Loading...

Your cart (4)

Product thumb

Basic hooded sweatshirt in pink

  • Color: Pink
  • Size: S
$15.00 $31.00
Product thumb

Black and white sport cap

$18.15
Product thumb

Mid-rise slim cropped fit jeans

  • Size: M
$76.00
Product thumb

Men fashion gray shoes

  • Color: Gray
  • Size: 10.5
$84.00
Subtotal: $198.65
Checkout
(096) 7888-017 info@healthtime.tips (096) 7888-017
ភាសាខ្មែរ ភាសាខ្មែរ
English English
ចូលគណនី
Createx Logo
  • Dec 23, 2019 |
  • 4 ឆ្នាំមុន |
  • 2.8K មើល

តោះ! មកស្គាល់ប្រភេទកម្រាលយូហ្គាទាំងអស់គ្នា

យូហ្គា មើលទៅមានភាពសាមញ្ញណាស់ដែលមិនតម្រូវឲ្យមានឧបករណ៍ច្រើននោះទេ ដោយគ្រាន់តែមានកម្រាលមួយនិងរាងកាយអ្នកប៉ុណ្ណោះក៏អាចហាត់បានដែរ។ ជាក់ស្ដែង លំហាត់ប្រាណបែបនេះមានភាពពេញនិយម និងទាក់ទាញដោយសារលក្ខណៈពិសេសជាច្រើនថែមទាំងអាចហាត់បានពេញមួយតួខ្លួនទៀតផង។ ដោយឡែក បើក្រឡេកមើលកម្រាលយូហ្គាវិញក៏ត្រូវបានផលិតឡើងជាច្រើនប្រភេទទៅតាមតម្រូវការដែរ។ តោះ! មកមើលទាំងអស់គ្នាថាតើមានប្រភេទអ្វីខ្លះ? បើទោះមិនបានដឹងគ្រប់សព្វ ក៏បានដឹងខ្លះដែរ៖ កម្រាលយូហ្គាស្អិត (Basic Sticky Yoga Mats) ជាប្រភេទកម្រាលដែលមានច្រើនក្នុងចំណាមកម្រាលទាំងអស់។ លក្ខណៈស្អិតរបស់វាអាចជួយទប់លំនឹងដងខ្លួនកុំឲ្យដួលនៅពេលហាត់យូហ្គាម្ដងៗ។ បើនិយាយពីទំហំវិញ អ្នកក៏អាចជ្រើសរើសកម្រាស់ពី ១/៨ ទៅ១/៤អុីង ទៅតាមសភាពដែលអ្នកចង់បាន និងធ្វើឲ្យការហាត់កាន់តែបានរលូន។ កម្រាលយូហ្គាប្រភេទនេះមានតម្លៃធូរថ្លៃជាងប្រភេទផ្សេងទៀត ដែលអ្នកអាចទិញបានសម្រាប់ប្រើប្រាស់ផ្ទាល់ខ្លួននៅក្នុងផ្ទះ។ កម្រាលយូហ្គាកៅស៊ូធម្មជាតិ (Natural Rubber Yoga Mats) ដើម្បីកាន់តែជិតស្និទ្ធជាមួយនឹងធម្មជាតិ អ្នកអាចធ្វើការជ្រើសរើសប្រភេទយូហ្គាដែលធ្វើឡើងពីកៅស៊ូធម្មជាតិ។ វាជាប្រភេទកម្រាលយូហ្គាដែលគ្មានជាតិពុល និងផ្ដល់ផលវិជ្ជមានដល់បរិស្ថានដោយហេតុថាកាកសំណល់នៃកៅស៊ូប្រភេទនេះអាចបំបែក និងយកមកកែច្នៃបាន។  កម្រាលបែបនេះស័ក្តិសមបំផុតសម្រាប់កាយវិការយូហ្គាដែលផ្ដោតសំខាន់ទៅលើសាច់ដុំ និងត្រូវការថាមពលខ្លាំង។ កម្រាលយូហ្គាប្លាស្ទិកយឺត (Plastic Elastomer Yoga Mats) ដោយហេតុថាការផលិតកម្រាលយូហ្គាកាន់តែមានជម្រើសច្រើនដែលមិនត្រឹមតែផ្ដល់ផលប្រយោជន៍ដល់បរិស្ថានមួយមុខនោះទេ វាក៏មានឥទ្ធិពលវិជ្ជមានទៅលើសុខភាពផងដែរ។ ជាក់ស្ដែងកម្រាលបង្កើតដោយប្លាស្ទិកម៉្យាងឈ្មោះថា Plastic Elastomer មិនមែនជាប្រភេទប្លាស្ទិកដែលធ្វើឲ្យពុលដល់សុខភាពដូចទៅនឹងពពួក PVC ឬសារធាតុពុលដទៃទៀតឡើយ។ ជាពិសេសប្រភេទកម្រាលយូហ្គានេះ អាចប្រើបានសម្រាប់អ្នកដែលមានស្បែកឆាប់ប្រតិកម្ម មានភាពធន់ និងងាយស្រួលក្នុងការសម្អាតដោយសារភាពមិនស្រូបទឹករបស់វា។ កម្រាលយូហ្គាក្រណាត់ (Cotton Yoga Mats) លក្ខណៈទន់ និងជក់ទឹករបស់យូហ្គាប្រភេទក្រណាត់នេះ អាចធ្វើឲ្យកាយវិការហាត់របស់អ្នកកាន់តែមានភាពស្និទ្ធស្នាល។ អ្នកអាចធ្វើការសម្អាតភាពកង្វក់ភ្លាមៗបន្ទាប់ពីប្រើប្រាស់រួច ប៉ុន្តែដោយសារតែវាធ្វើឡើងពីក្រណាត់ នោះវាអាចប្រឈមខ្ពស់ទៅនឹងការដាច់រហែកបាន។ កម្រាលយូហ្គាសរសៃអំបោះរឹង (Jute Yoga Mats) សរសៃអំបោះដែលចម្រាញ់ចេញពីដើមរុក្ខជាតិមួយចំនួន ក៏ត្រូវបានប្រើប្រាស់សម្រាប់ផលិតជាកម្រាលយូហ្គាផងដែរនាពេលបច្ចុប្បន្ននេះ។ ភាគច្រើនសរសៃអំបោះបែបនេះគេអាចរកបាននៅតំបន់អាស៊ីអាគ្នេយ៍ និងមានលក្ខណៈធម្មជាតិដែលអំណោយផលដល់បរិស្ថាន។ អ្នកអាចជ្រើសរើសកម្រាលប្រភេទនេះសម្រាប់ការហាត់យូហ្គាគ្រប់កាយវិការ ដោយសារសភាពធន់ និងស្អិតរបស់វា។ ត្រូវចាំថា វាជាការល្អដែលអ្នកគួរស្វែងយល់ និងជ្រើសរើសប្រភេទកម្រាលយូហ្គាណាមួយដែលមិនត្រឹមតែឲ្យការហាត់ប្រព្រឹត្តទៅដោយរលូននោះទេ ថែមទាំងជាចំណែកផ្ដល់នូវអនាម័យ និងផាសុកភាពសម្រាប់អ្នកក៏ដូចជាបរិស្ថានផងដែរ។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ​ លេខ ៨៦ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

លំហាត់​ប្រាណ
ចែករំលែក
  • Dec 23, 2019 |
  • 4 ឆ្នាំមុន |
  • 2.3K មើល

Nestlé បង្កើនទម្លាប់នៃការរស់នៅប្រកបដោយសុខភាពល្អជូនដល់ប្រជាជនកម្ពុជា

ភ្នំពេញនាថ្ងៃទី២០ ខែធ្នូ ឆ្នាំ២០១៩៖ ដំណើរទេសចរណ៍ទ្រង់ទ្រាយធំប្រកបដោយក្តីសប្បាយរីករាយដែលមិនធ្លាប់មានពីមុនមកនៅប្រទេសកម្ពុជារបស់ក្រុមហ៊ុន Nestlé ដែលមានគោលដៅលើកកម្ពស់ទម្លាប់នៃការរស់នៅប្រកបដោយសុខភាពល្អដែលនាំទៅដល់សុខភាពកាន់តែប្រសើរ ជីវិតកាន់តែរីករាយបានធ្វើដំណើរមកដល់ផ្សារទំនើប អ៊ីអនម៉ល ១  ហើយកាលពីថ្ងៃទី២០ ខែធ្នូនេះបន្ទាប់ពីបានធ្វើដំណើរទៅកាន់បណ្តាខេត្តចំនួន៥ ក្នុងអំឡុងខែវិច្ឆិកា និងខែធ្នូ ឆ្នាំ២០១៩។ យើងទាំងអស់គ្នាតែងតែប្រាថ្នាចង់រស់នៅដែលប្រកបដោយសេចក្តីសុខសាន្តចៀសផុតពីជំងឺតម្កាត់ផ្សេងៗ ប៉ុន្តែសំណួរសួរថា តើយើងអាចរក្សាបាននូវសុខភាពល្អរបស់យើងបានយ៉ាងដូចម្តេច ដើម្បីយើងអាចសម្រេចក្តីសុបិនរបស់យើងមួយនេះ? ហើយថាតើយើងអាចធ្វើអ្វីបានខ្លះជារៀងរាល់ថ្ងៃនេះដើម្បីឲ្យមានរាងស្អាត រឹងមាំ និងគ្មានជំងឺ? មានតែក្រុមហ៊ុន Nestlé មួយគត់ ដែលជាក្រុមហ៊ុនអាហារូបត្ថម្ភ និងភេសជ្ជៈដ៏ធំជាងគេបំផុតមួយនៅលើពិភពលោកមានប្រភពកំណើតមកពីប្រទេសស្វីស ដែលអាចបកស្រាយនូវរាល់ចម្ងល់ទាំងអស់នេះបាន។ យ៉ាងណាមិញ ក្រុមហ៊ុន Nestlé តែងតែយកចិត្តទុកដាក់ និងផ្សារភ្ជាប់របៀបរស់នៅប្រកបដោយសុខភាពល្អ និងទម្លាប់នៃការញ៉ាំអាហារឲ្យបានល្អត្រឹមត្រូវទៅក្នុងរបៀបវារៈនៃប្រតិបត្តិការរបស់ខ្លួននៅទូទាំងពិភពលោក ដូច្នេះហើយបានជាក្រុមហ៊ុន Nestlé សម្រេចចិត្តរៀបចំនូវកម្មវិធី «ដំណើរទេសចរណ៍ Nestlé សុខភាពកាន់តែប្រសើរ ជីវិតកាន់តែរីករាយ»នេះឡើង។ គោលបំណងគឺដើម្បីលើកទឹកចិត្ត និងជំរុញប្រជាជនកម្ពុជាឲ្យក្លាយជាម្ចាស់ជើងឯកខាងសុខភាព ពោលមានសុខភាពល្អប្រសើរ ធ្វើឲ្យជីវិតរស់នៅកាន់តែសកម្មជាងមុននិងជ្រើសរើសអាហារូបត្ថម្ភឲ្យបានត្រឹមត្រូវដើម្បីលើកកម្ពស់សុខុមាលភាពរាងកាយ និងសុខភាពផ្លូវចិត្ត។ ដោយនាំមកជាមួយនូវការលើកកម្ពស់ការយល់ដឹងអំពីអាហារូបត្ថម្ភជូនដល់ប្រជាជន ដំណើរទេសចរណ៍នេះបានធ្វើដំណើរទៅតាមបណ្តាខេត្តជាច្រើនរួចមកហើយ ក្នុងនោះរួមមាន៖ ខេត្តកណ្តាល កំពង់ចាមបាត់ដំបង សៀមរាប និងខេត្តត្បូងឃ្មុំ ដោយមានអ្នកចូលរួមរហូតដល់ទៅប្រមាណមួយម៉ឺននាក់ឯណោះ។   ព្រឹត្តិការណ៍ដ៏ធំ និងកក្រើកដែលមិនធ្លាប់មានពីមុនមកនេះ ក៏មានការអញ្ជើញចូលរួមពីសំណាក់ ឌីជេណាណា និងអ្នកជំនាញផ្នែកអាហារូបត្ថម្ភដែលបានចែករំលែកអំពីគន្លឹះមានប្រយោជន៍ជាច្រើនដែលអាចអនុវត្តបានប្រចាំថ្ងៃដើម្បីធ្វើឲ្យសុខភាពកាន់តែប្រសើរ ជីវិតកាន់តែរីករាយ និងបានពិភាក្សាអំពីបញ្ហាអាហារូបត្ថម្ភដែលជះឥទ្ធិពលដល់ប្រជាជនកម្ពុជា រួមទាំងបញ្ហាប្រឈមដែលកំពុងកើតមានទាក់ទងនឹងបញ្ហាកង្វះជាតិដែក និងកង្វះអាហារូបត្ថម្ភផងដែរ។ បញ្ហាកង្វះអាហារូបត្ថម្ភក្នុងចំណោមកុមារនៅកម្ពុជានៅតែជាបញ្ហាប្រឈមដដែល ហើយក្រុមហ៊ុន Nestlé នឹងខិតខំបន្តដោះស្រាយបញ្ហានេះដោយការអប់រំប្រជាជនក្នុងស្រុក តាមរយៈកម្មវិធីដំណើរទេសចរណ៍នេះ និងការផ្តល់ផលិតផលដែលមានមីក្រូសារជាតិបំប៉នប្រកបដោយគុណភាពខ្ពស់សម្រាប់កុមារ និងមនុស្សពេញវ័យតាមរយៈផលិតផលមួយចំនួនដូចជា៖ ទឹកដោះគោឆៅសញ្ញាខ្លាឃ្មុំ (Bear Brand) និងភេសជ្ជៈ ម៉ៃឡូ ជាដើម។ គួរបញ្ជាក់ផងដែរ ព្រឹត្តិការណ៍នេះនឹងបិទបញ្ចប់នៅឯខេត្តតាកែវ នាថ្ងៃទី២៨ ដល់ថ្ងៃទី២៩ ខែធ្នូ ឆ្នាំ២០១៩ខាងមុខនេះដោយនឹងនាំមកនូវកម្មវិធីកម្សាន្តសប្បាយៗ រួមជាមួយនឹងសកម្មភាពហាត់ប្រាណជាច្រើនដូចជា៖ ការរាំលេង និងការបង្វិលកង ព្រមទាំងការចាប់រង្វាន់យ៉ាងច្រើនសន្ធឹកសន្ធាប់ទៀតផង។ ក្នុងឱកាសនោះផងដែរ ក៏មានការពិនិត្យសុខភាពដោយឥតគិតថ្លៃអាចរកបានពេញមួយថ្ងៃជាមួយនឹងការពិនិត្យសន្ទស្សន៍ម៉ាសរាងកាយ (BMI) និងការធ្វើតេស្តឆ្អឹង រួមជាមួយដំបូន្មានសំខាន់ៗជាច្រើន ដោយផ្អែកលើលទ្ធផល និងគន្លឹះសុខភាពប្រចាំថ្ងៃ។ លើសពីនេះទៅទៀត នៅក្នុងព្រឹត្តិការណ៍នេះ សាធារណជនក៏អាចភ្លក្សបានដោយឥតគិតថ្លៃ និងសេរីនូវរាល់ផលិតផលដែលមានគុណភាពខ្ពស់ទាំងអស់ ដែលផ្តល់ជូនដោយក្រុមហ៊ុនផងដែរ។ ដល់ពេលដែលត្រូវគិតគូរពីសុខភាពរបស់លោកអ្នកហើយ សូមកុំឲ្យព្រឹត្តិការណ៍អប់រំដ៏មានសារសំខាន់មួយនេះរំលងផុតពីលោកអ្នកឲ្យសោះ។ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ព្រឹត្តិការណ៍ និងព័ត៌មាន
ចែករំលែក
  • Dec 21, 2019 |
  • 4 ឆ្នាំមុន |
  • 3.4K មើល

ជំងឺទឹកនោមផ្អែមជាឃាតករលាក់មុខ

តើជំងឺទឹកនោមផ្អែមជាអ្វី? ជាជំងឺរ៉ាំរ៉ៃដែលមានកម្រិតជាតិស្ករក្នុងឈាមឡើងខ្ពស់ និងមិនឆ្លង ហើយមិនអាចព្យាបាលឲ្យជាសះស្បើយទេ តែអាចបង្ការបាន។ ចំណែកកត្តាហានិភ័យនៃជំងឺទឹកនោមផ្អែមរួមមាន៖  • ទម្លាប់នៃការទទួលទានអាហារមិនមានសុខភាព  • កង្វះកាយវប្បកម្ម (សកម្មភាពរាងកាយ)  • លើសទម្ងន់ ឬធាត់  • ការជក់បារី  • កម្រិតជាតិស្ករក្នុងឈាមមិនធម្មតា អំឡុងពេលមានផ្ទៃពោះ  • ការវិវឌ្ឍនៃអាយុកាល ចាស់ជរា អាយុច្រើន  • ប្រវត្តិគ្រួសារ។ តើខ្ញុំមានជំងឺទឹកនោមផ្អែមទេ? ដើម្បីដឹងថាអ្នកមានជំងឺទឹកនោមផ្អែម ឬមានកម្រិតជាតិស្ករក្នុងឈាមខ្ពស់ មានរោគសញ្ញាសំខាន់ៗបី ដូចខាងក្រោម៖  • នោមញឹកញាប់  • ផឹកទឹកច្រើន  • ហូបច្រើន។ រោគសញ្ញាទូទៅ ការស្រកទម្ងន់ អស់កម្លាំង មានអារម្មណ៍ងងុយគេង បន្ទាប់ពីបរិភោគអាហារ។ដោយឡែកក៏មានរោគសញ្ញាដទៃទៀតដូចជា៖  • ព្រឹលភ្នែក  • រមាស់នៅតំបន់ប្រដាប់បន្តពូជ  • ការរលាកអណ្តាត  • ស្ពឹកដៃជើង ការព្យាបាលរបួសមិនងាយសះស្បើយ និងការបង្ករោគលើស្បែក។ តើខ្ញុំត្រូវទៅមណ្ឌលសុខភាពនៅពេលណា?  • ពិគ្រោះជាមួយគ្រូពេទ្យ គិលានុបដ្ឋាយិកា ដើម្បីធ្វើតេស្តកម្រិតជាតិស្ករនៅក្នុងឈាម ការធ្វើរោគវិនិច្ឆ័យ និងការព្យាបាលបានទាន់ពេល។  • ប្រសិនបើអ្នកមានអាយុ៤០ឆ្នាំឡើង ទោះជាមិនមានរោគសញ្ញាដូចខាងលើ  ឬមានរោគសញ្ញាដូចដែលបានរៀបរាប់ខាងលើ ការធ្វើរោគវិនិច្ឆ័យនិងការព្យាបាលទាន់ពេលអាចបង្ការ ឬពន្យារផលវិបាកដែលកើតឡើងនៅក្នុងផ្នែកជាច្រើននៃរាងកាយ និងបន្ថយការប្រឈមនៃការស្លាប់មុនអាយុ។ ផលវិបាកនៃជំងឺទឹកនោមផ្អែមរួមមាន៖   • គ្រោះថ្នាក់សរសៃឈាមខួរក្បាល   • ងងឹតភ្នែក   • គាំងបេះដូង   • ជំងឺខ្សោយតម្រងនោម   • កាត់អវយវៈ (ជើង)។ តើអាចទប់ស្កាត់ជំងឺទឹកនោមផ្អែមយ៉ាងដូចម្តេច? ដើម្បីបង្ការ ឬពន្យារពេលនៃការចាប់ផ្តើមជំងឺទឹកនោមផ្អែមប្រភេទទី ២ និងផលវិបាករបស់វាអ្នកគួរតែ៖  • ថែរក្សាទម្ងន់រាងកាយឲ្យមានសុខភាពល្អ (មិនឲ្យធាត់)  • ហាត់ប្រាណយ៉ាងហោចណាស់ ៣០នាទី  • ទទួលទានអាហារដែលមានសុខភាពល្អ អាហារចម្រុះ ទទួលទានផ្លែឈើ និងបន្លែឲ្យបានច្រើន  • ចៀសវាងអាហារ ភេសជ្ជៈដែលមានជាតិស្ករ និងជាតិខ្លាញ់ឆ្អែត  • ចៀសវាងការជក់បារី និងការពារពីការស្រូបផ្សែងបារី។ តើគេអាចគ្រប់គ្រងជំងឺទឹកនោមផ្អែមដោយរបៀបណា? ប្រសិនបើអ្នករកឃើញថាកម្រិតជាតិស្ករនៅក្នុងឈាមរបស់អ្នកមានកម្រិតខ្ពស់សូមទៅជួបគ្រូពេទ្យដើម្បីព្យាបាលឲ្យបានឆាប់តាមដែលអាចធ្វើទៅបាន។ ទោះបីជាអ្នកមិនមានរោគសញ្ញាក៏ដោយ ការខូចខាតដល់សរីរាង្គអាចបង្កើនការស្លាប់បាន។  ប្រសិនបើអ្នកមានជំងឺទឹកនោមផ្អែម អ្នកអាចចូលរួមយ៉ាងសកម្មក្នុងការគ្រប់គ្រងស្ថានភាពរបស់អ្នក។ ដោយអ្នកត្រូវ៖  • លេបថ្នាំឲ្យបានត្រឹមត្រូវតាមវេជ្ជបញ្ជារបស់គ្រូពេទ្យ  • ទទួលទានអាហារតាមរបបកំណត់ និងលេបថ្នាំឲ្យបានទៀងទាត់តាមពេលវេលាកំណត់  • ត្រូវដឹងពីអ្វីដែលអ្នកគួរធ្វើនៅពេលអ្នកមានកម្រិតជាតិស្ករក្នុងឈាមថយចុះ  • ធ្វើការហាត់ប្រាណឲ្យបានទៀងទាត់  • ចៀសវាងការជក់បារី និងបពា្ឈប់ការប្រើគ្រឿងស្រវឹងប្រកបដោយគ្រោះថ្នាក់  • តាមដានកម្រិតជាតិស្ករក្នុងឈាមនៅផ្ទះ (ប្រសិនបើអាចធ្វើបាន)។ បកស្រាយដោយ៖ វេជ្ជបណ្ឌិត ឡាក់ ឡេង ឯកទេសសុខភាពសាធារណៈ អនុប្រធានមជ្ឈមណ្ឌលជាតិលើកកម្ពស់សុខភាព អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ លេខ ៨៥ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក
  • Dec 21, 2019 |
  • 4 ឆ្នាំមុន |
  • 1.9K មើល

មន្ទីរពេទ្យព្យាបាលកុមារបេះដូងជប៉ុនរៀបចំការប្រគុំតន្ត្រី មីដូរីដល់អ្នកជំងឺ និងក្មេងៗដែលមានជំងឺមហារីក..

នាថ្ងៃទី​ ១៩​ ខែ​ ១២​ ឆ្នាំ​ ២០១៩៖​ ក្នុងបរិវេណមន្ទីរពេទ្យបង្អែកពញាឮ​ មជ្ឈមណ្ឌលព្យាបាលកុមារបេះដូងជប៉ុនមានការប្រគំតន្រ្តីពី​ អ្នកនាង​​ មិដុរិ ដោយរួមសហការជាមួយ UN Messenger of Peace ​ ដែលជាអ្នកលេង វីយូឡុង​ ដ៏ល្បីល្បាញម្នាក់នៅលើពិភពលោក។គាត់ព្រមទាំងក្រុមដែលមកពីICEP (International Community Engagement Program)ទាំងអស់មានសមាជិក៤នឹងមកប្រគុំភ្លេងរួមគ្នាជូនដល់អ្នកជំងឺជាង៥០នាក់ដែកំពុងតែសម្រាកព្យាបាលនៅមជ្ឈមណ្ឌលព្យាបាលកុមារបេះដូងជប៉ុន។ មជ្ឈមណ្ឌលព្យាបាលកុមារបេះដូងជប៉ុន និង MUSIC SHARING នឹងចែករំលែកអារម្មណ៍របស់អ្នកជំងឺ ។ អង្គការបេះដូងជប៉ុនគឺជាមន្ទីរពេទ្យសប្បុរសធម៌ដែផ្តល់ជូនដោយមិនគិតប្រាក់។​ សមាជិកទាំងអស់នៃមន្ទីរពេទ្យ ផ្តោតសំខាន់ទៅលើកាផ្តល់ជូនដោយយកចិត្តទុកដាក់នូវការថែទាំអ្នកជំងឺដោយមានគុណភាពខ្ពស់។  ការប្រគុំតន្ត្រីនេះផងដែរ អ្នកនាងមិដុរិ និង អង្គការបេះដូងជប៉ុនរួមទាំងសមាជិកសហការគ្នាដើម្បីធ្វើឲ្យអារម្មណ៍អ្នកជំងឺក៏ដូចជាគ្រួសារអ្នកជំងឺបានធូរស្បើយ។ នាឱកាសនោះផងដែរ អ្នកលេងវីយូឡុង អ្នកនាង មិដុរិ និងតន្ត្រីករ៣នាក់ទៀតមកពីICEPសំដែងនូវ​តន្ត្រីក្លាស៊ិកជូនទស្សនា។ មិនមែនត្រឹមតែជាការសម្តែងនៅចំពោះមុខអ្នកជំងឺជាច្រើនតែម្តងប៉ុណ្ណោះទេ ថែមទាំងសម្តែងជូនអ្នកជំងឺកុមារមហារីកទៅតាមបន្ទប់តូចៗនីមួយៗផងដែរ។ ដោយសារតែអ្នកជំងឺកុមារមហារីកមានប្រព័ន្ធភាពស៊ាំខ្សោយគឺមិនអាចចេញពីបន្ទប់ក្នុងអំឡុងពេលទទួលការព្យាបាលនោះទេ។ ហេតុដូច្នេះហើយទើបក្រុមតន្ត្រីករចូលប្រគុំតន្ត្រីជូនតាមបន្ទប់នីមួយៗ។  ជាក់ស្តែង ​មជ្ឈមណ្ឌលព្យាបាលកុមារបេះដូងជប៉ុនគឺជាមន្ទីរពេទ្យសប្បុរសធម៌ដែលផ្តល់ជូននូវសេវាកម្មព្យាបាលដល់កុមារនិងមនុស្សចាស់ក្រីក្រដោយមិនគិតប្រាក់។ អ្នកជំងឺប្រមាណជាង១៥០០០នាក់បានទទួលការព្យាបាល និង​ប្រមាណជាង១០០០នាក់បានទទួលការវះកាត់កាលពីឆ្នាំកន្លងទៅនេះ។ អង្គការបេះដូងជប៉ុនបានកំពុងបន្តសកម្មភាពព្យាបាលរយ:ពេល១០ឆ្នាំមកហើយ។ មុនពេលបង្កើតទីតាំងមជ្ឍមណ្ឌលព្យាបាលនៅខេត្តកណ្តាលកាលពីឆ្នាំ២០១៦ ពេលនោះគឺផ្តោតសំខាន់ទៅលើការពិនិត្យជំងឺចល័ត។ ក្រុមវេជ្ជបណ្ឌិត និងគិលានុបដ្ឋាយិកាបាននាំយកឧបករណ៍វេជ្ជសាស្រ្តទៅដល់ទីជនបទដើម្បីផ្តល់ជូននូវការពិនិត្យបូករួមទាំងការវះកាត់ផងដែរ។ បន្ទាប់ពីបានបង្កើតមជ្ឍមណ្ឌលព្យាបាលកុមាររួចមក ក៏នៅតែបន្តការពិនិត្យជំងឺចល័តផង និងព្យាបាលជូនផងតាំងពីកុមាររហូតដល់មនុស្សចាស់ដោយមិនគិតប្រាក់។ មជ្ឈមណ្ឌលព្យាបាលកុមារបេះដូងជប៉ុន​ ចំនុចសំខាន់នៃបេសកកម្មគឺការធ្វើឲ្យវេជ្ជសាស្រ្តទៅដល់កន្លែងដែលពុំមានវេជ្ជសាស្ត្រ។ គួរបញ្ជាក់ផងដែរថា នៅឆ្នាំ២០១៨ អង្គការបេះដូងជប៉ុនបានចាប់ផ្តើមព្យាបាលជំងឺមហារីកកុមារទៅលើកុមារដែលមានភាពលំបាកក្នុងការទទួលការព្យាបាលនៅកម្ពុជា។ នៅមជ្ឈមណ្ឌលព្យាបាលកុមារបេះដូងជប៉ុន​មានអ្នកជំងឺមហារីកបានបញ្ចប់ការព្យាបាលដោយសុវត្ថិភាពរួចមកហើយ។ គ្រូពេទ្យជំនាញបានព្យាបាលដោយប្រើថ្នាំគីមីក្រុមគ្រូពេទ្យជំនាញមកពីប្រទេសជប៉ុនបានមកធ្វើការវះកាត់ជូនអ្នកជំងឺមហារីកក៏ដូចជាជំងឺដែលពិបាកព្យាបាលផ្សេងទៀតជាទៀងទាត់។ បើទោះជាជំងឺដែលត្រូវទទួលការព្យាបាលរយ:ពេលយូរក៏ដោយ ក៏ថ្លៃព្យាបាលទាំងអស់មិនគិតប្រាក់ឡើយ។ MUSIC SHARING គឺជាអង្គការមិនស្វែងរកប្រាក់ចំណេញត្រូវបានបង្កើតឡើងនៅក្នុងទីក្រុង តូក្យូ ក្នុងឆ្នាំ១៩៩២ក្នុងការសំដែងតន្រ្តី នៅតាមសាលា មន្ទីរពេទ្យកន្លែងជនភាសខ្លួនពីសង្រ្គាមស្នាក់នៅ និង​តាមអង្កការនានា ទាក់ទងការអប់រំក្នុងសង្កមជាដើម សំរាប់ប្រជាជនដែលមានការប្រកួតប្រជែងក្នុងការរស់នៅ​​​​​ ក្នុងប្រទេសជប៉ុន និង​ទ្វីបអាស៊ីទាំងមូល។ ពួកគេបានសំដែងនៅមុខមនុស្សលើសពី២៥០០០០នាក់ ក្នុងរយ: ពេល ២៥ឆ្នាំ​។ លេខទូរស័ព្ទសម្រាប់ទំនាក់ទំនង៖  ណាកាមឹរ៉ា កាណាន់　(Nakamura Kanan) មជ្ឈមណ្ឌលព្យាបាលកុមារបេះដូងជប៉ុន ទូរស័ព្ទ៖ (៨៥៥) ១៧ ៩៥០ ០៨៦  អ៊ីមែល៖ k.nakamura@japanheart.org 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក
  • Dec 20, 2019 |
  • 4 ឆ្នាំមុន |
  • 12K មើល

តើអ្វីដែលបណ្ដាលឲ្យមានជំងឺបូសនៅលើស្បែក?

ជំងឺបូសអាចកើតឡើងលើមនុស្សគ្រប់វ័យ និងនៅគ្រប់ទីកន្លែងទាំងអស់នៃរាងកាយមនុស្ស ដោយដំបូងឡើយវាអាចចាប់ផ្តើមត្រឹមការរលាក ឬស្ទះគល់រន្ធតូចៗរួចបន្តស៊ីទៅខាងក្នុងហើយបង្កជាដុំតូចមួយមានខ្ទុះ។ និយមន័យ ជំងឺបូស ដោយពាក្យបច្ចេកទេសហៅថា Carbuncle គឺជាជំងឺសើស្បែកមួយប្រភេទដែលបង្កឡើងពីការស្ទះរន្ធជាហេតុបណ្តាលឲ្យឡើងក្រហម ឈឺចាប់ ហើមប៉ោង និងមានខ្ទុះ ព្រមទាំងឆ្លងពីមនុស្សម្នាក់ទៅមនុស្សម្នាក់បានផងដែរ។ ជាទូទៅជំងឺនេះតែងតែកើតមានឡើងនៅតាមទីតាំងសើលើនៃស្បែកដូចជា ភ្លៅ កញ្ចឹងក កំប៉េះគូទ និងក្លៀកជាដើម។ ដោយឡែក ជំងឺបូសកើតឡើងដោយសារពពួកបាក់តេរីដែលបង្កទៅជាខ្ទុះនៅស្បែកម៉្យាងដែលគេហៅថា Staphylococcus។ មូលហេតុចម្បង និងកត្តាជំរុញ មានមូលហេតុចម្បង និងកត្តាសំខាន់ដែលជំរុញឲ្យកើតជំងឺនេះឡើងរួមមាន៖  • ការដាច់រលាត់ស្បែក ឬមានរបួសតាមគល់រន្ធរោមដែលធ្វើឲ្យពពួកមេរោគជ្រៀតចូលបាន  • កង្វះអនាម័យខ្លួនប្រាណដោយការប៉ះផ្ទាល់ជាមួយមជ្ឈដ្ឋានដែលមានមេរោគ  • កង្វះអាហារូបត្ថម្ភ។ ចំណែកបុគ្គលដែលមានហានិភ័យខ្ពស់ក្នុងការប្រឈមចំពោះជំងឺនេះរួមមាន៖  • អ្នកជំងឺទឹកនោមផ្អែម  • អ្នកមានប្រព័ន្ធភាពសុំាចុះខ្សោយ  • ការប៉ះពាល់សារធាតុគីមី។ រោគសញ្ញា ជាទូទៅជំងឺនេះស្តែងចេញជារោគសញ្ញាមួយចំនួនដូចជា៖  • មានកន្ទួលក្រហមរឹង  • ហើមប៉ោង  • ឈឺចាប់ និងមានខ្ទុះជាដើម។ ការធ្វើរោគវិនិច្ឆ័យ ចំពោះការធ្វើរោគវិនិច្ឆ័យទៅលើជំងឺនេះគឺគ្រូពេទ្យពិនិត្យទៅលើរោគសញ្ញាគ្លីនិកដូចដែលបានរៀបរាប់ខាងលើ និងការបូមខ្ទុះយកទៅពិនិត្យបន្ថែម។ វិធីសាស្រ្តព្យាបាល គ្រប់លក្ខខណ្ឌនៃជំងឺបូស គួរតែទទួលការព្យាបាលសមស្របទៅតាមសភាពធ្ងន់ធ្ងរ ឬស្រាលរបស់ជំងឺ។ ជាក់ស្តែង ប្រសិនបើបូសមានលក្ខណៈឡើងប៉ោងរឹងក្រាស់នោះ ការព្យាបាលគឺត្រូវយកសំឡីស្អាតមកផ្សើមជាមួយសេរ៉ូមប្រៃ រួចយកមកបិតនៅលើបូសដើម្បីឲ្យបូសស្តើង និងងាយចេញមុខ។ ការធ្វើបែបនេះ គឺដើម្បីងាយស្រួលក្នុងការវះយកខ្ទុះចេញឲ្យអស់។ បន្ទាប់ពីធ្វើការវះកាត់យកខ្ទុះចេញអស់ គ្រូពេទ្យត្រូវឲ្យថ្នាំផ្សះដើម្បីឲ្យរបួសឆាប់ជាសះស្បើយ ផ្ទុយទៅវិញប្រសិនបើអ្នកជំងឺមិនបានទទួលការព្យាបាលឲ្យបានត្រឹមត្រូវ ឬទាន់ពេលវេលានោះទេ វានឹងបណ្តាលឲ្យមានការស៊ីចូលទៅក្នុងស្បែកកាន់តែជ្រៅទៅៗរហូតចូលទៅសាច់ដុំ ឬសរសៃប្រសាទដែលធ្វើឲ្យខូច ឬស្វិតសាច់ដុំ និងសរសៃប្រសាទជាដើម។ គួរបញ្ជាក់ផងដែរថា ជំងឺសើស្បែកនេះមិនបណ្តាលឲ្យមានការកើតជំងឺសើស្បែកផ្សេងៗទៀតបាននោះទេ។ វិធីសាស្រ្តការពារ នាពេលបច្ចុប្បន្ន បញ្ហានេះកើតមានច្រើន ដូច្នេះអ្នកគួរតែការពារខ្លួនពីជំងឺនេះដោយ៖  • ត្រូវរក្សាអនាម័យខ្លួនប្រាណឲ្យបានត្រឹមត្រូវ  • ចៀសវាងការសម្អាតខ្លួនប្រាណជាមួយសាប៊ូដែលមានសារធាតុកាត់ច្រើនហួសពេក  • ត្រូវសម្អាតសម្ភារប្រើប្រាស់ ដូចជាខ្នើយ ភួយ កន្សែង និងកម្រាលពូកជាដើម។ មិនថាអ្នកមានជំងឺបូស ឬមានបញ្ហាស្បែកទូទៅនោះទេ ឲ្យតែពាក់ព័ន្ធនឹងស្បែកគួរចាំបាច់តែទៅពិនិត្យ និងពិគ្រោះយោបល់ជាមួយគ្រូពេទ្យឯកទេសសើស្បែកដើម្បីទទួលបានការព្យាបាលដែលត្រឹមត្រូវ និងទាន់ពេលវេលា ពិសេសទៀតនោះ ត្រូវធ្វើការសម្អាត និងមានអនាម័យខ្លួនប្រាណជានិច្ច។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ​ លេខ៨៥ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក
  • Dec 19, 2019 |
  • 4 ឆ្នាំមុន |
  • 3K មើល

ប្រូប៊ីយ៉ូទិច៖ បាក់តេរីល្អដែលចាំបាច់សម្រាប់រាងកាយ

បាក់តេរីមិនសុទ្ធតែអាក្រក់ចំពោះរាងកាយនោះទេ ព្រោះថារាងកាយមនុស្សយើងត្រូវការវត្តមានទាំងបាក់តេរីអាក្រក់ និងល្អសម្រាប់តុល្យភាពនៃដំណើរការណាមួយជាពិសេសប្រព័ន្ធរំលាយអាហារ។ ជាក់ស្ដែងប្រភេទបាក់តេរីដែលល្អទាំងនោះមាឈ្មោះថា ប្រូប៊ីយ៉ូទិច ដែលកំពុងត្រូវបានប្រើប្រាស់ក្នុងស្ថានភាពជាច្រើនក្រោមទម្រង់ជាឱសថ ឬនៅក្នុងផលិតផលអាហារដូចជាយាអ៊ួជាដើម។ ប្រភេទប្រូប៊ីយ៉ូទិច មានបាក់តេរីមួយចំនួនដែលត្រូវបានគេកំណត់ថាជាពពួកប្រូប៊ីយ៉ូទិច ហើយមានមុខងារដោយឡែកទៅតាមប្រភេទនីមួយៗក្នុងនោះរួមមាន៖  • Lactobacillus៖ ជាប្រភេទប្រូប៊ីយ៉ូទិចសាមញ្ញដែលសម្បូរនៅក្នុងយាអ៊ួ និងអាហារផ្អាប់ផ្សេងទៀត។ ភាគច្រើនវាត្រូវបានប្រើប្រាស់សម្រាប់អាការៈរាក ថែមទាំងជំនួយដល់ការបំបែកឡាក់តូស និងស្ករនៅក្នុងទឹកដោះគោ។  • Bifidobacterium៖ អាចរកបាននៅក្នុងផលិតផលប្រចាំថ្ងៃ ដែលវាអាចជួយសម្រួលរោគសញ្ញានៃជំងឺផ្នែកប្រព័ន្ធរំលាយអាហារ (Irritable Bowel Syndrome)។  • Saccharomyces Boulardii៖ ជាប្រូប៊ីយ៉ូទិចប្រភេទផ្សិត ដែលអាចប្រឆាំងនឹងជំងឺរាក និងបញ្ហាទូទៅនៃមុខងាររំលាយអាហារ។ សកម្មភាពឱសថ ប្រសិទ្ធភាពរបស់ប្រូប៊ីយ៉ូទិចត្រូវបានប្រើប្រាស់សម្រាប់ការពារពីស្ថានភាព ២យ៉ាងរួមមាន៖ ១. ទៅលើដំណើរការរបស់ប្រព័ន្ធរំលាយអាហារ៖ ជាទូទៅប្រព័ន្ធរំលាយអាហារត្រូវមានតុល្យភាពរវាងបាក់តេរីល្អ និងអាក្រក់។នៅក្នុងករណីបាក់តេរីអាក្រក់មានច្រើនលើសលុប នោះអាចធ្វើឲ្យមុខងាររបស់ប្រព័ន្ធរំលាយអាហារមិនអាចធ្វើការសម្អាតបាក់តេរី និងជាតិពុលអាក្រក់ចេញបានអស់នោះនាំឲ្យលេចឡើងនូវអាការៈរំខាននានា។ ដូច្នេះគេអាចប្រើប្រាស់ប្រូប៊ីយ៉ូទិចសម្រាប់ព្យាបាលផលរំខានដូចជា ជំងឺរាក ឈឺ ឬហើមពោះ រលាកពោះវៀនធំ និងជំងឺឆ្លងបណ្តាលមកពី Helicobacter Pylori។ល។ ២. ទៅលើប្រព័ន្ធភាពស៊ាំ៖ នៅពេលប្រព័ន្ធភាពស៊ាំដែលជារបាំងមួយដ៏សំខាន់សម្រាប់ការពាររាងកាយត្រូវបានចុះខ្សោយ អាចឲ្យលេចចេញរោគសញ្ញាអាល្លែកហ្ស៊ី រលាកសន្លាក់ឆ្អឹង និងជំងឺឆ្លងនៅប្រព័ន្ធរំលាយអាហារ និងស្បែកផងដែរ។ បន្ថែមពីនោះ ការស្រាវជ្រាវក៏បានបង្ហាញពីប្រសិទ្ធភាពរបស់ប្រូប៊ីយ៉ូទិចទៅលើប្រព័ន្ធបន្តពូជ ជំងឺមាត់ធ្មេញ សួត ស្បែក និងការពារទៅលើជំងឺធាត់ និងទឹកនោមផ្អែមប្រភេទ១ និង២ទៀតផង។ កម្រិត និងការប្រើប្រាស់ ជាទូទៅ ការប្រើប្រាស់ និងកម្រិតរបស់ឱសថប្រូប៊ីយ៉ូទិច គឺត្រូវបែងចែកជា២៖  កុមារ៖  • ចំពោះកុមារក្រោមអាយុ ៣ឆ្នាំដែលមានបញ្ហារាក ប្រសិនបើចង់ប្រើប្រាស់ត្រូវទៅពិគ្រោះ និងមកពិនិត្យជាមួយគ្រូពេទ្យជំនាញសិន  • ចំពោះកុមារអាយុលើសពី ៣ឆ្នាំដែលមានបញ្ហារាក ប្រសិនបើប្រើប្រាស់ជាមួយឱសថប្រភេទគ្រាប់ អាចលេបម្តង ២គ្រាប់ (២ ទៅ៣ដងក្នុងមួយថ្ងៃ) និងឱសថជាម្សៅប្រើប្រាស់ម្តង ១កញ្ចប់៣ ទៅ៤ដងក្នុងមួយថ្ងៃ។  មនុស្សពេញវ័យ៖  • ចំពោះឱសថគ្រាប់អាចប្រើប្រាស់ម្តង ២គ្រាប់ (២ ទៅ៤ដងក្នុងមួយថ្ងៃ) និងឱសថជាម្សៅប្រើប្រាស់ម្តង ១កញ្ចប់ អាចប្រើបាន ៣ ទៅ៤ដងក្នុងមួយថ្ងៃ។ ផលរំខានឱសថ ប្រូប៊ីយ៉ូទិច អាចនឹងបង្កផលរំខាននានាដោយអ្នកអាចសង្កេតឃើញរួមមាន៖  • រាក  • ក្អក  • អស់កម្លាំង  • ឈឺក្បាល  • រមួលក្រពើ  • ហើមពោះ  • ហើមមុខ និងបបូរមាត់  • តឹងទ្រូង ឬចង្វាក់បេះដូងលោតញាប់  • ពិបាកដកដង្ហើម  • ប្រតិកម្មអាល្លែកហ្ស៊ី ស្តែងចេញជាកន្ទួលរមាស់នៅលើមុខ មាត់ អណ្តាត និងស្បែកជាដើម។ ដោយឡែក ប្រសិនបើអ្នកមានផលរំខានខាងលើកើតឡើង និងធ្ងន់ធ្ងរ អ្នកគួរប្រាប់ ឬជួបពិគ្រោះជាបន្ទាន់ជាមួយវេជ្ជបណ្ឌិតជំនាញ។ អន្តរកម្មឱសថ ឱសថ ប្រូប៊ីយ៉ូទិច អាចថយប្រសិទ្ធភាព និងធ្វើឲ្យប្រព័ន្ធភាពសុំារបស់អ្នកចុះខ្សោយកាលណាប្រើប្រាស់រួមគ្នាជាមួយឱសថផ្សេងៗទៀតដូចជា៖   •ឱសថស្ថិតក្នុងក្រុម Steroids ( prednisone,dexamethasone,​methylprednisolone)  • ពពួកថ្នាំមានវេជ្ជបញ្ជា ឬគ្មានវេជ្ជបញ្ជាពិសេសថ្នាំពពួក OTC  • ប្រតិកម្មទៅនឹងទឹកដោះគោ ឬផលិតផល lactose  • ពពួកវីតាមីន និងផលិតផលឱសថផ្សេងៗទៀត។ បម្រុងប្រយ័ត្ន ការប្រើប្រាស់ ប្រូប៊ីយ៉ូទិច ក៏ទាមទារនូវការប្រុងប្រយ័ត្នផងដែរក្នុងករណី៖  • អ្នកដែលធ្លាប់មានអាល្លែកហ្ស៊ីជាមួយឱសថផ្សេងៗ  • អ្នកដែលមានប្រព័ន្ធចុះខ្សោយ និងអ្នកមានបញ្ហា ពោះវៀនតូច សុទ្ធតែទាមទារការពិគ្រោះយោបល់ជាមួយវេជ្ជបណ្ឌិតជំនាញ ឬឱសថការីមុនសម្រេចចិត្តប្រើប្រាស់ឱសថនេះ  • ការប្រើប្រាស់ចំពោះទារក និងកុមារក្រោមអាយុ៣ឆ្នាំ ត្រូវទាមទារមានការពិគ្រោះជាមួយវេជ្ជបណ្ឌិតជាមុនសិន  • ការប្រើប្រាស់ចំពោះស្រ្តីមានផ្ទៃពោះ និងស្រ្តីបំបៅដោះកូនត្រូវប្រើក្នុងករណីចាំបាច់បំផុត និងស្ថិតក្រោមការអនុញ្ញាតរបស់វេជ្ជបណ្ឌិតតែប៉ុណ្ណោះ។ គួរបញ្ជាក់ថាផលិតផលប្រូប៊ីយ៉ូទិចដែលត្រូវបានប្រើប្រាស់ជាឱសថមាននៅក្រោមឈ្មោះដូចជា Nature’s Bounty, Bioflor® និង Enterogermina ជាដើម។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ​ លេខ ៨៦ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក
  • Dec 18, 2019 |
  • 4 ឆ្នាំមុន |
  • 1.5K មើល

តើប្រូតេអុីនបង្កើនសាច់ដុំអាចប្រើបានសម្រាប់អ្នកជំងឺថ្លើមឬទេ?

ការប្រើប្រាស់ថ្នាំប្រូតេអុីនសម្រាប់ឡើងសាច់ដុំមិនប្រាកដថាល្អ និងមានប្រសិទ្ធភាពទាំងអស់ទេ ប្រសិនបើអ្នកមានជំងឺពាក់ព័ន្ធនឹងថ្លើមព្រោះវាអាចនឹងបង្កឲ្យមានបញ្ហាធ្ងន់ធ្ងរដល់អ្នកដោយមិនដឹងខ្លួន។ ប្រសិនបើចង់ស្រាយចម្ងល់ពាក់ព័ន្ធនឹងបញ្ហានេះ សូមតាមដានជាមួយការបកស្រាយរបស់លោកវេជ្ជបណ្ឌិតទាំងអស់គ្នា។ សំណួរ៖ ខ្ញុំបាទមានអាយុ ២៨ឆ្នាំ។ ខ្ញុំចង់ធ្វើលំហាត់ប្រាណហើយប្រើថ្នាំដែលធ្វើឲ្យឡើងសាច់ដុំ ប៉ុន្តែខ្ញុំមានមេរោគថ្លើមប្រភេទបេ តើខ្ញុំអាចប្រើថ្នាំប្រភេទប្រូតេអុីនជួយឲ្យឡើងសាច់ដុំនេះបានទេ? ចម្លើយ៖ ចំពោះប្អូនប្រុសអាយុ២៨ឆ្នាំ ចង់ធ្វើលំហាត់ប្រាណ ហើយបានប្រើថ្នាំប្រូតេអុីនធ្វើឲ្យឡើងសាច់ដុំ  តែប្អូនមានមេរោគថ្លើមប្រភេទបេនោះ ប្អូនត្រូវប្រាកដថាថ្នាំប្រភេទប្រូតេអុីនធ្វើឲ្យឡើងសាច់ដុំនេះមានផ្ទុកនូវជាតិអ័រម៉ូនអង់ដ្រូហ្សែនដែរឬទេ ប្រសិនបើមានពពួកអ័រម៉ូននេះ កាលណាប្អូនមានផ្ទុកមេរោគថ្លើមប្រភេទបេ វាអាចប្រឈមនឹងការកើតជំងឺមហារីកថ្លើមបានយ៉ាងលឿនជាងមុន។ ដូច្នោះ ដើម្បីទទួលបានការប្រើប្រាស់ដែលមានសុវត្ថិភាពនោះ អ្នកជំងឺត្រូវទៅជួបពិគ្រោះ ឬពិភាក្សាជាមួយគ្រូពេទ្យជំនាញថ្លើម ក្រពះ ពោះវៀនជាមុនសិន។ លើសពីនេះអ្នកជំងឺត្រូវធ្វើការហាត់ប្រាណ  ផឹកទឹកឲ្យបានច្រើន និងញុំាបន្លែផ្លែឈើបន្ថែម។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ​ លេខ ៨៦ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក
  • Dec 17, 2019 |
  • 4 ឆ្នាំមុន |
  • 2.1K មើល

មូលហេតុសំខាន់ៗដែលគួរឲ្យកុមារជិះកង់ពេលទំនេរ

ជាទូទៅយើងបានដឹងហើយថាការជិះកង់ជាលំហាត់ប្រាណដ៏ល្អ និងជាការកម្សាន្តសម្រាប់រាងកាយក៏ដូចជា ផ្លូវចិត្តផងដែរ ប៉ុន្តែក្រៅពីនេះការជិះកង់ក៏ផ្តល់នូវអត្ថប្រយោជន៍ដទៃទៀត ដែលជាហេតុផលឪពុកម្តាយគួរបង្រៀនកុមារឲ្យចាប់ផ្តើមរៀនជិះកង់នៅពេលទំនេរ។ ផ្តល់សកម្មភាពកម្សាន្តងាយៗ ការជិះកង់ជាប្រភេទនៃការកម្សាន្តមួយបែបអាចចាត់ទុកថាមានលក្ខណៈងាយស្រួល មិនស្មុគស្មាញ និងមិនមែនជាប្រភេទល្បែងកម្សាន្តបែបផ្សងព្រេងគ្រោះថ្នាក់ឡើយ។ កុមារអាចចំណាយពេលវេលារបស់ពួកគេជិះកង់នៅផ្ទះ សួនសាធារណៈ ឬនៅទីកន្លែងសុវត្ថិភាពផ្សេងៗជាមួយក្រុមគ្រួសារ និងមិត្តភក្តិរបស់គេដោយពុំមានការព្រួយបារម្ភច្រើន។ ការប្រើប្រាស់កង់ជាឧបករណ៍កម្សាន្តដែលមានបំពាក់ឧបករណ៍ការពារត្រឹមត្រូវនឹងមិនបង្កឲ្យប្រឈមនឹងគ្រោះថ្នាក់ធ្ងន់ធ្ងរឡើយ ប៉ុន្តែវាបែរជាផ្តល់នូវជំនាញមួយប្រភេទ ក៏ដូចជាបង្កើតចំណង់ចំណូលចិត្តសម្រាប់កូនៗ។ នៅពេលនោះកូនៗលោកអ្នកនឹងមានអារម្មណ៍ថាមានសេរីភាព ឯករាជ្យភាព ចាប់ផ្តើមមានទំនុកចិត្តលើសមត្ថភាពខ្លួនឯង។ អភិវឌ្ឍន៍ផ្នែករូបរាងកាយ ជាទូទៅកុមារគួរតែមានសកម្មភាពធ្វើលំហាត់ប្រាណរាងកាយឲ្យបានទៀងទាត់ យ៉ាងហោចណាស់ ១ម៉ោងក្នុងមួយថ្ងៃដើម្បីទទួលបានសុខភាពល្អ។ មិនតែប៉ុណ្ណោះ លំហាត់ប្រាណតាមរយៈការជិះកង់អាចជួយដល់ការលូតលាស់ឆ្អឹង សន្លាក់ និងធ្វើឲ្យប្រព័ន្ធភាពស៊ាំនៃរាងកាយដំណើរការបានល្អក៏ដូចជាសម្រួលប្រព័ន្ធរបត់ឈាម ប្រព័ន្ធដង្ហើម បេះដូង និងសាច់ដុំរបស់កុមារដែលកំពុងស្ថិតក្នុងវ័យលូតលាស់។ លោកអ្នកគួរលើកទឹកចិត្តពួកគេតាមរយៈការណែនាំ និងបង្រៀនជិះកង់ចាប់តាំងពីវ័យកុមារទៅ ដើម្បីធានាដល់ការលូតលាស់រូបរាងកាយបានល្អ។ អភិវឌ្ឍន៍ផ្នែកបញ្ញាស្មារតី ការជិះកង់មិនត្រឹមតែជួយដល់សុខភាពរាងកាយប៉ុណ្ណោះទេ ថែមទាំងផ្តល់នូវអត្ថប្រយោជន៍ដល់ការអភិវឌ្ឍផ្នែកខួរក្បាល និងបញ្ញាស្មារតីទៀតផង។ យោងតាមលទ្ធផលនៃការស្រាវជ្រាវរបស់ប្រទេសដាណឺម៉ាកក្នុងឆ្នាំ ២០១២ តាមរយៈការពិសោធន៍លើកុមារចំនួន ២០.០០០ នាក់ មានអាយុចន្លោះពី ៥ឆ្នាំ ដល់១៩ឆ្នាំបានបង្ហាញថាកុមារដែលជិះកង់ទៅរៀនមានអត្រានៃការផ្ចង់អារម្មណ៍ខ្ពស់ ហើយបំពេញកិច្ចការបានល្អបើប្រៀបធៀបនឹងកុមារដែលមិនបានធ្វើដំណើរទៅសាលារៀនដោយខ្លួនឯង។ មិនតែប៉ុណ្ណោះ វាថែមទាំងជាឱកាសល្អសម្រាប់ពួកគេអាចស្វែងយល់ និងចាប់ផ្តើមសម្របខ្លួនជាមួយសង្គមមជ្ឈដ្ឋានខាងក្រៅ និងបង្កើតទំនាក់ទំនងជាមួយអ្នកនៅជុំវិញខ្លួន។ ផលប្រយោជន៍សម្រាប់បរិស្ថាន និងសង្គម ការជិះកង់បានចូលរួមចំណែកយ៉ាងខ្លាំងក្នុងការការពារបរិស្ថាន ដោយសារវាបានកាត់បន្ថយនូវការបញ្ចេញឧស្ម័នពុលពីយានយន្ត។ ការកាត់បន្ថយការបំពុលបរិស្ថានមានន័យថាធ្វើឲ្យសហគមន៍និងទីកន្លែងរស់នៅប្រកបដោយផាសុកភាពដល់មនុស្សគ្រប់រូប រួមទាំងគ្រួសារនិងកូនៗរបស់លោកអ្នកផងដែរ។ លើសពីនេះទៅទៀត វាបានចូលរួមចំណែកកាត់បន្ថយការចំណាយលើប្រេងឥន្ទនៈ  បញ្ហាចរាចរណ៍ បញ្ហាចំណត ជាដើម។ ជាក់ស្ដែងសកម្មភាពជិះកង់របស់កុមារមានចំណុចវិជ្ជមានជាច្រើន ដែលមិនត្រឹមតែផ្តល់ជាការកម្សាន្ត តែថែមទាំងផ្តល់នូវអត្ថប្រយោជន៍ដ៏មានសារសំខាន់សម្រាប់ការលូតលាស់របស់កុមារ។ ឪពុកម្តាយគួរតែលើកទឹកចិត្តបង្រៀនកូនឲ្យជិះកង់នៅពេលទំនេរដោយលោកអ្នកអាចចាប់ផ្តើមរៀបចំបរិយាកាសទីតាំងអំណោយផលដែលផ្តល់សុវត្ថិភាពសម្រាប់កូនៗ ដូចជាណែនាំពួកគេឲ្យប្រើប្រាស់សម្លៀកបំពាក់សម្រាប់ជិះកង់ មួកសុវត្ថិភាពឧបករណ៍ការពារដៃ ជើង និងជង្គង់ជាដើម ដើម្បីការពារពីគ្រោះថ្នាក់នានាជាយថាហេតុ។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ​ លេខ ៨៦ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក
  • Dec 16, 2019 |
  • 4 ឆ្នាំមុន |
  • 2.5K មើល

អ្វីខ្លះនៅពីក្រោយការប្រែប្រួលអារម្មណ៍របស់ស្រ្តីនៅថ្ងៃមករដូវ?

ធ្លាប់ចាប់អារម្មណ៍ទេថាខ្លួនឯងដូចជាមានអារម្មណ៍មួម៉ៅ និងប្រែប្រួលរហ័ស នៅមុនពេល និងអំឡុងពេលមករដូវម្ដងៗ ដែលមិត្តនារីសឹងតែទាំងអស់មិនអាចចៀសផុតពីបញ្ហានោះឡើយ។ យ៉ាងណាមិញ តើអ្នកធ្លាប់បានដឹងអំពីមូលហេតុនៅពីក្រោយបម្រែបម្រួលនេះទេ? ហើយជាទូទៅ អ្នកនឹងធ្វើបែបណាចំពោះបញ្ហានេះ? ដើម្បីជាគន្លឹះខ្លះៗដល់មិត្តអ្នកអាន ជាពិសេសសុភាពនារី ហេលស៍ថាម  ប្រូ នឹងបង្ហាញជូនលោកអ្នកនូវចំណុចសំខាន់ទាក់ទិននឹងបញ្ហានេះតាមរយៈសំណួរ-ចម្លើយខ្លីៗខាងក្រោមនេះ។ តើបម្រែបម្រួលអារម្មណ៍ដោយសារវដ្ដរដូវសំដៅលើអ្វី? វាសំដៅលើការប្រែប្រួលរហ័សនៃអារម្មណ៍របស់ស្រ្តីនៅមុន និងក្នុងអំឡុងពេលមករដូវរបស់ខ្លួន។ វាជាការផ្លាស់ប្តូរភ្លាមៗក្នុងពេលមួយដ៏ខ្លី ដែលពេលខ្លះវាកើតមានឡើងទោះបីមិនមានរឿងអ្វីកើតឡើងដែលប៉ះទង្គិចដល់ផ្លូវចិត្ត ឬអារម្មណ៍ក៏ដោយ។ ជាក់ស្តែងស្រ្តីម្នាក់អាចនឹងភ្ញាក់ពីដំណេកដោយអារម្មណ៍ស្រស់ស្រាយ តែក៏ប្រែជាពិបាកចិត្តដោយមិនដឹងរឿងរយៈពេល១ ឬ២ម៉ោងក្រោយ។ តើបម្រែបម្រួលអារម្មណ៍ទាំងនោះរួមមានអ្វីខ្លះ? អាការៈទូទៅរួមមានដូចជា មានអារម្មណ៍ថាតឹងណែនទ្រូង អារម្មណ៍មិនឹងនរ ចេះតែគិតគ្រប់យ៉ាងគួរឲ្យរំខាន ថប់បារម្ភ ធ្លាក់ទឹកចិត្ត ហេវហត់អស់កម្លាំងមិនអាចគ្រប់គ្រងអារម្មណ៍ខ្លួនឯងបាន។ល។  តើអ្វីជាមូលហេតុធ្វើឲ្យស្ត្រីមានបម្រែបម្រួលអារម្មណ៍បែបនេះ? គេមិនទាន់ច្បាស់អំពីមូលហេតុពិតប្រាកដនៅឡើយទេ ប៉ុន្តែគេគិតថាវាពាក់ព័ន្ធទៅនឹងបម្រែបម្រួលអ័រម៉ូននៅក្នុងរាងកាយរបស់ស្ត្រី។ ពេលដែលអ័រម៉ូនអឺស្ត្រូហ្សែន និងប្រូតេស្តេរ៉ូនមានការថយចុះនោះអ័រម៉ូនសេរ៉ូតូនីន (អ័រម៉ូនដែលពាក់ព័ន្ធនឹងអារម្មណ៍ ការគេង និងចំណង់អាហារ) ក៏ទទួលរងឥទ្ធិពលដែរ ហើយវាជាហេតុបណ្តាលឲ្យស្ថានភាពអារម្មណ៍មានការប្រែប្រួល ដែលភាគច្រើនជាអារម្មណ៍អវិជ្ជមាន។ តើស្ត្រីគួរធ្វើបែបណាខ្លះចំពោះការប្រែប្រួលនេះ? ញ៉ាំអាហារដែលល្អចំពោះសុខភាព៖ ញ៉ាំអាហារដែលមានជាតិស្ករទាប មានជាតិម៉ាញេស្យូម វីតាមីនB-6(ត្រី សាច់ ផ្លែឈើ…) និងកាល់ស្យូម(ទឹកដោះគោ បន្លែបៃតង…) នឹងជួយកាត់បន្ថយបម្រែបម្រួលបានច្រើនក្នុងអំឡុងពេលមករដូវរបស់អ្នក។ ចៀសវាងជាតិកាហ្វេអុីននិងគ្រឿងស្រវឹង៖ វាអាចបន្ថែមអារម្មណ៍អវិជ្ជមានដូចជាបញ្ហាថប់បារម្ភ អារម្មណ៍ច្របូកច្របល់ ការគេងមិនលក់។ល។ បន្តធ្វើលំហាត់ប្រាណ៖ លំហាត់ប្រាណដែលល្អចំពោះវដ្ដរដូវ មិនត្រឹមតែជួយដល់សុខភាពរាងកាយទេ វាថែមទាំងជួយបង្កើននូវអង់ដូហ្វីនដែលជួយសម្រួលដល់ដំណេក និងអារម្មណ៍ឲ្យរីករាយផងដែរ។ គេងឲ្យបានគ្រប់គ្រាន់៖ ពេលវេលាសម្រាកស្កប់ស្កល់នៃរាងកាយ អាចជួយទប់ស្កាត់ផលប៉ះពាល់នៃបម្រែបម្រួលអ័រម៉ូនមកលើស្ថានភាពផ្លូវអារម្មណ៍របស់អ្នកបានមួយកម្រិតដែរ។ ផ្តល់ពេលវេលាឲ្យខ្លួនឯង៖ សកម្មភាពដូចជា ការដើរលំហែនៅខាងក្រៅ ការធ្វើលំហាត់ប្រាណរាល់ថ្ងៃសុទ្ធតែអាចជួយបន្ថយកម្រិតសេរ៉ូតូនីន ហើយអារម្មណ៍អ្នកក៏ល្អទៅតាមហ្នឹងដែរ។ នៅឲ្យឆ្ងាយពីមនុស្ស និងស្ថានភាពដែលជាដើមហេតុនៃស្ត្រេស៖ ក្នុងអំឡុងពេលនេះ អ្នកគួរចៀសវាងស្ថានភាពដែលត្រូវការគិតច្រើន ឬផ្តល់សម្ពាធដល់ខ្លួន ហើយធ្វើសកម្មភាពលក្ខណៈលំហែឲ្យបានច្រើនដូចជាការមើលកុនជាមួយមិត្តភក្តិ ការជួបជុំគ្រួសារ ការដើរកម្សាន្ត។ល។ តើអ្វីជាសញ្ញាគួរបារម្ភ ហើយគួរទៅជួបប្រឹក្សាជាមួយវេជ្ជបណ្ឌិត? ក្នុងករណីដែលបម្រែបម្រួលខុសប្រក្រតី ហើយវាកើតមានក្នុងរយៈពេលយូរទោះបីថ្ងៃមករដូវរបស់អ្នកបានបញ្ចប់ក៏ដោយ អ្នកគួរតែជួបប្រឹក្សាជាមួយវេជ្ជបណ្ឌិតអំពីអាការៈរបស់អ្នក ដើម្បីស្វែងរកជំនួយក៏ដូចជាមូលហេតុច្បាស់លាស់ និងដំណោះស្រាយដែលត្រឹមត្រូវ។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ​ លេខ ៨៦ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក
  • Dec 13, 2019 |
  • 4 ឆ្នាំមុន |
  • 4K មើល

ស្វែងយល់ពីមូលហេតុជាច្រើននៃជំងឺសើស្បែក Impetigo

បើយោងតាមស្ថិតិរបស់ជំងឺ Impetigo មានបម្រែបម្រួលប្រហែល ៥%នៃអ្នកជំងឺសើស្បែកទាំងអស់ដែលមកទទួលសេវាព្យាបាល។ ក្នុងករណីនេះភាគច្រើនតែងកើតឡើងចំពោះកុមារមានអាយុពី ២ ទៅ៥ឆ្នាំ និងកុមារក្នុងវ័យសិក្សាដែលមានអាយុពី ៧ ទៅ១០ឆ្នាំផងដែរ។ និយមន័យ ជំងឺ Impetigo គឺជាជំងឺសើស្បែកមួយប្រភេទដែលអាចឆ្លងពីមនុស្សម្នាក់ទៅមនុស្សម្នាក់ ហើយបុគ្គលដែលកើតជំងឺនេះអាចរីករាលដាលទៅកន្លែងស្បែកផ្សេងទៀតដោយចាប់ផ្តើមពីចំណុចតូចទៅធំ និងស៊ីជ្រៅចូលទៅក្នុងស្បែក។ ជាទូទៅជំងឺនេះតែងតែកើតមានឡើងនៅតាមទីតាំងសើលើៗនៃស្បែកដូចជា លើច្រមុះ មាត់ ភ្លៅ ចង្កេះ និងគូទជាដើម។ ជំងឺនេះបណ្តាលមកពីពពួកបាក់តេរីម៉្យាងឈ្មោះ Staphylococcus aureus។ មូលហេតុចម្បង និងកត្តាប្រឈម មានមូលហេតុចម្បង និងកត្តាសំខាន់ដែលជំរុញឲ្យកើតជំងឺនេះឡើងរួមមាន៖  • ការដាច់រហែកស្បែកដែលងាយឲ្យមេរោគឆ្លងចូល  • ការមុតវត្ថុស្រួចៗ  • ការប្រើប្រាស់កម្រាលពូក ខ្នើយ និងកន្សែងរួមគ្នា  • សត្វល្អិត ឬមូសខាំដែលធ្វើឲ្យមេរោគបាក់តេរីងាយជ្រៀតចូល  • ការរស់នៅប្រចាំថ្ងៃខ្វះអនាម័យ។ ចំណែកបុគ្គលដែលមានហានិភ័យខ្ពស់ក្នុងការប្រឈមចំពោះជំងឺនេះរួមមាន៖  • អ្នកកើតជំងឺតាអក និងអ្នកជំងឺសើស្បែកផ្សេងៗទៀត  • បុគ្គលដែលមានប្រព័ន្ធភាពសុំាចុះខ្សោយ  • អ្នកជំងឺអេដស៍  • អ្នកជំងឺទឹកនោមផ្អែម  • បុគ្គលដែលលាងឈាម និងមានបញ្ហាប្រព័ន្ធតម្រងនោមចុះខ្សោយជាដើម។ រោគសញ្ញា ជាទូទៅ ជំងឺនេះស្តែងចេញជារោគសញ្ញាដូចជា ក្រមរពណ៌លឿង ឬពណ៌មាសមានទឹករងៃសើមៗ រមាស់បន្តិចបន្តួច គ្មានការឈឺចាប់ និងក្តៅខ្លួននោះទេនៅដំណាក់កាលដំបូង។ ការធ្វើរោគវិនិច្ឆ័យ រោគសញ្ញារបស់ជំងឺនេះងាយនឹងឲ្យគ្រូពេទ្យសើស្បែកធ្វើរោគវិនិច្ឆ័យដោយភ្នែកផ្ទាល់រហូតដល់ពី ៩០ ទៅ៩៥% ឯណោះ។ ម៉្យាងវិញទៀត យើងអាចធ្វើរោគវិនិច្ឆ័យបានតាមរយៈការយកទឹករងៃដែលមាននៅលើដំបៅយកទៅបណ្តុះមេរោគនៅមន្ទីរពិសោធន៍ស្វែងរកភាពសុំារបស់មេរោគទៅនឹង អង់ទីប៊ីយោទិចដើម្បីកំណត់ការព្យាបាល។ វិធីសាស្រ្តព្យាបាល ប្រសិនបើអ្នកជំងឺត្រូវបានរកឃើញថាមានជំងឺ Impetigo នោះការព្យាបាលនឹងធ្វើឡើងតាមដំណាក់កាលរបស់ជំងឺ និងតាមវិធីសាស្រ្តផ្សេង២ដូចជា៖  • ប្រសិនបើជំងឺនេះស្ថិតនៅដំណាក់កាលដំបូងគឺគ្រូពេទ្យគ្រាន់តែធ្វើការព្យាបាលដោយការប្រើប្រាស់ថ្នាំសម្រាប់លាប ដូចជាពពួកអង់ទីប៊ីយោទិចប្រភេទក្រែមប៉ុណ្ណោះ។  • ប៉ុន្តែក្នុងករណីដែលជំងឺនេះរីករាលដាលទៅកន្លែងផ្សេង និងស៊ីកាន់តែជ្រៅនោះ គ្រូពេទ្យធ្វើការព្យាបាលដោយការប្រើប្រាស់ថ្នាំគ្រាប់ បូករួមជាមួយការប្រើប្រាស់ក្រែម សម្រាប់លាបដូចជា Mupirocin និង Fusidic acid ជាដើម។ លើសពីនេះ ត្រូវធ្វើការណែនាំឲ្យអ្នកជំងឺធ្វើអនាម័យលាងសម្អាតដៃ ដើម្បីការពារកុំឲ្យមេរោគឆ្លងទៅកន្លែងផ្សេងទៀត ពិសេសឆ្លងទៅអ្នកដទៃ។ ជាទូទៅ ការព្យាបាលជំងឺសើស្បែកនេះ គឺរយៈពេល៧ ទៅ១០ថ្ងៃនឹងអាចជាសះស្បើយ។ ដោយឡែក ជំងឺនេះមិនអាចបង្កឲ្យកើតមានជំងឺសើស្បែកផ្សេងៗទៀតនោះទេ ប៉ុន្តែវាអាចធ្វើឲ្យជំងឺនេះវិវឌ្ឍទៅជាធ្ងន់ធ្ងរ ប្រសិនបើការព្យាបាលមិនទាន់ពេលវេលា និងមិនបានត្រឹមត្រូវនោះ។ វិធីសាស្រ្តការពារ ដោយហេតុថានាពេលបច្ចុប្បន្ន បញ្ហានេះកើតមានច្រើន ដូច្នោះអ្នកគួរតែការពារខ្លួនពីជំងឺនេះដោយ៖  • ប្រកាន់ខ្ជាប់នូវអនាម័យខ្លួនប្រាណ  • ចំពោះកុមារ អាណាព្យាបាលត្រូវកាត់ក្រចកឲ្យបានខ្លី  • ប្រសិនបើមានជំងឺសើស្បែកមិនថាតិច ឬច្រើនត្រូវទៅព្យាបាលឲ្យបានត្រឹមត្រូវ និងទាន់ពេល។ ប្រសិនបើអ្នកមានបញ្ហា ឬរោគសញ្ញាដូចដែលបានរៀបរាប់ខាងលើ សូមប្រញាប់ទៅពិគ្រោះជាមួយគ្រូពេទ្យឯកទេសសើស្បែក ដើម្បីទទួលបានការពិនិត្យ និងធ្វើរោគវិនិច្ឆ័យឲ្យបានច្បាស់លាស់ ព្រមទាំងទទួលបានការព្យាបាលឲ្យបានត្រឹមត្រូវ ទាន់ពេលវេលានោះ លោកអ្នកនឹងឆាប់ជាសះស្បើយ និងចំណាយថវិកាតិច។ បកស្រាយដោយ៖ វេជ្ជបណ្ឌិត ឡា ភៀវ ឯកទេសជំងឺសើស្បែក និងកាមរោគ និងជាប្រធានផ្នែកជំងឺសើស្បែក និងកាមរោគនៃមន្ទីរពេទ្យព្រះអង្គឌួង  អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ​ លេខ ៨៥ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក
  • Dec 13, 2019 |
  • 4 ឆ្នាំមុន |
  • 2.4K មើល

ប្រទេសម៉ាឡេស៊ី បន្តពង្រីកទីផ្សារនៅកម្ពុជាតាមរយៈ ការចុះអនុស្សារណៈនៃការយោគយល់ជាមួយធនាគារកាណាឌីយ៉ា

រាជធានីភ្នំពេញថ្ងៃទី១២ ខែធ្នូ ឆ្នាំ២០១៩៖ វិស័យសុខាភិបាលម៉ាឡេស៊ីកំពុងធ្វើយុទ្ធនាការផ្សព្វផ្សាយកម្មវិធីទេសចរណ៍សុខាភិបាលឆ្នាំ២០២០ (MyHT2020) ដល់ប្រជាជនកម្ពុជា។ ក្រុមប្រឹក្សាទេសចរណ៍សុខាភិបាលម៉ាឡេស៊ី (MHTC) ជាទីភ្នាក់ងារស្ថិតក្រោមបទប្បញ្ញត្តិនៃក្រសួងហិរញ្ញវត្ថុម៉ាឡេស៊ី ដែលមានភារកិច្ចក្នុងការជួយសម្របសម្រួល និងលើកកម្ពស់វិស័យទេសចរណ៍សុខាភិបាលនៅក្នុងប្រទេសម៉ាឡេស៊ីបានចុះហត្ថលេខាលើអនុស្សារណៈនៃការយោគយល់(MoU) ជាមួយនឹងធនាគារកាណាឌីយ៉ា នៅសណ្ឋាគាររ៉ូសវូដ រាជធានីភ្នំពេញ។ តាមរយៈ អនុស្សារណៈនៃការយោគយល់នេះអតិថិជនរបស់ធនាគារកាណាឌីយ៉ានឹងទទួលបាននូវកញ្ចប់ទេសចរណ៍សុខាភិបាលដ៏គួរឲ្យទាក់ទាញដើម្បីដើរទស្សនាប្រទេសម៉ាឡេស៊ីដែលជាអ្នកជំនាញថែទាំសុខភាពលំដាប់ពិភពលោកប្រចាំឆ្នាំ២០២០។  ដោយឡែក ប្រទេសម៉ាឡេស៊ីគឺជា “អ្នកជំនាញថែទាំសុខភាព” ដែលក្លាយជាទិសដៅទេសចរណ៍សុខាភិបាលលំដាប់ពិភពលោកដ៏ជោគជ័យនៅក្នុងរយៈពេលដ៏ខ្លី និងត្រូវបានទទួលស្គាល់ដោយអ្នកជំងឺ និងជំនាញការក្នុងវិស័យនេះចំនួន ១.២ លាននាក់នៅទូទាំងពិភពលោក។ប្រទេសនេះត្រូវបានទទួលស្គាល់ជាលក្ខណៈអន្តរជាតិដោយអង្គការ International Living សហរដ្ឋអាមេរិកជា “ប្រទេសដ៏ល្អបំផុតនៅក្នុងពិភពលោកសម្រាប់វិស័យសុខាភិបាល” ចាប់ពីឆ្នាំ២០១៥ ដល់ឆ្នាំ២០១៩ និងជា “ទិសដៅប្រចាំឆ្នាំ” សម្រាប់ទេសចរណ៍សុខាភិបាលទទួលស្គាល់ដោយក្រុមហ៊ុន InternationalMedical Travel Journal ចក្រភពអង់គ្លេស ចាប់ពីឆ្នាំ២០១៥ ដល់ឆ្នាំ២០១៧ ដោយផ្អែកទៅលើលក្ខណៈវិនិច្ឆ័យទាំងនេះ៖ គុណភាព ងាយស្រួលទទួលសេវាកម្ម និងតម្លៃសមរម្យ។ នាឱកាសនេះដែរ លោកស្រី Yazmin Azman ប្រធានផ្នែកពាណិជ្ជកម្មនៃក្រុមប្រឹក្សាទេសចរណ៍សុខាភិបាលម៉ាឡេស៊ី (MHTC) បានមានប្រសាសន៍ថា“យើងមានបំណងអញ្ជើញអ្នកធ្វើដំណើរស្វែងរកសេវាកម្មថែទាំសុខភាពទាំងអស់ឲ្យមកទទួលយនូវបទពិសោធន៍សេវាកម្មថែទាំសុខភាពចាប់តាំងពីដើមដល់ចប់ប្រកបដោយភាពរលូននៅតំបន់សុខុមាលភាពរបស់ប្រទេសម៉ាឡេស៊ីព្រមទាំងអាចទស្សនាកម្សាន្តនៅទឹកដីធម្មជាតិដ៏បវរនាឱកាសកម្មវិធី MyHT2020 នេះ។ សេវាកម្មថែទាំសុខភាពមានគុណភាពខ្ពស់លំដាប់ពិភពលោក តម្លៃសមរម្យនិងមានភាពងាយស្រួលរបស់យើងគឺជាគុណតម្លៃដ៏ល្អទាក់ទាញធានាដល់អ្នកធ្វើដំណើរស្វែងរកសេវាកម្មថែទាំសុខភាពដែលបានមករកសេវាកម្មនេះនៅក្នុងប្រទេសរបស់យើង។  MHTC បានកំណត់យកធនាគារកាណាឌីយ៉ាធ្វើជាដៃគូដែលមានគុណតម្លៃផ្នែកទំនុកចិត្តនិងភាពល្អឥតខ្ចោះផ្នែកសេវាកម្មអតិថិជនដូចគ្នាក្នុងការលើកកម្ពស់ MyHT2020 នាពេលខាងមុខនេះ។ ធនាគារកាណាឌីយ៉ា គឺជាធនាគារក្នុងស្រុកដ៏ធំជាងគេមួយនៅក្នុងប្រទេសកម្ពុជា ដោយមានសាខាចំនួន ៦០សាខា នៅទូទាំងប្រទេសកម្ពុជា មានទីស្នាក់ការស្ថិតនៅក្នុងរាជធានីភ្នំពេញ ដែលជាទីក្រុសំខាន់មួយ និងមានសាខានានានៅគ្រប់បណ្ដាខេត្តទាំងអស់។ ជាផ្នែកមួយនៃយុទ្ធសាស្ត្ររបស់ធនាគារក្នុងការបម្រើសេវាកម្មជូនអតិថិជនដែលមានកំណើនយ៉ាងឆាប់រហ័សឲ្យបានកាន់តែល្អប្រសើរធនាគារកាណាឌីយ៉ាផ្ដល់ជូននូវសេវាកម្មមានគុណតម្លៃបន្ថែម និងកម្មវិធីជាច្រើនទៀត។   លោក Raymond Sia Say Guan អគ្គនាយកនៃធនាគារកាណាឌីយ៉ាបានមានប្រសាសន៍ថា“ធនាគារកាណាឌីយ៉ាពិតជាមានក្ដីសោមនស្សរីករាយយ៉ាងក្រៃលែងក្នុងការធ្វើជាដៃគូជាមួយនឹងវិស័យសុខាភិបាលម៉ាឡេស៊ីដើម្បីផ្ដល់ជូនអតិថិជនរបស់យើងនូវកញ្ចប់សេវាកម្មទេសចរណ៍សុខាភិបាលប្រកបដោយគុណភាពខ្ពស់ តាមរយៈការប្ដេជ្ញាចិត្តចំពោះជំហរហិរញ្ញវត្ថុរឹងមាំរបស់អតិថិជនយើងក៏មានចំណាប់អារម្មណ៍ចំពោះការផ្ដល់ជូនអតិថិជនរបស់យើងនូវសេវាកម្មថែទាំសុខភាពគុណភាពខ្ពស់នៃវិស័យសុខាភិបាលម៉ាឡេស៊ី”។ ប្រទេសម៉ាឡេស៊ីគឺមានភាពលក្ខណៈខុសប្លែកពីប្រទេសផ្សេងទៀតដោយសារតែដំណើរការផ្ដល់ជូនសេវាកម្មថែទាំសុខភាពម៉ាឡេស៊ីតាំងពីដើមរហូតដល់ប្រកបដោយភាពរលូន ពោលគឺចាប់តាំងពីពេលដែលអតិថិជនមកដល់ប្រទេសម៉ាឡេស៊ីរហូតដល់ពេលត្រឡប់ទៅវិញតែម្ដង។ បន្ទប់រង់ចាំសេវាកម្មសុខាភិបាលម៉ាឡេស៊ី មានទីតាំងស្ថិតនៅព្រលានយន្តហោះអន្តរជាតិកូឡាឡាំពួរ (KLIA) KLIA2 និងព្រលានយន្តហោះអន្តរជាតិប៉េណាំងសេវាកម្មទទួលដល់ច្រកចុះពីយន្តហោះ សេវាកម្មត្រួតពិនិត្យរហ័សនៅផ្នែកអន្តោប្រវេសន៍ និងគយ ព្រមទាំងមានសេវាកម្មជួយយកឥវ៉ាន់ផងដែរ។ សេវាកម្មបកប្រែគឺមានផ្ដល់ជូនតាមការស្នើសុំជាមុនដើម្បីសម្រួលដល់ ការប្រាស្រ័យទាក់ទងយ៉ាងងាយស្រួលជូនអ្នកជំងឺដែលត្រូវការសេវាកម្មបកប្រែ។ គួរបញ្ជាក់ផងដែរថា ប្រព័ន្ធសុខាភិបាលប្រទេសម៉ាឡេស៊ីគឺត្រូវបានធ្វើនិយ័តកម្មយ៉ាងតឹងរ៉ឹងដោយក្រសួងសុខាភិបាលម៉ាឡេស៊ីយោងតាមច្បាប់ស្ដីពីសុខាភិបាលសាធារណៈ និងសេវាកម្មបរិក្ខារ (ឆ្នាំ1998) ដែលស្ដែងឲ្យឃើញនូវសុវត្ថិភាពរបស់អ្នកជំងឺ ហើយសេវាកម្មព្យាបាលគឺមានតម្លៃសមរម្យ។ ជាមួយនឹងប្រព័ន្ធសុខាភិបាលម៉ាឡេស៊ីដ៏ល្អឥតខ្ចោះអ្នកធ្វើដំណើរស្វែងរកសេវាកម្មថែទាំសុខភាពអាចទទួលបាននូវសេវាកម្មថែទាំសុខុមាលភាពនៅក្នុងទឹកដីធម្មជាតិស្រស់បំព្រងបង្កប់នូទេសភាពដ៏ស្រស់ត្រកាលនៃប្រទេសម៉ាឡេស៊ី។ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក
  • Dec 01, 2019 |
  • 4 ឆ្នាំមុន |
  • 4.5K មើល

បញ្ហាសុខភាព និងការថែទាំសម្រាប់អ្នកម្តាយក្រោយសម្រាល

ជាទូទៅ បន្ទាប់ពីសម្រាលបុត្ររួច រហូតដល់រយៈពេលប្រមាណជា ៦ទៅ៨ សប្តាហ៍ ជាពេលវេលាដែលអ្នកម្តាយក្រោយសម្រាលគួរត្រូវបានយកចិត្តទុកដាក់យ៉ាងខ្លាំងក្នុងការថែទាំសុខភាពរបស់ខ្លួនឡើងវិញដើម្បីចៀសវាងពីគ្រោះថ្នាក់ដល់អាយុជីវិតព្រមទាំងបញ្ហានានាដែលអាចជះឥទ្ធិពលចំពោះការពពោះលើកក្រោយថែមទៀត។ ដំណាក់កាលនៃសុខភាពស្រ្តីក្រោយសម្រាល បញ្ហាសុខភាពរបស់ស្រ្តីក្រោយសម្រាលគឺអាចកើតមានឡើងចាប់តាំងពីការសម្រាលរួចភ្លាម រហូតដល់សប្តាហ៍ទី៨ ឬអាចយូរជាងនេះ។ ក្នុងនោះដែរគេបានបែងចែកបញ្ហាសុខភាពនេះជា ៣ដំណាក់កាលសំខាន់ៗគឺ៖  • ដំណាក់កាល ទី១៖ បន្ទាប់ពីសម្រាលរួច រហូត២៤ម៉ោងក្រោយ  • ដំណាក់កាល ទី២៖ ២៤ម៉ោងក្រោយសម្រាលរហូតចេញពីមន្ទីរពេទ្យ ៥ទៅ៧ថ្ងៃ  • ដំណាក់កាល ទី៣៖ បន្ទាប់ចេញពីមន្ទីរពេទ្យរហូតដល់ ៦ ទៅ៨សប្តាហ៍។ ក្នុងចំណោមដំណាក់កាលខាងលើ យើងសម្រេចលើកយកដំណាក់កាលទី៣មកធ្វើការបកស្រាយ និង ពិភាក្សាពីព្រោះវាជាដំណាក់កាលដែលគួរតែធ្វើការយកចិត្តទុកដាក់ និងត្រូវទទួលបានការថែទាំឲ្យបានត្រឹមត្រូវ ដោយហេតុថាជាពេលវេលាដែលអ្នកម្តាយមិនស្ថិតក្រោមការមើលថែពីក្រុមគ្រូពេទ្យទៀតឡើយ។ ហេតុនេះ បញ្ហាសុខភាពជាច្រើនតែងកើតមានឡើងជាញឹកញាប់ ដែលអាចបង្កការប៉ះពាល់ទាំងសុខភាពផ្លូវកាយ និងផ្លូវចិត្ត។  បញ្ហាដែលអាចកើតមានចំពោះស្រ្តីក្រោយសម្រាល តាមរយៈទិន្នន័យកន្លងមកបានបង្ហាញថា មានបញ្ហាសុខភាពចំនួន ៥ប្រភេទដែលតែងតែជួបជាញឹកញាប់ដោយក្នុងនោះកត្តាប្រឈម និងដំណោះស្រាយក៏មានផ្សេងៗគ្នាផងដែរ ដែលបញ្ហាសុខភាពទាំងនោះ រួមមាន៖ ១. បញ្ហាទាក់ទងនឹងប្រដាប់បន្តពូជរបស់ស្ត្រី ​ • បញ្ហាទាំងនោះអាចកើតមានក្នុងអំឡុងពេលពី ៣-៦ខែដំបូង បន្ទាប់ពីសម្រាលរួចដូចជា ស្នាមរបួសត្រង់តំបន់ទ្វារមាសដែលបណ្តាលឲ្យមានការឈឺចាប់ ភាពសើមរបស់របួស ឬអាចឈានទៅដល់ការបង្កឲ្យមានការឆ្លងរោគនានា។ បន្ថែមពីនេះ ភាពខ្សោយរបស់សាច់ដុំប្លោកនោម និងសាច់ដុំទ្វារមាស ការឈឺចង្កេះនិងការឈឺឆ្អឹងខ្នងក៏ជាបញ្ហាប្រឈមគួរឲ្យកត់សម្គាល់ផងដែរ  • កត្តាប្រឈម៖ ការសម្រាលពិបាក ការឈឺពោះសម្រាលរយៈពេលយូរ ការដាច់រហែកធ្ងន់ធ្ងរ ការប្រើឧបករណ៍ជំនួយ ការចាក់ថ្នាំឆ្អឹងខ្នងជាដើម  • ដំណោះស្រាយ៖ ត្រូវធ្វើអនាម័យក្រោយសម្រាលត្រង់តំបន់ទ្វារមាសឲ្យបានត្រឹមត្រូវ ស្វែងយល់អំពីការហ្វឹកហាត់សាច់ដុំទ្វារមាស ហូបទឹកឲ្យបានគ្រប់គ្រាន់ ទទួលទានអាហារសម្បូរសរសៃ ឬប្រើថ្នាំបន្ទន់លាមក។ ២. បញ្ហាទាក់ទងនឹងការបំបៅដោះ • មានដូចជា ការប្រេះ ឬរបកក្បាលដោះ និងការតឹងសុដន់ ឬអាចមានអាការៈធ្ងន់ធ្ងររហូតដល់មានការករជាខ្ទុះ • ដំណោះស្រាយ៖ ឈ្លី ម៉ាស្សា ជាមួយកន្សែងក្តៅឧណ្ហៗប្រហែល ១៥ ទៅ ៣០នាទីមុនបំបៅ ហើយត្រូវបំបៅក្នុងឥរិយាបថត្រឹមត្រូវ ព្រមទាំងអាចបន្ថែមថ្នបំបាត់ការឈឺចាប់។ ៣. ភាពស្លេកស្លាំង និងអាការៈទន់ខ្សោយរបស់មាតា ជាបញ្ហាសុខភាពដែលគួរឲ្យបារម្ភខ្លាំង និងកើតឡើងជាញឹកញាប់ ដោយនៅក្នុងនោះគេសង្កេតឃើញថា៖  • កត្តាប្រឈមចម្បងគឺ៖ បញ្ហាកង្វះគ្រាប់ឈាមមុនពេលសម្រាល ការធ្លាក់ឈាមច្រើនក្នុងពេលសម្រាល ឬក្រោយសម្រាលភ្លាមៗ ក្នុងនោះដែរការបំបៅកូនដោយទឹកដោះម្តាយ  របបអាហារមិនគ្រប់គ្រាន់ ឬមិនត្រឹមត្រូវ ព្រមទាំងជំងឺបន្ថែមផ្សេងៗក្នុងពេលមានផ្ទៃពោះដូចជាជំងឺគ្រាប់ឈាមនិងជំងឺលើសសម្ពាធឈាមជាដើមក៏ជះឥទ្ធិពលលើសុខភាពរបស់ស្ត្រីក្រោយសម្រាលផងដែរ  • ដំណោះស្រាយ៖ តម្រូវឲ្យបន្តបន្ថែមសារធាតុដែក និងវីតាមីន   រក្សាឲ្យបាននូវរបបអាហារដែលមានតុល្យភាព សម្រាកឲ្យបានគ្រប់គ្រាន់ និងធ្វើលំហាត់ប្រាណឲ្យបានសមស្រប។ ក្រៅពីនេះ កត្តាសំខាន់គឺត្រូវត្រឡប់មកជួបវេជ្ជបណ្ឌិតដើម្បីធ្វើការស្រាវជ្រាវរកមូលហេតុពាក់ព័ន្ធដែលបង្កឲ្យមានបញ្ហាសុខភាពនេះ។ ៤. បញ្ហាឈាមរដូវមិនប្រក្រតី  • ជាទូទៅរដូវរបស់ស្ត្រីនឹងត្រឡប់មកវិញ ក្នុងចន្លោះពី៦ ទៅ ៨សប្តាហ៍ក្រោយសម្រាល ឬអាចយូរជាងនេះសម្រាប់ស្ត្រីដែលបំបៅកូនដោយទឹកដោះ ប្រសិនបើការធ្លាក់ឈាមមានភាពខុសប្រក្រតីដែលស្តែងចេញតាមរយៈការធ្លាក់ឈាមអូសបន្លាយរយៈពេលយូរ ឬ ការធ្លាក់ឈាមច្រើនខុសប្រក្រតី អ្នកជំងឺចាំបាច់ត្រូវត្រឡប់មកពិនិត្យសុខភាពឡើងវិញជាបន្ទាន់ដើម្បីបញ្ជាក់ច្បាស់អំពីមូលហេតុពិតប្រាកដនៃបញ្ហា និងស្វែងរកការព្យាបាលឲ្យទាន់ពេលវេលា  • ដំណោះស្រាយ៖ ក្នុងករណីស្រាល ក្រុមគ្រូពេទ្យនឹងធ្វើការផ្តល់ថ្នាំបន្ថយការធ្លាក់ឈាម ថ្នាំបង្កើនគ្រាប់ឈាម ឬបង្កើនកម្លាំង ព្រមទាំងថ្នាំបង្កើនសមត្ថភាពកន្ត្រាក់របស់ស្បូន។ ចំណែកក្នុងករណីធ្ងន់ធ្ងរ ឬក្នុងករណីសុខភាពស្ត្រីទន់ខ្សោយខ្លាំង អ្នកជំងឺអាចត្រូវទទួលបានថ្នាំអ័រម៉ូន ឬអាចសម្រាកព្យាបាលនៅមន្ទីរពេទ្យ។ ៥. បញ្ហាទាក់ទងនឹងសុខភាពផ្លូវចិត្ត  • ជាក់ស្តែង Baby blue ជាសញ្ញាណសុខភាពផ្លូវចិត្តកម្រិតស្រាលមួយដែលអាចកើតមានឡើងញឹកញាប់ ក្រោយសម្រាល ដែលយើងសង្កេតឃើញប្រមាណជា ៣០ ទៅ៧០% ក្នុងចំណោមអ្នកម្តាយក្រោយសម្រាលទាំងអស់  ហើយមានប្រហែលពី ៥ទៅ១០% នឹងប្រែក្លាយជាជំងឺបាក់ទឹកចិត្ត និង១ទៅ៣% ប្រែទៅជាជំងឺផ្លូវចិត្តធ្ងន់ធ្ងរ (psychosis)  • សញ្ញាដំបូងអាចចាប់ផ្តើមពីការប្រែប្រួលអារម្មណ៍តិចតួច ការឆាប់ឆេវឆាវ ការផ្លាស់ប្តូរអាកប្បកិរិយា  វិបត្តិនៃការហូបអាហារ និងវិបត្តិដំណេកផងដែរ។ ការជះឥទ្ធិពលពីសុខភាពម្ដាយទៅកាន់ទារក ជាការពិតណាស់ នៅពេលសុខភាពម្តាយល្អ នោះអ្នកម្តាយនឹងមានពេលវេលា ព្រមទាំងថាមពលគ្រប់គ្រាន់ដើម្បីថែទាំទារក។ បន្ថែមពីនេះ ឥទ្ធិពលនៃអាហារូបត្ថម្ភរបស់មាតាកាន់តែមានសារសំខាន់ចំពោះទារក ជាពិសេសសម្រាប់អ្នកម្តាយដែលអនុវត្តការបំបៅកូនដោយទឹកដោះតែម្តង។  វិធីសាស្ត្រការពារពីបញ្ហាសុខភាពក្រោយសម្រាល ជាការពិត ក្រុមអ្នកជំនាញសុខាភិបាលពិតជាត្រូវដើរតួនាទីយ៉ាងសំខាន់ ដើម្បីចូលរួមចំណែកក្នុងការកាត់បន្ថយភាពគ្រោះថ្នាក់ដូចដែលបានរៀបរាប់ខាងលើ ក្នុងនោះភារកិច្ចចម្បងៗរបស់ពួកគាត់គឺ៖  • ផ្តល់ការតាមដានសុខភាពផ្ទៃពោះ ព្រមទាំងប្រឹក្សាឲ្យបានត្រឹមត្រូវ ដើម្បីប្រាកដថាការសម្រាលនឹងធ្វើឡើងប្រកបដោយសុវត្ថិភាព  • តាមដានក្រោយសម្រាល តាមរយៈការពិនិត្យ និងតាមដានយ៉ាងហ្មត់ចត់ក្នុងអំឡុងពេល សម្រាកពេទ្យ និងមុនពេលចេញពីមន្ទីរពេទ្យ  • ផ្តល់ដំបូន្មានពីការថែទាំសុខភាពក្រោយសម្រាល (ការប្រើប្រាស់ថ្នាំ របបអាហារ និងឥរិយាបថនៃការរស់នៅត្រឹមត្រូវ)  • ប្រាប់ពីសញ្ញាគ្រោះថ្នាក់ និងបញ្ជាក់ពីកាលវិភាគនៃការត្រឡប់មកពិនិត្យឡើងវិញ។ បន្ថែមពីការយកចិត្តទុកដាក់ និងការផ្តល់ដំបូន្មានពីសំណាក់ក្រុមគ្រូពេទ្យ អ្នកម្តាយក៏ចាំបាច់ត្រូវ៖  • គោរពតាមវេជ្ជបញ្ជា និងដំបូន្មានរបស់គ្រូពេទ្យ  • ស្គាល់ពីសញ្ញាគ្រោះថ្នាក់ និងត្រឡប់មកពិគ្រោះជាមួយគ្រូពេទ្យជំនាញតាមការកំណត់  • លុបបំបាត់ជំនឿ ដែលមិនមានអំណះអំណាងត្រឹមត្រូវតាមបែបវិទ្យាសាស្ត្រផងដែរ។ ភាពចាំបាច់នៃការតាមដានសុខភាពក្រោយសម្រាល ការត្រឡប់មកពិនិត្យសុខភាពឡើងវិញជាមួយក្រុមគ្រូពេទ្យពិតជាសំខាន់ និងខានពុំបានឡើយសម្រាប់អ្នកម្ដាយទាំងអស់ ទោះបីស្ត្រីមិនមានបញ្ហាសុខភាពអ្វីគួរឲ្យកត់សម្គាល់ក៏ដោយ។ ជាក់ស្តែងស្ត្រីក្រោយសម្រាលចាំបាច់មកពិនិត្យសុខភាពម្តងទៀតក្នុងរយៈពេល ៦ទៅ៨សប្តាហ៍ ឬអាចទទួលការពិនិត្យសុខភាពចំនួន ២ដងគឺនៅសប្តាហ៍ទី២ទៅ៣ និងសប្តាហ៍ទី៦ទៅ៨ បន្ទាប់ពីចេញពីមន្ទីរពេទ្យ។ តាមរយៈការត្រឡប់មកវិញនេះ ក្រុមគ្រូពេទ្យនឹងធ្វើការពិនិត្យមើលស្នាមរបួស ពិនិត្យមើលមាត់ស្បូន ស្បូន ដៃស្បូន ពិនិត្យកោសិកាមហារីកមាត់ស្បូន និងបន្ថែមពីការប្រឹក្សាពីវិធីពន្យារកំណើតដ៏ត្រឹមត្រូវ និងសមស្របសម្រាប់ស្ត្រីម្នាក់ៗផងដែរ។ ជាពិសេសទៀតនោះគឺទារកគួរតែមកទទួលការប្រឹក្សាសុខភាពជាមួយវេជ្ជបណ្ឌិតឯកទេសផ្នែកកុមារ ព្រោះក្រៅពីការចាក់ថ្នាំបង្ការ វេជ្ជបណ្ឌិតឯកទេសផ្នែកកុមារ នឹងធ្វើការវាយតម្លៃពីការវិវឌ្ឍរបស់ទារក ទាំងការវិវឌ្ឍផ្នែកខួរក្បាលទម្ងន់ និងកម្ពស់ រួមទាំងផ្តល់ការប្រឹក្សាទាក់ទងនឹងអាហារូបត្ថម្ភដ៏ត្រឹមត្រូវសម្រាប់ទារក។ បន្ថែមពីនោះ ជាអនុសាសន៍ដល់ស្ត្រីដែលកំពុងមានផ្ទៃពោះ កំពុងត្រៀមខ្លួនសម្រាល និងអ្នកម្តាយដែលទើបសម្រាលបុត្រថ្មីៗគួរតែព្យាយាមអនុវត្តតាមគន្លឹះខាងក្រោមរួមមាន៖  • អំឡុងពេលពពោះ៖ ត្រូវថែទាំសុខភាពឲ្យបានត្រឹមត្រូវ បូករួមជាមួយការពិនិត្យសុខភាពឲ្យបានទៀងទាត់ និង ទទួលការប្រឹក្សាយោបល់ជាមួយបុគ្គលិកសុខាភិបាលដែលមានឯកទេសច្បាស់លាស់  • កំពុងត្រៀមសម្រាល៖ ត្រូវស្វែងរកគ្លីនិក ឬមន្ទីរពេទ្យដែលអាចផ្តល់ទំនុកចិត្ត និងសុវត្ថិភាពខ្ពស់ដល់ការសម្រាល  • ក្រោយសម្រាល៖ ត្រូវគោរពតាមដំបូន្មានរបស់គ្រូពេទ្យ ព្រមទាំងទទួលទានអាហារប្រកបដោយតុល្យភាព។ អត្ថបទ៖ ដកស្រង់ចេញពីទស្សនាវដ្ដី ហេលស៍ថាម ប្រូ​ លេខ ៨៥ 2019 រក្សាសិទ្ធិគ្រប់យ៉ាង​ដោយ Healthtime Corporation ចំពោះគ្រប់អត្ថបទដោយគ្មានផ្នែកណាមួយត្រូវបោះពុម្ពផ្សាយចូលប្រព័ន្ធអុីនធឺណែតឧបករណ៍អេឡិចត្រូនិកអាត់ជាសំឡេងឬថតចំលងគ្រប់រូបភាពដោយគ្មានការអនុញ្ញាតឡើយ

ចែករំលែក
Top