ីតអាសេទិច = 99.9/0.1 v/v)។ ក្រោយពីការចម្រាញ់ Curcumin ដែលកំណត់ឃើញក្នុងថេរៈវេលា tR= 5.274min មានចំនួន 21.80% (440.36 mg)។ ការសិក្សានេះផ្តល់ទិន្នន័យវិទ្យាសាស្រ្តក្នុងការវិភាគរក Curcumin នៅក្នុងរមៀតខ្មែរ។ ការរកឃើញនេះដើរតួយ៉ាងសំខាន់សម្រាប់ការស្រាវជ្រាវបន្តបន្ទាប់ទៀតទាក់ទងនឹង Curcumin ដែលមានប្រភពចេញពីមើមរមៀតរបស់ខ្មែរ។ ប្រភពអត្ថបទដោយ និស្សិត និងសាស្រ្តាចារ្យ មហាវិទ្យាល័យឱសថសាស្ត្រ នៃសាកលវិទ្យាល័យពុទ្ធិសាស្ត្រ ប្រទេសកម្ពុជា និងដេប៉ាតឺម៉ង់គីមីឱសថសាស្ត្រនៃមហាវិទ្យាល័យវិទ្យាសាស្ត្រឱសថនៃសាកលវិទ្យាល័យខនកែន ប្រទេសថៃ៖ តាង សុវណ្ណារ័ត្ន, ប៊ុណតារ៉ាវ៉ាន់ ថូរ៉ាប្រា, សូផាវ៉ាឌី ដាវឌី, ជា ស៊ីន, កែវ សំអែល ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ 

ចែករំលែក

សត្វប្រឡាំងកាសដែលមានឈ្មោះវិទ្យាសាស្ត្រថា “Carcinoscorpius rotundicauda Latreille” គឺជាសត្វសមុទ្រដែលស្ថិតក្នុងគ្រួសារ Limulidae ដែលឈាមរបស់វាមានគុណសម្បត្តិក្នុងការបង្អាក់សកម្មភាពរបស់បាក់តេរីកុំឲ្យបាក់តេរីបង្កការខូចខាតដល់កោសិកា។ នៅក្នុងប្រទេសកម្ពុជាគេនិយមប្រើប្រាស់វាក្នុងគោលបំណងព្យាបាលជំងឺរលាក និងជំងឺដែលឆ្លងដោយបាក់តេរី។ ការស្រាវជ្រាវនេះត្រូវបានធ្វើឡើងក្នុងគោលបំណងដើម្បីធ្វើតេស្តរកសមាសធាតុឱសថ និងកំណត់នូវចំនួនឱសថនៅក្នុងជាលិកាផ្សេងៗ នៃសារពាង្គកាយទាំងមូលរបស់សត្វប្រឡាំងកាសស្ងួត។ សារពាង្គកាយទាំងមូលរបស់សត្វប្រឡាំងកាសស្ងួត ត្រូវបានយកមកពីហាងលក់ឱសថបុរាណក្នុងស្រុក ហើយត្រូវបានផ្ទៀងផ្ទាត់ជាមួយនឹងសំណាកសត្វសមុទ្រ (កូដៈ UPFOPMP-120003) ដែលតម្កល់ទុកនៅក្នុង “តិណាល័យសាកលវិទ្យាល័យពុទ្ធិសាស្ត្រ” (UP-Herbarium)។ ជាលិកានៃសារពាង្គកាយទាំងមូលរបស់សត្វប្រឡាំងកាសស្ងួតនេះ ត្រូវបានយកបំបែកជា 5 ផ្នែក ដែលមានដូចជា Prosoma, Ophisthosoma, Telson, Appendages និង Eggs។ផ្នែកនីមួយៗត្រូវបានយកមកកិនឲ្យម៉ត់ ហើយធ្វើការចម្រាញ់ជាមួយនឹងអង្គធាតុរំលាយ Ethanol តាមរយៈវិធីសាស្រ្តចម្រាញ់ Ultrasonication-Assisted Extraction (UAE) រូបធាតុចម្រាញ់ដែលទទួលបានត្រូវបានត្រៀមទុកសម្រាប់ធ្វើតេស្តគីមីឱសថ និងធ្វើតេស្តក្រូម៉ាតូក្រាបភីស្រទាប់ស្តើង។ ការធ្វើពិសោធន៍ទាំងអស់ត្រូវបានធ្វើឡើងក្នុងបន្ទប់ពិសោធន៍រូបធាតុឱសថនៃមហាវិទ្យាល័យឱសថសាស្ត្រ នៃសាកលវិទ្យាល័យពុទ្ធិសាស្ត្រ។ ក្រោយពេលធ្វើការចម្រាញ់ យើងទទួលបានផលិតផលចម្រាញ់ទៅតាមផ្នែកជាលិកានិមួយៗដូចជា Prosoma ទទួលបាន 3.19%, Ophisthosoma ទទួលបាន 4.86%, Telson ទទួលបាន 2.68%, Appendages ទទួលបាន 5.26% និង Eggs ទទួលបាន 2.84%។ លទ្ធផលនៃការធ្វើតេស្តគីមីឱសថបានឲ្យដឹងថា Ophisthosoma, Appendages និង Eggs មានផ្ទុកសមាសធាតុឱសថ Alkaloids, Coumarins, Saponins និង Resins។ Prosoma មានផ្ទុកសមាសធាតុឱសថ Alkaloids, Coumarins និង Resins។ Telson មានផ្ទុកសមាសធាតុឱសថ Alkaloids និង Coumarins។ ចំណែកឯការវិភាគលើក្រូម៉ាតូក្រាបភីស្រទាប់ស្តើងទៅលើជាលិកាផ្សេងៗរបស់សត្វប្រឡាំងកាសស្ងួត នៅជំហ៊ានរលកចន្លោះពី 254-366 nm និង 10%-H2SO4 នៅក្នុងអង្គធាតុរំលាយ “Mobile Phase” Toluene:Ethanol (9:1) យើងញែកបានឱសថចំនួន 3 អង្គធាតុឱសថ ដែលមានតម្លៃ Rf ដូចតទៅ៖ 0.22, 0.38 និង 0.59 នៅក្នុង Prosoma, Ophisthosoma, Telson និង Appendages។ ដោយឡែកចំពោះ Eggs គឺមានសមាសធាតុឱសថច្រើនជាងគេរហូតដល់ 5 អង្គធាតុឱសថដែលមានតម្លៃ Rf ដូចតទៅ៖ 0.18, 0.22, 0.38, 0.59 និង 0.73។ ព័ត៌មាននៃសមាសធាតុឱសថដែលមាននៅក្នុងជាលិកាផ្សេងៗរបស់សត្វប្រឡាំងកាសស្ងួតនេះ បញ្ជាក់អំពីគុណសម្បត្តិឱសថដែលមាននៅក្នុងសត្វប្រឡាំងកាសរបស់កម្ពុជា។ មិនតែប៉ុណ្ណោះ វាគឺជាព័ត៌ មានគ្រឹះសម្រាប់អ្នកវិទ្យាសាស្ត្រដទៃទៀតប្រសិនបើមានបំណងចង់បន្តការស្រាវជ្រាវពាក់ព័ន្ធនឹងការបំបែកសមាសធាតុឱសថចេញពីសត្វប្រឡាំងកាសរបស់កម្ពុជា។ ប្រភពអត្ថបទដោយ និស្សិត និងសាស្ត្រាចារ្យមហាវិទ្យាល័យឱសថសាស្ត្រ សាកលវិទ្យាល័យពុទ្ធិសាស្ត្រ៖ កែវ សំអែល, សូលឹម សិរីរឹទ្ធិ, ឡេង សៀវម៉ី, ហុង វិសាល, ភួង ថាក់រក្សា, អ៊ា សុខគីម, អ៊ឹង ហ៊ុយឃីម, នី ច័ន្ទសីហា និង ជា ស៊ីន ©2018 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអ៊ីនធឺណែត ឧបករណ៍អេឡិចត្រូនិក អាត់ជាសំឡេង ឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក

កង្វះជាតិទឹកក្នុងខ្លួន ឬអាកាសធាតុក្តៅអាចនឹងឲ្យអ្នកមានអារម្មណ៍ថាស្ងួតមាត់ដែលការដោះស្រាយហាក់មានភាពសាមញ្ញ ដោយគ្រាន់តែអាចធ្វើការបន្ថែមជាតិទឹកទៅក្នុងខ្លួន។ យ៉ាងណាមិញ បញ្ហាស្ងួតមាត់មួយចំនួនអាចជាស្ថានភាពធ្ងន់ធ្ងរនៃ ជំងឺណាមួយដែលអ្នកមិនបានដឹងជាមុន។ អ្វីគួរដឹង? ភាពធ្ងន់ធ្ងរនៃបញ្ហាស្ងួតមាត់តែងកើតមានឡើងជាញឹកញាប់លើ អ្នកជំងឺមហារីក អ្នកជំងឺកំពុងទទួលការព្យាបាលដើម្បីបំបាត់ការឈឺចាប់ អ្នកជំងឺកំពុងប្រើប្រាស់ឱសថប្រឆាំងការភ័យព្រួយ ឬឱសថប្រឆាំងការបាក់ទឹកចិត្តជាដើម។ ដោយឡែកអាការៈស្ងួតមាត់ អាចមិនមែនជាបញ្ហាធម្មតា ប្រសិនវាកើតឡើងដោយគ្មានភាពធូរស្រាលទាល់តែសោះ តែអ្នកអាចប្រើប្រាស់មធ្យោបាយមួយចំនួនដើម្បីបន្ធូរបន្ថយអាការៈនេះបាន មុនពេលសម្រេចចិត្តទទួលយកការព្យាបាល។ អ្វីគួរធ្វើ? -    ក្នុងកម្រិតស្រាល៖ អាចបៀមទឹកកក ផឹកទឹកកកតាមទុយោ ឬទទួលទានទឹកក្រូចឆ្មារ។ -    ដំបូន្មានផ្សេង៖ ▪ អាចប្រើប្រាស់ឱសថ Artisial (Parke Davis) ដែលជាទឹកមាត់សិប្បនិម្មិត ដោយគ្រាន់តែបាញ់ទៅក្នុងមាត់ ចំនួន៦ទៅ៨ដង ក្នុងមួយថ្ងៃ ▪ អាចប្រើប្រាស់ឱសថគ្រាប់ Sulfarlem S25 (Solvay Pharma) ដោយលេប ៣ដងក្នុងមួយថ្ងៃ អំឡុងពេលបរិភោគអាហារ។ -    ក្នុងករណីស្ថានភាពស្ងួតមាត់ មានភ្ជាប់មកជាមួយភ្នែកស្ងួតក្នុងកម្រិតដែលមិនអាចសូម្បីតែការយំអាចជារោគសញ្ញាព្រមាននៃជំងឺកម្រ Gougerot-Sjogren អាចកើតលើស្រ្តីអាយុ៥០ឆ្នាំ ដែលបណ្តាលមកពីភាពមិនប្រក្រតីនៃការឆ្លើយតបរបស់ប្រព័ន្ធការពាររាងកាយ។ វាជាជំងឺធ្ងន់ធ្ងរដែលអាចកើតឡើងបណ្តាលមកពី ជំងឺមហារីកក្រពេញទឹករងៃ (Lymphoma)។ -    ក្នុងករណី អាការៈស្ងួតមាត់មានរហូតជាប្រចាំ អ្នកគួរជួបពិភាក្សាជាមួយវេជ្ជបណ្ឌិតជំនាញ។ ត្រូវចាំថា រាល់សញ្ញាមិនប្រក្រតីនៃសុខភាពណាមួយ គួរទទួលបានការពិនិត្យនិងធ្វើរោគវិនិច្ឆ័យឲ្យបានច្បាស់ដើម្បីធានាបាននូវការព្យាបាលដែលមានប្រសិទ្ធភាព និងអាចជឿទុកចិត្តបាន។ ប្រភពយោង៖ Le vademecum de la Médication officinale ©2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូល ប្រព័ន្ធអ៊ីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក
Top